आदिवासी बोलीभाषेचे गुरूजीही गिरवणार धडे

November 26, 2015, 1:30 pm

≫ Next: अरंगेत्रममध्ये प्रेक्षक झाले तल्लीन

≪ Previous: दरोड्यांवर नव्या तिजोऱ्यांचा उतारा

म. टा. प्रतिनिधी, नाशिक

आदिवासी विद्यार्थ्यांच्या ओठांवर त्यांच्याच बोलीभाषेतून शिक्षणाची मात्रा रुजविण्याअगोदर त्यांच्या गुरूजींना या बोलीभाषेचे धडे देण्यात येणार आहेत. त्यासाठी महाराष्ट्र राज्य शैक्षणिक संशोधन व प्रशिक्षण परिषदेच्या वतीने बनविण्यात येणारे शैक्षणिक साहित्य आकाराला येत आहे. सद्यस्थितीत आदिवासी बोलीतील १० पु‌स्तिका तयार करण्यात आल्या आहेत.

राज्यामध्ये सुमारे १६ जिल्ह्यांमध्ये हा उपक्रम राबविला जाणार आहे. दुर्गम आदिवासी भागातील विद्यार्थ्यांनाही शिक्षण प्रभावी पध्दतीने मिळावे यासाठी परिषदेच्या माध्यमातून या उपक्रमाची आखणी करण्यात आली होती. सहा महिन्यांपूर्वी आदिवासी बोलीभाषा अवगत असणाऱ्या जाणकारांच्या मदतीने या शैक्षणिक साहित्याच्या निर्मितीलाही सुरुवात झाली होती. या प्रयत्नांच्या परीणामी पहिल्या टप्प्यात 'खेळच खेळ' आणि 'ओढ्याकाठी' या दोन पुस्तिका आकाराला आल्या. यानंतर याच धर्तीवर १० पुस्तिका तयार झाल्या आहेत. संबंधित जिल्ह्यातील आदिवासी बोलीभाषेतील मुख्य वाक्य आणि त्यासमोर देवनागरीतील

त्याचे भाषांतर, अशा पध्दतीची या पुस्तकांची मांडणी आहे. शिवाय मुलांना त्यांच्या बोलीभाषेतून शिकविताना अडचण जाणवू नये यासाठी आदिवासी बोलीभाषेतील शब्दकोश निर्मितीचेही काम सुरू आहे.

गळती रोखण्याचा उद्देश

आदिवासी भागांमध्ये अद्यापही विद्यार्थ्यांच्या पटसंख्या गळतीचे प्रमाण शहरी भागांच्या तुलनेत जास्त आहे. विविधांगाने या मुलांच्या शिक्षणावर भर देताना भाषिक दरी मिटवून अधिक सुलभ संवाद साधण्याचा प्रयत्न या प्रयोगातून करण्यात येणार आहे. या विद्यार्थ्यांची शालेय गळती रोखावी या उद्देशासाठी हा प्रयोग साकारला जातो आहे. १६ आदिवासी जिल्हे अन् १० बोलीभाषा

राज्यातील सुमारे ३६ पैकी १६ जिल्हे आदिवासी आहेत. यामध्ये उत्तर महाराष्ट्रात नाशिकसह चार जिल्ह्यांचा समावेश आहे. यात नाशिक, जळगाव, धुळे आणि नंदुरबार या जिल्ह्यातही हा प्रयोग राबविण्यात येणार आहे. आदिवासी बोलीभाषांमध्ये वावरी, पावरी, भिलोरी, कोरकू, परधान, मावची, गोंडी, नहाली आणि कातकरी या भाषांचा समावेश आहे.

Latest Images