अपघाती मृत्यूंमागे हेल्मेटचा अभाव हेच महत्त्वाचे कारण असल्याचे निष्कर्ष नोंदविण्यात आले आहे. वाहन चालवितेवेळी हेल्मेटचा वापर बंधनकारक असला तरी या नियमाचे सर्रास उल्लंघन केले जात असल्याचे पहावयास मिळत आहे. आरटीओने शहरातील रस्त्यांवर केलेल्या एका पाहणीत केवळ पाच टक्केच लोक हेल्मेटचा वापर करीत असल्याचे खेदजनक वास्तव पुढे आले होते. सुप्रीम कोर्टाच्या एका परिपत्रकाचा आधार घेऊन आरटीओने २६ ऑक्टोबरपासून शहरात एक विशेष मोहीम उघडली. हेल्मेट आणि सीटबेल्ट वापराचा आग्रह धरणारी ही मोहीम शहरात ठिकठिकाणी राबविण्यात आली. या मोहिमेंतर्गत शहरात हेल्मेटशिवाय वाहने चालविणाऱ्या ८४५ जणांवर तर सीटबेल्टचा वापर न करणाऱ्या १९ वाहनचालकांवर कारवाईचा बडगा उगारण्यात आला. अशा वाहनचालकांना पेठरोडवरील आरटीओ कार्यालयात शनिवारी होणाऱ्या दोन तासांच्या समुपदेशनाला हजर राहाणे बंधनकारक करण्यात आले आहे. आतापर्यंत ५५० जणांचे समुपदेशन करण्यात आले आहे. या कारवाईत ४८ हजार २०० रुपयांचा दंड वसूल करण्यात आला.
दिवाळीच्या सुट्यांमध्ये थंडावलेली हेल्मेट आणि सीटबेल्ट सक्तीची मोहीम पुन्हा हाती घेण्याचा निर्णय प्रादेशिक परिवहन अधिकारी जीवन बनसोड, उपप्रादेशिक परिवहन अधिकारी भरत कळसकर यांनी घेतला आहे. सोमवारपासून मोहिमेचा दुसरा टप्पा सुरू होणार आहे. १४ ते १८ डिसेंबर या कालावधीत शहरात तसेच महामार्गांवर ही मोहीम राबविण्यात येणार आहे.
वार रस्ता
सोमवार नाशिक - पेठ, नाशिक - मुंबई
मंगळवार नाशिक - दिंडोरी, नाशिक - त्र्यंबकेश्वर
बुधवार नाशिक - धुळे, नाशिक - गंगापुर
गुरूवार नाशिक औरंगाबाद, नाशिक - कॉलेजरोड
शुक्रवार नाशिक - पुणे, नाशिक -उंटवाडी
महाविद्यालयांत गुंजणार लोकगीताचे स्वर...
हेल्मेट तसेच सीटबेल्ट वापराबाबत महाविद्यालयीन तरुणाई उदासीन असल्याचे निरीक्षण प्रादेशिक परिवहन विभागाने नोंदविले आहे. तरुणाई हेल्मेट वापरासाठी प्रेरीत व्हावी, यासाठी 'जवा नवीन पोपट हा'च्या उडत्या चालीवर लोकगीत तयार करण्यात आले आहे. 'आता कॉलेजला जायाचं हाय मला हेल्मेट घालायचं हाय' हे बोली भाषेतलं गीत तरुणाईला आकर्षित करतानाच हेल्मेट वापराचे महत्त्वही सांगेल, असा विश्वास अधिकाऱ्यांनी व्यक्त केला आहे. महाविद्यालयांच्या आवारात जाऊन कलापथकांच्या माध्यमातून हेल्मेट वापराबाबत प्रबोधन करण्यात येणार आहे.
आम्ही ही मोहीम टप्प्याटप्प्याने राबविण्याचा निर्णय घेतला आहे. सक्ती किंवा कारवाई हा उद्देश नसून, हेल्मेट वापराची सवय लागावी हा मुख्य उद्देश आहे. एकीकडे पथकांद्वारे कारवाई सुरू राहील तर दुसरीकडे शहरातील चौकांमध्ये पीए (पब्लिक अड्रेसिंग सिस्टम)च्या माध्यमातून वाहनचालकांचे प्रबोधन करण्यात येणार आहे. त्यासाठी ध्वनीफित बनविण्याचे कामही सुरू आहे.
भरत कळसकर, उपप्रादेशिक परिवहन अधिकारी
मोबाइल अॅप डाउनलोड करा आणि राहा अपडेट
