प्रभू येशूच्या स्वागतासाठी गुरूवारी मध्यरात्री बारा वाजेच्या सुमारास विद्युत रोषणाई करण्यात आली होती. यावेळी फटाक्यांच्या आतषबाजीने शहरातील आसमंत उजळून निघाले होते. या वातावरणात मध्यरात्री गंभीर आवाजात कानावर पडणारे प्रार्थनेचे स्वर आणि सर्वत्र मंगल घडावे या उद्देशाने करण्यात आलेली सदभावना प्रार्थना यामुळे शहरातील वातावरण प्रफुल्लित बनले होते.
नाशिकरोड परिसरातील बाळ येशू गिरीजाघर, शरणपूर रोडवरील सेंट आंद्रीया चर्च, त्र्यंबक नाका येथील होली क्रॉस चर्च, नेहरू नगर परिसरातील बाळ येशू मंदिर, इंदिरा नगर परिसरातील जॉर्ज चर्च, वावरे लेन परिसरातील थॉमस चर्च आदी प्रार्थनास्थळांमध्ये येशू जन्मसोहळा साजरा झाला. गुरूवारी सायंकाळच्या सुमाराला ख्रिश्चन बांधवांचा बाप्तिस्मा विधी झाल्यानंतर शहरातील सुमारे ११ चर्चमध्ये येशू जन्मोत्सव साजरा करण्यात आला. विविध चर्चमध्ये तेथील धर्मगुरूंच्या मार्गदर्शनाखाली 'मिस्सा' प्रार्थना करण्यात आली. यावेळी भेटवस्तू, चॉकलेट्स, केक चे वाटप करण्यात आले.
जागोजागी उभारले देखावे
नाताळ निमित्ताने शहरातील विविध ११ चर्चच्या परिसरात येशू जन्माचे देखावे सादर करण्यात आले आहे. याशिवाय समाजबांधवांची महिला मंडळे, ज्येष्ठ नागरीकांची मंडळे, तरूणांचे संघटन, शाळा आदी माध्यमातून ख्रिस्त जन्मोत्सव नाटिकेचे सादरीकरण, नाटक, विविध स्पर्धा, कॅरॉल (नाताळची गाणी) यांचे सादरीकरण करण्यात आले.
खरेदीकडे कल
नाताळाच्या सुट्ट्यांमुळे व वातावरणातील वाढता गारवा याचा आनंद घेण्यासाठी नाशिककरांची पाऊले सध्या दिवाळीनंतरही खरेदीकडे वळत असल्याचे चित्र दिसत आहे. लोकरीची कपडे, घराचे पडदे तसेच गृहपयोगी साहित्य खरेदी करण्यासाठी मोठमोठ्या सेलमध्ये गर्दी होताना दिसत आहे. डोंगरे वस्तीगृह, सीबीएस, अंबड, सातपूर, शालीमार, मेनरोड तसेच विविध मॉलमध्ये क्रिसमसनिमित्त ऑफर सेलही भरविण्यात आला आहे.
मनोरंजन अन् पर्यटनही
नाताळाच्या सुट्यांमुळे शहरातील विविध चित्रपटगृह, कालिदास नाट्यमंदिर, परशुराम सायखेडकर आदी नाट्यगृहे हाऊसफुल्ल झाल्याचे दिसत आहेत. विविध फेस्टिव्हल व सांस्कृतिक मेजवानीमुळे सुटीचा आनंद द्विगुणित झाला आहे. तर थंडी व त्यातच नाताराळाच्या सुटीमुळे नाशिककर पर्यटनांसाठी शहरातील तसेच जिल्ह्यातील पर्यटनस्थळांना भेटी देत आहेत.
मोबाइल अॅप डाउनलोड करा आणि राहा अपडेट