कुसुमाग्रज प्रतिष्ठानतर्फे ऑक्टोबर महिन्यात झालेल्या राज्यस्तरीय ख्याल गायन स्पर्धेचा पारितोषिक वितरण समारंभ रविवारी झाला.
कुसुमाग्रज स्मारकात झालेल्या या कार्यक्रमात प्रारंभी नाट्य, साहित्य आणि सांस्कृतिक क्षेत्राचे अभ्यासक व कुसुमाग्रज प्रथम अभ्यासवृत्ती प्राप्त लेखक मुरलीधर खैरनार यांना श्रध्दांजली अर्पण करण्यात आली. रोहित धारप (ठाणे) यांनी राग पुरियामध्ये शुध्दकल्याणमधील तराणा सादर केला. त्यानंतर कौस्तुभ कुलकर्णी (औरंगाबाद) यांनी ख्याल बिहाग सादर केला. मंगेश कुलकर्णी (आळे) यांचेही गायन झाले. त्यांना तबला नितीन पवार, संवादिनी दिव्या रानडे, संवादिनी कुलभूषण कहाळेकर व तबल्यावर प्रफुल्ल काळे यांनी साथसंगत केली.
कार्यक्रमाप्रसंगी तानसेन पुरस्कार प्राप्त लोकप्रिय ज्येष्ठ गायक पंडित प्रभाकर कारेकर यांची प्रमुख उपस्थिती होती. यावेळी ख्याल गायनात प्रथम क्रमांकाचा पुरस्कार विजेते रोहित धारप (ठाणे), कौस्तुभ कुलकर्णी (औरंगाबाद) यांना देण्यात आला. द्वितीय पुरस्कार रोहन गावडे (औरंगाबाद) यांना तर तृतीय पुरस्कार विभागून कुलभूषण कहाळेकर (औरंगाबाद) व निहिरा देहूकर (नाशिक) यांना देण्यात आला. उत्तेजनार्थ पारितोषिक मंगेश कुलकर्णी व केतकी भट यांना देण्यात आले. केतकी भट हिला परिस्थितीवर मात करून संगीत कलेप्रती आस्था दाखवल्याबद्दल हे उत्तेजनार्थ पारितोषिक देण्यात आले.
ही पारितोषिके प्रथम १० हजार, द्वितीय ७ हजार, तृतीय ५ हजार व उत्तेजनार्थ १ हजारांचे अशी होती. सुगम संगीत स्पर्धेत मंगेश कुलकर्णी यांना प्रथम १० हजार रूपये, रोहन गावडे यांना द्वितीय ५ हजार तर संतोष देशमुख (राजगुरूनगर) यांना तृतीय ३ हजार रूपयांचे पारितोषिक देण्यात आले. कार्यक्रमाचे सूत्र मकरंद हिंगणे यांनी सांभाळले.
मोबाइल अॅप डाउनलोड करा आणि राहा अपडेट
