लसीकरणास उत्स्फूर्त प्रतिसाद; आजपासून घराघरात बालकांचा शोध
म. टा. प्रतिनिधी, नाशिक
मानवी इतिहासात ज्या दुर्धर रोगांनी मानवाच्या शारिरिक, आर्थिक स्थितीवर विघातक परिणाम केले आहे. त्यामध्ये पोलिओचे नाव प्रामुख्याने घ्यावे लागेल. पोलिओ या विषाणूजन्य आजाराचे समूळ उच्चाटन होणयासाठी केंद्र सरकारने राष्ट्रीय पोलिओ लसिकरण मोहिमेचे आयोजन केले आहे. शहरातील अनेक केंद्रावर रविवारी बाळांचे लसिकरण करण्यात आले. ही मोहीम गुरुवारपर्यंत (दि. २१) राबविली जाणार आहे.
नाशिक महापालिकेच्या पल्स पोलिओ मोहिमेचा शुभारंभ महापौर अशोक मूर्तडक यांच्या हस्ते करण्यात आला. यावेळी उपमहापौर गुरमीत बग्गा स्थायी समिती सभापती शिवाजी चुंभळे, महिला व बालकल्याण सभापती वत्सला खैरे, पंचवटी प्रभाग सभापती सुनीता शिंदे, नगरसेवक रुची कुंभारकर, विमल पाटिल आदी उपस्थित होते. नाशिक महापालिका व राज्य सरकारच्या वतीने ० ते ५ वर्षे वयोगटातील बालकांसाठी ही विशेष मोहीम आखण्यात आली. यात नियमित लसीकरणा व्यतिरिक्त पोलिओचे जादा डोस दिले जातात. महापालिका व राज्य सरकारच्या कर्मचाऱ्यांनी घराघरात जाऊन लरहान मुलांना डोस दिले. तसेच रेल्वे स्टेशन, नाशिकरोड रेल्वे स्टेशन, सीबीएस, मेळा स्टॅड, निमाणी बसस्थानक येथे देखील डोस देण्याची व्यवस्था करण्यात आली. प्रभाग अधिकारी म्हणून निवासी वैद्यकीय अधिकारी, आर. सी. एच. नोडल ऑफिसर, मुख्य वैद्यकीय अधिकारी, वैद्यकीय अधिकारी यांची नियुक्ती करण्यात आली होती. सरकारतर्फे १९९५-९६ पासून पोलिओ कार्यक्रम मोहिम राबविली जात आहे.
लसीकरणाची खातरजमा
बुथवरील रविवारच्या कामानंतर शहरात प्रत्येक घरी जाऊन मुलांना पोलिओ डोस दिला की नाही, याची खात्री करून घेण्यात येणार आहे. ज्या बालकांनी रविवारी डोस घेतला नाही, त्यांना घरी हा डोस दिला जाणार असून ही मोहीम पुढील पाच दिवस सुरू राहणार आहे. त्यासाठी एकूण ६१७ संघ व १२७ आयपीपीआय पर्यवेक्षकांनी काम केले प्रत्येक संघात दोन कर्मचारी होते. मोहिमेसाठी महापालिका, ग्रामीण रुग्णालय, वैद्यकीय अधिकारी, परिचारीका, कर्मचारी, विभागीय अधिकारी तसेच खासगी सहाय्यक परिचारिका, अंगणवाडी, आयसीडीएस परिचारिका, सेविका, मदतनीस, वैद्यकीय महाविद्यालय, नर्सिंग महाविद्यालय आदींनी परिश्रम घेतले.
३८८७ बालकांना 'दो बुंद जिंदगी के'
देवळाली कॅम्प : देवळाली कॅम्प परिसरात १ ते ५ वर्षाच्या आतील बालकांसाठी कॅन्टोन्मेंट जनरल हॉस्पिटलच्या वतीने पल्स पोलिओ लसीकरण मोहीम राबविण्यात आली. यात १५ बुथ च्या माध्यमातून सुमारे ३८८७ बालकांना पोलिओचा डोस देण्यात आला. चारणवाडी, शिंगवे बहुला, स्टेशनवाडी, महेश्वरी केंद्र, जोशी हॉस्पिटल, अंबडवाडी, हौसन रोड येथील प्राथमिक शाळेत, विठ्ठलवाडी, विजयनगर आदी भागात कर्मचारी यांनी जाऊन डोस दिले. तर एक फिरते पथक ग्रामीण भागात कार्यरत होते.
मोहिमेसाठी यांचे प्रयत्न
६२८ बुथ
९५ ट्रान्झिट टीम
३९ फिरते पथक
९ रात्रपाळीचे पथक
एक हजार ८७५ कर्मचारी
एकूण १३६ पर्यवेक्षक
मोबाइल अॅप डाउनलोड करा आणि राहा अपडेट
