संस्कृत राज्य नाट्य स्पर्धेकडे प्रेक्षकांनी फिरविली पाठ; आयोजक हैराण
म. टा. खास प्रतिनिधी, नाशिक
मोठ्या जल्लोषात रविवारी सुरू झालेल्या ५५ व्या महाराष्ट्र राज्य हौशी संस्कृत राज्य नाट्य स्पर्धेला केवळ पाच ते सहा प्रेक्षकच असल्याने या 'भरजरी भाषे'ला भविष्य आहे की नाही, असा प्रश्न निर्माण झाला. हौशी राज्य नाट्य स्पर्धेला मिळालेला अभूतपूर्व प्रतिसाद पाहता व बाल नाट्याला प्रेक्षकांनी केलेली गर्दी पाहता संस्कृत नाटकांच्या वेळी 'प्रेक्षक गेले कुणीकडे?' असे विचारण्याची वेळ आयोजकांवर आली.
संस्कृत ही ऐतिहासिक भाषा असून ती पृथ्वीवरील सर्वात प्राचिन, समृद्ध आणि शास्त्रीय भाषा मानली जाते. ही भाषा हिंदू, बौद्ध, शीख आणि जैन धर्मांच्या उपासनेची भाषा असून भारताच्या २३ शासकीय राज्यभाषांपैकी एक आहे. महाकवी कालिदास हे संस्कृत भाषेचे आद्यकवी असून मेघदूत, ॠतुसंहार, रघुवंशम्, कुमारसंभवम् ही त्यांची खंडकाव्ये आणि दीर्घकाव्ये, तर विक्रमोर्वशीयम्, अभिज्ञानशाकुन्तलम्, मालाविकाग्निमित्रम ही त्यांची नाटके संस्कृत भाषेतून त्यांनी लिहिली. त्यामुळे आजचे साहित्य खऱ्या अर्थाने श्रीमंत झाले. परंतु असे असताना संस्कृत भाषेतून होणाऱ्या नाटकांकडे नाशिककर प्रेक्षकांनी चक्क पाठ फिरवली. रविवारी सादर झालेल्या नाटकाला केवळ पाच ते सहा प्रेक्षकांची उपस्थिती होती. त्यामुळे गुरूवारपर्यंत होणाऱ्या २० नाटकांना प्रेक्षक येतील की नाही अशी शंका निर्माण झाली आहे.
नाट्य स्पर्धांचा
संस्कृतला फायदाच
पूर्वीच्या काळी नाटक हे रुढी परंपरा यांच्या विरोधात प्रबोधन करण्याचे साधन म्हणून वापरले जात असे. त्यामुळे नाटकातून प्रबोधन करता येते हे आतदेखील जनमानसावर ठसायला हवे. तसेच या नाट्य स्पर्धांचा संस्कृत भाषेला फायदा होत आहे, असे प्रतिपादन प्रा. डॉ. लीना हुन्नरगीकर यांनी व्यक्त केले. ५५ व्या राज्य हौशी संस्कृत नाट्य स्पर्धेच्या उद्घाटनप्रसंगी त्या बोलत होत्या. त्या म्हणाल्या, की या स्पर्धांमधून भाषेचा अभ्यास होणे गरजेचे असून समाजाचे मनोरंजनही व्हावे. परशुराम साईखेडकर नाट्यगृहात रविवारपासून या स्पर्धेला प्रारंभ झाला. स्पर्धा ३१ डिसेंबरपर्यंत स्पर्धा चालणार असून यात २० नाटके होणार आहेत.
उदघाटन कार्यक्रमाच्या अध्यक्षस्थानी नाट्य परिषदेचे अध्यक्ष रवींद्र कदम होते. तर व्यासपीठावर परीक्षक श्रीनंद बापट, अंजली पर्वते, तरंगिणी खोत, समन्वयक राजेश जाधव, मीना वाघ यांची उपस्थित होती. यावेळी प्रा. कदम म्हणाले की, रामायणासारखे नाट्य या भूमीवर झाल्याने नाशिक ही पहिली रंगभूमी असल्याचे त्यांनी सांगितले. वेदांग जोशी यांनी सूत्रसंचालन केले. विद्याधर निरंतर, भगवान हिरे, अरुण गिते यांच्या हस्ते स्वागत करण्यात आले. सुरेश गायधनी, माणिक कानडे, रोहित पगारे आदी उपस्थित होते. नाट्यस्पर्धेत सोमवारी (दि. २८) नदीसूक्तम, वक्रतुंड, ऐकक संघ, कथा वार्धक्यस्य इयम ही नाटके होणार आहेत.
'विशतिचक्रयोग:' नाटक सादर
स्पर्धेत सांगलीच्या संस्कारज्योती संस्थेच्या वतीने 'विशतिचक्रयोग:' नाटक सादर झाले. शालेय जीवनातील दोन मैत्रिणींपैकी एक भविष्यात शिक्षिका तर दुसरी वेश्या होते. या दोघींची अचानक भेट होते, एकमेकींची ओळख पटते; पण शिक्षिकेला आपली मैत्रीण वेश्या असल्याचे कळताच ती तिला 'यापुढे आपल्याला कधीच भेटू नको' सांगत निघून जाते. समाजातील स्थानापुढे मैत्रीचे बंधही कसे फिके पडतात, याचे चित्रण या नाटकात करण्यात आले. यतिन माझिरे लिखित व नम्रता इंगळे दिग्दर्शित या नाटकात योगिता पवार व नम्रता इंगळे यांनी भूमिका केली.
मोबाइल अॅप डाउनलोड करा आणि राहा अपडेट
