महाराष्ट्र आरोग्य विज्ञान विद्यापीठाच्या विभाजनाचे तीव्र पडसाद नाशिकच्या राजकारणावर उमटले आहेत. विद्यापीठाच्या विभाजनाला तीव्र विरोध होण्यास सुरुवात होताच भाजपचे धाबे दणाणले आहे. आमदार प्रा. देवयानी फरांदे यांनी सोमवारी मुख्यमंत्री देवेंद्र फडणवीस यांची भेट घेत नाशिककरांच्या तीव्र भावना मुख्यमंत्र्यांच्या लक्षात आणून दिल्या. मुख्यमंत्र्यांनीही विद्यापीठाच्या विभाजनाचा कोणताही प्रस्ताव विचाराधीन नसल्याचे आश्वासन फरांदे यांना दिले.
नाशिकच्या विद्यापीठाचे विभाजन होणार असल्याने त्याचे तीव्र पडसाद उमटले आहेत. राज्य सरकारच्या या प्रस्तावाचा सर्वच स्तरातून विरोध होत असून, त्याचे सर्वाधिक चटके भाजपला बसणार आहेत. त्यामुळे आ. फरांदे यांनी या प्रकरणाबाबत तातडीने सोमवारी मुख्यमंत्री देवेंद्र फडणवीस यांची भेट घेतली. आयुष संचालनालयाच्या प्रस्तावाचे विपरीत परिणाम नाशिकमध्ये उमटण्याची
शक्यता आहे. विद्यापीठाच्या विस्तारासाठी नाशिकमध्ये मुबलक जागा असून, निधीचीही तरतूद आहे. विद्यापीठ सदृढ होत असतांना त्याचे विभाजन करणे चुकीचे आहे. त्यामुळे नाशिककरांच्या भावना दुखावल्या असून, लोकभावेनेचा विचार करून आरोग्य विज्ञान विद्यापीठाच्या होणारे विभाजन रोखावे अशी मागणी फरांदे यांनी मुख्यमंत्र्यांकडे केली. त्यावर मुख्यमंत्र्यांनी विभाजनाचा कोणताही प्रस्ताव नसल्याचे फरांदे यांना सांगितले.
मोबाइल अॅप डाउनलोड करा आणि राहा अपडेट
