शिवसेनेने काँग्रेस, राष्ट्रवादी काँग्रेस आणि मित्रपक्ष भाजपला धक्का देत त्र्यंबकेश्वर नगरपालिकेसह जिल्हा बँकेतील राजकारणाला कलाटणी दिली. जिल्हा बँकेचे अध्यक्ष व माजी उपमुख्यमंत्री छगन भुजबळ यांचे कट्टर समर्थक नरेंद्र दराडे यांनी शिवसेनेत प्रवेश केला आहे. तर त्र्यंबकेश्वर नगरपालिकेतील आठ नगरसेवकांनीही शिवसेना पक्षप्रमुख उद्धव ठाकरे यांच्या उपस्थितीत प्रवेश केला. या दोन्ही प्रवेश सोहळ्याने जिल्ह्यातील राजकारणाचे गणिते बदलली आहेत.
येवल्यातून आमदारकी लढवण्यासाठी आपण शिवसेनेत प्रवेश केल्याचा दावा दराडे यांनी केला आहे. दराडे हे भुजबळ यांचे कट्टर समर्थक म्हणून ओळखले जातात. परंत, विधानसभा निवडणुकीपूर्वीच दराडे यांनी शिवसेनेत प्रवेश करण्याचा प्रयत्न केला होता. मात्र, त्यावेळी ते यशस्वी होवू शकले नव्हते. त्यांचा प्रयत्न बुधवारी यशस्वी झाला. शिवसेना पक्षप्रमुख उद्धव ठाकरेंच्या उपस्थितीत त्यांनी मातोश्रीवर प्रवेश केला. त्यांच्या या प्रवेशाने जिल्हा बँकेतील राजकारण बदलले असून जिल्हा बँकेत उपाध्यक्षापाठोपाठ अध्यक्षही शिवसेनेचा राहणार आहे. त्यामुळे बँकेवर सेनेचा झेंडा फडकणार आहे. तर येवल्यातून शिवसेनेला तगडा उमेदवार मिळणार आहे. शिवसेनेच्या या चालीमुळे 'राष्ट्रवादी'ला मोठा धक्का बसला आहे. सोबतच त्र्यंबकेश्वरमध्येही भाजप, मनसे, काँग्रेसचे नगरसेवक शिवसेनेत दाखल झाल्याने या नगरपालिकेवर शिवसेनेचा झेंडा फडकण्याची शक्यता आहे.
अनेक दिवसांपासून शिवसेनेत प्रवेश करण्याची इच्छा होती. येवल्यातून आमदारकी लढविण्याची इच्छा असून छगन भुजबळांमुळे राष्ट्रवादीतर्फे निवडणूक लढता येत नाही. त्यामुळे आता शिवसेनेतर्फे ही निवडणूक लढविणार आहे.
- नरेंद्र दराडे, अध्यक्ष, जिल्हा बँक आठ नगरसेवकांचा शिवसेनेमध्ये प्रवेश
त्र्यंबकेश्वर : त्र्यंबकेश्वर नगर परिषदेमधील भाजप, काँग्रेस आणि राष्ट्रवादी काँग्रेसच्या आठ नगरसेवकांनी शिवसेनेमध्ये प्रवेश केला आहे. या नगरसेवकांनी समर्थकांसह कार्याध्यक्ष उध्दव ठाकरे यांच्या उपस्थितीत मातोश्रीवर भेट घेवून भगवा झेंडा हाती घेतला. भाजपच्या तृप्ती धारणे, राष्ट्रवादीचे रवींद्र सोनवणे, अलका शिरसाठ, शकुंतला वाटाणे, अंजना कडलग तसेच काँग्रेसचे ललित लोहगावकर, रवींद्र गमे, सिंधू मधे यांचा या आठ नगरसेवकांमध्ये समावेश आहे. त्यांच्या सोबत पंकज धारणे (भाजप), सचिन दीक्षित, विशाल शेलार (मनसे) यांनीही शिवसेनेत प्रवेश केला. यावेळी पक्षाचे संपर्कप्रमुख अजय चौधरी, जिल्हाप्रमुख विजय करंजकर, निवृत्ती जाधव, शहर प्रमुख अजय बोरस्ते, सुधाकर बडगुजर, शिवराम झोले आदी उपस्थित होते.
मोबाइल अॅप डाउनलोड करा आणि राहा अपडेट