महिन्याकाठी करोडो रुपयांची टोल वसुली होतानाही टोल रोड कंपनीच्या अनास्थेमुळे मनमाड- कोपरगांव राज्य महामार्गावरील येवला शहरातील पथदिप केवळ शोभेचे बाहुले बनले आहे. रस्त्याच्या मधोमध दुभाजकामध्ये बसविण्यात आलेले देखणे शेकडो पथदीप गेल्या अनेक महिन्यांपासून दुरुस्तीअभावी चक्क बंदच असल्याने महामार्गावर अंधाराचे मोठे साम्राज्य निर्माण झाले आहे. परिणामी शहरातील नागरिकांना या मार्गावरून मार्गक्रमण करताना जीव मुठीत धरूनच पुढे सरसावे लागत असून, हे अंधाराचे जाळे कधी फिटणार असा रोखठोक सवाल सर्वच करीत आहेत.
मनमाड-नगर राज्य महामार्गावरील मनमाड-येवला-कोपरगांव या रस्त्याची काही वर्षांपूर्वी 'बीओटी' तत्वावर मालेगांव-मनमाड-कोपरगांव टोल रोड प्रायव्हेट लिमिटेड या खासगी कंपनीतर्फे बांधणी केली जाताना सन २००७ मध्ये येवला तालुक्यातील पिंपळगाव जलाल शिवारात कंपनीचा टोल नाका सुरू झाला होता. या टोल कंपनीने रस्त्याचे काम करताना राज्य मार्गावर येवला शहराच्या दुतर्फा रस्त्याच्या दुभाजकाच्या मधोमध काही किलोमीटर अंतरावर देखणे असे पथदीप बसविले आहेत. तब्बल १३७ च्या आसपास हे पथदीप बसविण्यात आल्यानंतर पथदीपांच्या दोन्ही बाजुला असलेल्या दिव्यांमुळे काही दिवस चांगलाच प्रकाश पडला. राज्य मार्ग चांगलाच उजळून निघत होता. मात्र नव्याचे नऊ दिवस...म्हणतात तशीच या पथदीपांच्या बाबत गत होताना गेल्या काही वर्षात हे चित्र हळूहळू बदलत गेले. दिवसेंदिवस एक एक करत पथदीप बंद पडले. एखाद्या दोन दिव्यांचा अपवाद वगळता गेल्या काही महिन्यांपासून सर्वच दिवे बंद झालेले आहेत.
मोठ्या वाहतूक व रहदारीचा राज्य मार्ग, येवला शहरवासियांचे मोठे आवागमन...प्रत्येक क्षणाला भरधाव वेगाने धावणारी वाहने बघता रात्रीच्या वेळेस बंद राहणारे हे पथदीप मोठा चिंतेचा विषय झाला आहे. त्यातही दिवसेंदिवस या मार्गावर होणारे अपघाताचे प्रमाण बघता बंद पथदिपांबाबत शहरवासीयांची ओरड सुरु झाली आहे. एकंदरीत हे पथदूप केवळ शोभेचे बाहुले बनुन राहिले असून, राज्य मार्गावरील येवला शहर परिसरातील हे अंधाराचे साम्राज्य कधी दूर होणार? असा सवाल नागरिक करीत आहेत.
सोलरवरील दिवेही बंदच
टोल रोड कंपनीने येवला शहराचे मुख्य प्रवेशद्वार समजल्या जाणाऱ्या येवला शहरातील विंचुर चौफुलीवर तसेच फत्तेबुरुज नाक्यावर उंच असे 'हायमॉक्स' दिवे काही वर्षांपूर्वी उभारले आहेत. त्यातील बरचसे दिवे गेल्या काही महिन्यांपासुन बंद असून, सेटमधील एखादा दुसराच दिवा प्रकाश देताना दिसतो. अनेकदा झटके खात कोमात जाणारे हे हायमॉक्स दिवे देखील चिंतेत टाकून जातात. टोल कंपनीने विंचुर चौफुलीवर तसेच त्यापुढे दक्षिणेला राज्य मार्गावर बसविलेले सोलर दिवे तर कायमच बंद दिसत आहेत. हे सौर ऊर्जेवरील पथदीप कधी उजळणार? असा सवाल नागरिक उपस्थित करीत आहेत.
सोयीसुविधा कोमात, टोलवसुली जोमात!
पिंपळगाव शिवारात टोल कंपनीचा टोल नाका असून, या टोल नाक्यावर दिवसाकाठी जवळपास साडेतीन ते चार लाखांच्या आसपास टोल गोळा होत असल्याची माहिती सूत्रांनी दिली.दररोजचा हा टोल बघता महिन्याला टोल कंपनीच्या खात्यात करोडो रुपये जमा होतात. या बाबी लक्षात घेता टोलवसुली करणाऱ्या कंपनीकडून नियमानुसार राज्य मार्गावर दिल्या जाणाऱ्या सोई सुविधांच्या बाबतीत मोठा अभाव नजरेत पडत आहे. विशेषतः गेल्या अनेक महिन्यांपासुन टोल कंपनीने आपल्या अंतर्गत येणाऱ्या रस्त्याची येवला शहरानजीकची डागडुजी अथवा दुरुस्ती न केल्याने अनेक ठिकाणी रस्त्यात मोठे खड्डे पडले आहेत.
मोबाइल अॅप डाउनलोड करा आणि राहा अपडेट
