मालेगाव महापालिकेच्या हद्दवाढीत समाविष्ट झालेल्या गावांमधील नागरी सोयी सुविधांसाठी शासनाने विशेष अर्थसहाय्य योजनेंतर्गत १४ कोटी ५५ लाख रुपये मंजूर केले आहेत. तालुक्यातील आर्थिकदृष्ट्या मागासवर्गीय मुलींच्या शासकीय वसतिगृहासाठी शासनाने निळगव्हाण येथील जागेवर इमारत बांधकामासाठी ४ कोटी ६४ लाख रुपये रकमेच्या अंदाजपत्रकास मान्यता दिली आहे. ही माहिती सहकार राज्यमंत्री दादा भुसे यांनी दिली.
मालेगाव मनपाच्या हद्दावाढीनंतर समाविष्ट झालेल्या गावांच्या नागरी सोयी सुविधांसाठी पहिल्या टप्प्यात ५.८२ कोटी रुपये निधी विविध विकासकामांसाठी वितरित करण्यास मंजुरी मिळाली आहे. लवकरच या भागात विकासकामे सुरू करण्यात येणार आहेत. समाज कल्याण विभागाच्या मागासवर्गीय व आर्थिकदृष्ट्या मागासवर्गीय मुलींच्या शासकीय वसतिगृहासाठी नियोजित निळगव्हाण येथील एक एकर जागेऐवजी आदिवासी विकास विभागाच्या अखत्यारीतील भायगाव येथील एक एकर जागा समाज कल्याण विभागाकडे हस्तांतरित करावी यासाठी प्रस्ताव सादर केला होता. या हस्तांतरण प्रक्रियेस देखील मंजुरी मिळाली आहे.
मोबाइल अॅप डाउनलोड करा आणि राहा अपडेट
