लामकानी गावातील ज्वेलर्स दुकान बंद करून दागिने व रोकड घेऊन घराकडे परतणाऱ्या व्यापाऱ्यावर चार मोटरसायकलींवर आलेल्या आठ ते नऊ दरोडेखोरांनी छर्याच्या बंदुकीतून ३० ते ३५ गोळ्या झाडत दागिन्यांसह लाखो रुपयांचा ऐवज लुटला. ही घटना धनत्रयोदशीच्या दिवशी सोमवारी लामकानी गावात घडली असून, जखमी व्यापाऱ्यावर धुळ्यातील खासगी रुग्णालयात उपचार सुरू आहेत.
लामकानी गावात बसस्थानकाच्या परिसरात अनिल उत्तमचंद बाफना (वय ३५) यांचे बाफना ज्वेलर्स नावाचे सोने-चांदीच्या दागिन्यांचे दुकान आहे. धनत्रोदशीच्या दिवशी सोमवारी बाफना पूजाविधी आटोपून नेहमीप्रमाणे रात्री आठच्या सुमारास दुकानातील सर्व दागिने व रोख रक्कम घेऊन मारुती ओम्नी व्हॅनने घराकडे निघाले. मात्र, घरी पोहोचताच त्यांच्या गाडीला मोटरसायकलवरून आलेल्या आठ ते नऊ दरोडेखोरांनी घेरले. त्यांनी छर्याच्या बंदुकीतून बाफना यांच्यावर गोळ्या झाडल्या व दागिने, रोख रक्कम असलेली बॅग घेऊन पसार झाले.
जिल्हाभरात नाकाबंदी
पोलिस अधीक्षक साहेबराव पाटील, अप्पर पोलिस अधीक्षक चंद्रकांत गवळी, पोलिस उपअधीक्षक हिंमत जाधव, सोनगीर पोलिस ठाण्याचे सहायक निरीक्षक धनंजय पाटील यांच्यासह पोलिसांचा ताफा घटनास्थळी दाखल झाला. ठिकठिकाणी नाकाबंदी करण्यात आली आहे. लामकानी परिसरात चार मोटरसायकली आढळून आल्या असून, त्या दरोडेखोरांच्या असल्याचा अंदाज व्यक्त करण्यात येत आहे. सोनगीर शिवारात दागिन्यांची डबी आढळली असून, दरोडेखोर जंगलातून पसार झाल्याचा अंदाज सोनगीर पोलिस ठाण्याचे सहाय्यक पोलिस निरीक्षक धनंजय पाटील यांनी व्यक्त केले. त्या दिशेने तपास सुरू आहे.
पत्नीसह व्यापारी जखमी
या वेळी बाफना यांची पत्नी प्रिया यांनी हा सर्व प्रकार पाहिल्यानंतर त्यांनी आरडाओरड केली असता, त्यांच्या पाठीत लाकडी दांडा मारला. त्यात त्या जागीच बेशुद्ध पडल्या. या घटनेत अनिल बाफना गंभीर जखमी झाल्याने त्यांना धुळ्यातील खासगी रुग्णालयात दाखल करण्यात आले आहे. त्यांच्या पोटातून व हातातून ३० ते ३५ छर्रे काढण्यात आल्याचे डॉक्टरांनी सांगितले. या प्रकरणी सोनगीर पोलिस ठाण्यात दरोडेखोरांविरुद्ध गुन्हा दाखल करण्यात आला आहे.
मोबाइल अॅप डाउनलोड करा आणि राहा अपडेट