महाराष्ट्र राज्याच्या सांस्कृतिक संचालनालयातर्फे आयोजित ५५ व्या हौशी राज्य नाट्य स्पर्धेत शुक्रवारी लोकमंगल कलाविष्कार सहकारी संस्था, धुळे प्रस्तूत 'फूटपाथ' हे नाटक सादर करण्यात आले.
महात्मा गांधी मार्गावरील फूटपाथवर बबन, सावित्री हे जोडपे शरद, दारुड्या, तुक्या व शिरपा हे एकत्रित रहात असतात. दिवसभर भीक मागून खाणे, रात्री फूटपाथवर झोपणे असा दिनक्रम सुरू असतानाच फूटपाथवर अतिक्रमण केले म्हणून काही अधिकारी यांना तेथून निघून जाण्याची नोटीस देतात. त्यातच सुमी नावाची एक मुलगी त्यांच्याकडे येऊन रहाते. गुंडापासून बबन व शरद तिची सोडवणूक करतात. हे फूटपाथच घर असलेल्या बबन-सावित्रीला मोठा प्रश्न पडतो की आता जायचे कुठे? दुसऱ्या अनेक जागांचा शोध ते घेतात मात्र कोठेही जागा मिळत नाही. हवालदार मात्र फूटपाथवर रहायचे असेल तर रोजच दहा रुपये मागतो. हे पैसे आणावे कोठून असे शरद, शिरपा यांना वाटते. हवालदाराच्या माराला कंटाळलेल्या या माणसांकडे एक मोठा नेता येतो व मला मते द्या, मी तुम्हाला रहायला चांगली घरे देतो असे आमिष दाखवतो. मात्र, त्याचा फक्त बोलाचाच भात व बोलाचीच कढी असे त्याला हे सर्व भुलतात. अशा आशयाचे फूटपाथ हे नाटक होते. नाटकाचे लेखन प्रा. अरविंद चौधरी यांनी केले. दिग्दर्शन सुजय भालेराव यांनी केले. निर्मिती विजय मंगळे यांची होती. या नाटकात कार्टीन खैरनार, शीतल थोरात, निकिता पवार, कुणाल खैरनार, राहुल मंगळे, संजय विसपुते, प्रसेनजित जगदेव, विशाल महाले, सिध्दांत मंगळे व अब्दुल अन्सारी, रोहित लोहार, पूजा कासार, राजेश बिऱ्हाडे, हर्षल सोनवणे, ऋचिका पांडे, शिवांजली सापे, सौरभ कासार, चैतन्य मोरे, सनी चव्हाण, अक्षय मालुसरे यांनी भूमिका केल्या. नेपथ्य राहुल मंगळे, प्रकाशयोजना हेमंत कोतवाल, संगीत जयवंत पाटील, रंगभूषा सुजय भालेराव, वेशभूषा सीमा महाजन व रंगमंच सहाय्य हर्षल सोनवणे आणि सनी चव्हाण यांचे होते.
मोबाइल अॅप डाउनलोड करा आणि राहा अपडेट