म. टा. प्रतिनिधी, नाशिक
मराठा विद्या प्रसारक समाजाच्यावतीने आयोजित तिसऱ्या राष्ट्रीय व आठव्या राज्यस्तरीय एमव्हीपी मॅरेथॉनमध्ये बंगळूरू येथील गिरीषचंद्र तिवारी याने ४२. १९५ किलोमीटर गटात प्रथम क्रमांक मिळवला. त्याला आंतरराष्ट्रीय कुस्तीगीर नरसिंह यादव याच्या हस्ते रोख एक लाख रुपये व स्मृतीचिन्ह देऊन गौरविण्यात आले.
मविप्र मॅरेथॉन स्पर्धेचे उदघाटन कुस्तीगीर नरसिंह यादव याच्याहस्ते ध्वज फडकावून करण्यात आले. त्यानंतर विविध गटांना क्रमवारीने मॅरेथॉनसाठी सोडण्यात आले. यावेळी वरिष्ठांच्या स्पर्धेत कर्नाटकचा गिरीषचंद्र तिवारी याने ४२.१९५ किलोमीटर गटात २ तास २७ मिनिटे व ४ सेकंद वेळ नोंदवून प्रथम क्रमांक मिळवला. उत्तराखंडचा कमल दर्शन सिंग याने २ तास २७ मिनिटे व ४३ सेकंद वेळ नोंदवून दुसरा क्रमांक मिळवला तर पुण्याच्या किशोर दगडूबा गव्हाणे याने २ तास २८ मिनिटे ३९ सेकंद वेळ नोंदवून तिसरा क्रमांक मिळवला. दुसऱ्या क्रमांकावर आलेल्या कमल याला ७५ हजार रुपये देऊन, तर तृतीय क्रमांकावर आलेल्या गव्हाणे याला ५१ हजार रुपये देऊन नरसिंह यादव यांच्या हस्ते गौरविण्यात आले.
याप्रसंगी नरसिह यादव याने स्पर्धकांचे अभिनंदन केले. मविप्र संस्थेने मॅरेथॉन स्पर्धेसाठी खेळाडूंना चांगले वातावरण व संधी उपलब्ध करून दिली. या उपक्रमामुळे आंतरराष्ट्रीय स्तरावरील खेळाडू निर्माण होतील, असा विश्वासही यादव याने व्यक्त केला. याप्रसंगी हवेत रंगीबेरंगी फुगे सोडून ढोल ताशांच्या गजरात व फटाक्यांच्या आतषबाजीत स्पर्धेचे शानदार उदघाटन झाले. मॅरेथॉन आयोजन समितीच्या अध्यक्षा नीलिमा पवार यांनी 'मॅरेथॉनमध्ये जास्तीत जास्त लोकांनी सहभागी होऊया अशी घोषणा केली व सर्वांना नवीन वर्षाच्या शुभेच्छा दिल्या. अॅथलेटीक्स फेडरेशन ऑफ इंडियाचे निरीक्षक विजय बेंगाळे उपस्थित होते. या वर्षापासून दोन गट वाढविण्यात आले होते. एकूण १६ वेगवेगळया गटात ही स्पर्धा घेण्यात आली.
साडेतीन हजार स्पर्धक
या स्पर्धेत एकूण ३५०० स्पर्धकांनी सहभाग नोंदविला. अर्ध मॅरेथॉन खुल्या पुरूष गटात २१.०९७ किमी मॅरेथॉनमध्ये व अर्ध मॅरेथॉन खुल्या महिला गटात एकूण ३०० स्पर्धेकांनी सहभाग घेतला. या व्यतिरिक्त १३ गटांमध्ये ३२०० स्पर्धकांनी भाग घेतला. या स्पर्धेसाठी भारतातून उत्तर प्रदेश, बिहार, राजस्थान, मध्य प्रदेश, झारखंड, छत्तीसगड, हरियाणा, दिल्ली तसेच महाराष्ट्रातून, मुंबई, पुणे, ठाणे, कोल्हापूर, अहमदनगर, नागपूर, सांगली, कराड, सोलापूर, सातारा, चंद्रपूर, रत्नागिरी, अमरावती, सिंधुदुर्ग, औरंगाबाद, धुळे, सेनादल, तामिळनाडू, कर्नाटक, व नाशिक जिल्ह्यातून विविध
गटातील खेळाडू सहभागी झाले.
खेळाडूंचा सत्कार
याप्रसंगी नरसिंग यादव याचा सरचिटणीस नीलिमा पवार यांच्याहस्ते सत्कार करण्यात आला. यानंतर क्रीडाधिकारी संजय सबनीस, अनिल वाघ, हरिभाऊ ढोली, दुर्गा देवरे यांचा सत्कार करण्यात आला. सर्वोत्कृष्ट पत्रकार पुरस्कार टाईम्स ऑफ इंडियाचे दीपक ओढेकर यांना देण्यात आला. पाच हजार रुपये रोख व स्मृतीचिन्ह देवून त्यांचा सत्कार करण्यात आला. केटीएचएम कॉलेजमधील कु. लखन रहाडे, कु. कोजागिरी बच्छाव, कु. संदेश चव्हाण, कु. रोषनी मुर्तडक, कु. शंतनु पाटील, कु. ऐश्वर्या गोवर्धने या मविप्र संस्थेतील सर्वोत्कृष्ट खेळाडूंना पुरस्कार देऊन गौरविण्यात आले.
सात लाखांची पारितोषिके
स्पर्धेत विविध १६ गटातील विजयी खेळाडूंना रोख पारितोषिके, आकर्षक ट्रॉफी व मुकूट देऊन सन्मानित करण्यात आले. स्पर्धेत एकूण ७ लाख १४ हजार ५०० रूपयांची रोख पारितोषिके देण्यात आली.
राष्ट्रीय विकासासाठी खेळा
भारताचा ऑलिम्पिक पदक विजेता, राजीव गांधी खेलरत्न पुरस्कार प्राप्त व आंतरराष्ट्रीय कुस्तीगीर, नरसिंह यादव याने खेळाडूंना मार्गदर्शन केले. तो म्हणाला, की मराठा विद्या प्रसारक समाज या संस्थेने राष्ट्रीय पातळीवरील मॅरेथॉन स्पर्धा भरवून शतक महोत्सवी वर्षात एक वेगळा आदर्श निर्माण केला आहे. आजपर्यंत मी बघितलेल्या व प्रमुख अथिती म्हणून सहभागी झालेल्या सर्व स्पर्धांच्या तुलनेत ही स्पर्धा भव्यदिव्य स्वरूपाची व मोठ्या संख्येची असून, सर्वोत्तम आहे. संस्थेचा कार्यकर्तृत्वाचा त्यांनी मनापासून गौरव केला. खेळाच्या माध्यमातून भारताचे नाव उज्वल करायला संधी आहे. राष्ट्रीय विकासासाठी खेळाचे महत्त्व मोठे आहे. स्पर्धेत भाग घ्या व आरोग्य उत्तम ठेवा असेही यादव म्हणाला.
मोबाइल अॅप डाउनलोड करा आणि राहा अपडेट