म. टा. प्रतिनिधी, नाशिक
दिवाळीच्या शुभमुहूर्तावर खरेदीचा योग साधत नाशिककरांची शहरात कोट्यवधींची उलाढाल झाली. यामुळे व्यापारीवर्गात आनंदाचे वातावरण होते. कपडे, मोबाइल, मिठाई, दिवाळी गिफ्ट्स आदी खरेदीसाठी बाजारपेठा फुलल्या होत्या. नोकरदारवर्गाला अगदी वेळेवर बोनस मिळाल्याने लक्ष्मीपूजनाला दुपारपर्यंत खरेदीसाठी बाजारात गर्दी होती.
ऐन दिवाळीत बाजारात महागाईचे सावट दिसून येत असले तरी सण उत्साहात साजरा व्हावा, यासाठी खरेदीत शहरवासीयांचा मोठा सहभाग होता. लक्ष्मीपूजनाला नवे कपडे घालण्याची प्रथा अनेकांकडे असल्याने या दिवसाच्या दुपारपर्यंत कापड बाजार, दहिपूल, मेनरोड आदी ठिकाणी गर्दी दिसून आली. गेल्या वर्षापेक्षा यंदा दहा टक्क्यांनी कपड्यांच्या किमतीत वाढ झाली असल्याचे विक्रेत्यांनी सांगितले.
आजच्या काळात डिजिटल खरेदी ही प्रतिष्ठेशी निगडीत बाब झाली आहे. आपल्याकडे चांगला मोबाइल, लॅपटॉप, टॅब असावा, अशी प्रत्येकाचीच इच्छा असते. या इच्छेला दिवाळीचा शुभमुहूर्त त्याचबरोबर ऑफर्स व डिस्काऊंटची जोड मिळत असल्याने डिजिटल शॉपीज् फुल्ल झाल्या होत्या. 'एक रुपया भरा आणि वस्तू घेऊन जा' अशा प्रकारच्या ऑफर्सही अनेक दुकानदारांनी
दिल्या होत्या. या ओढीने
ग्राहकवर्गानी दुकानात गर्दी केल्याचे दिसून आले. या ऑफर्समुळे ग्राहकांबरोबरच विक्रेत्यांनाही चांगलाच फायदा झाला.
दिवाळीची इतर खरेदी होत असली तरी सणासुदीत गोड खाल्याशिवाय सण साजरा झाला असे वाटत नाही. तसेच, सणाच्या पार्श्वभूमीवर देवाला गोड पदार्थाचा नैवेद्य दाखविण्यासाठी फराळाबरोबरच मिठाईला महत्त्व असते. मिठाईशिवाय दिवाळीच पूर्ण होऊ शकत नाही, इतके दिवाळी आणि मिठाई हे समीकरण झाले असल्याने साहजिकच मिठाईला मोठी मागणी होती. त्यामुळेच लक्ष्मीपूजनाला सुमारे हजारो किलो मिठाईची उलाढाल नाशिकमध्ये झाली. काजू कतली, ड्रायफूट बर्फी, अंजीर बर्फी, मावा पेढा या मिठायांना नाशिककरांची सर्वाधिक मागणी होती. दुधाच्या दरांमध्ये मागील वर्षापेक्षा काहीशी वाढ झाली असल्याने मिठाईच्या किमतीमध्येही वाढ झाली आहे. मात्र, या दरवाढीचा खरेदीवर फारसा परिणाम झाला नसल्याचे दिसून आले नाही.
दिवाळी गिफ्ट्स देण्याचा ट्रेण्डही अलिकडे जोरात असल्याने गिफ्ट्स खरेदी केली गेली. यामध्ये फुला-पानांच्या आकाराचे कॅण्ड्ल्स, कॅण्डल स्टॅण्ड, ड्रायफ्रूट बॉक्स, चॉकलेट बॉक्स व मिठाई बॉक्सला अधिक प्राधान्य देण्यात आले. अनेक स्वीट्सच्या दुकानांमध्ये या प्रकारच्या गिफ्ट्ससाठी खास व्यवस्थाही करण्यात आली होती. दिवाळीनिमित्त शहरात बाहेरगावचे विक्रेतेही आल्याचे चित्र बाजारात दिसून येत होते. या विक्रेत्यांनी रस्त्यावरच आपली दुकाने थाटली आहेत. शोरुमच्या तुलनेत कमी दरात या विक्रेत्यांकडे वस्तू मिळत असल्याने ग्राहकांनी येथेही खरेदी करण्यास पसंती दिली. शोभेच्या वस्तूंबरोबरच टाय, कुर्ते, शूज या आवश्यक वस्तू कमी किमतीत विकावयास आणल्याने महागाईशी दोन हात करण्याचे बळ मध्यमवर्गीयांना मिळाले. अनेक नोकरदारांचे बोनस उशिरा झाल्याने ऐनवेळी खरेदी केली जात असल्याचे मत यावेळी शहरातील विक्रेता वर्ग व्यक्त करीत होता.
ऑनलाइन शॉपिंग
दिवाळीनिमित्त ऑनलाइन शॉपिंग साईट्सवर मोठी सूट देण्यात आली होती. प्रत्येक वस्तूवर ऑफर्स देण्यात आल्याने नेटीझन्सच्या या साईट्सवर खरेदी करण्यासाठी उड्या पडल्या होत्या. घड्याळे, कपडे, मोबाइल्स, दिवाळी गिफ्ट्स, कॅण्डल्स इत्यादी वस्तूंवर सूट देण्यात आली होती. बाजारापेक्षा अनेक वस्तू कमी किमतीत मिळत असल्याने अनेकांनी याचा लाभ घेतला. तसेच सर्व वस्तू एकाच ठिकाणी मिळत असल्याने ऑनलाइन शॉपिंगला पसंती दिली जात असल्याचे दिसून आले.
मोबाइल अॅप डाउनलोड करा आणि राहा अपडेट