गणेशभक्तांना देखाव्यांचा आनंद लुटता यावा यासाठी जिल्ह्यात चार दिवस रात्री बारा वाजेपर्यंत ध्वनिक्षेपक आणि वाद्य वाजविण्यास प्रशासनाने परवानगी दिली आहे.
सर्वोच्च न्यायालयाच्या आदेशानुसार रात्री दहा ते सकाळी सहा या वेळेत कोणत्याही प्रकारची वाद्ये वाजविण्यास मनाई आहे. मात्र गणेशोत्सवात गौरी-गणपती तसेच देखाव्यांचा आनंद लुटण्यासाठी नागरिक रात्रीच घराबाहेर पडतात.
देखव्यांमध्ये वाद्य व ध्वनीक्षेपकच अधिक रंगत आणतात. मात्र, त्यावरच निर्बंध असल्याने मंडळे आणि गणेश भक्तांवरही मर्यादा पडतात. मंडळांना रात्री दहापर्यंतच देखावे सुरू ठेवता येतात. गणेशभक्तांचा हिरमोड होऊ नये यासाठी सरकारने या अटी काही प्रमाणात शिथील केल्या आहेत. त्यानुसार सोमवार (दि. २१), बुधवार (दि. २३), शनिवार (दि. २६) आणि विसर्जनाच्या दिवशी (दि. २७) रात्री बारा वाजेपर्यंत ध्वनिक्षेपक तसेच वाद्य वाजविण्यास मंडळांना परवानगी देण्यात आली आहे.
शहरामध्ये पोलिस आयुक्तांनी तर जिल्ह्यात जिल्हाधिकाऱ्यांनी या संदर्भातील आदेश काढले आहेत. ध्वनिक्षेपक तसेच वाद्य वाजविण्याची परवानगी देण्यात आली असली तरी त्याचा आवाज ४५ डेसीबलपेक्षा अधिक असू नये, ध्वनी प्रदूषणाबाबतच्या नियमांचे गणेश मंडळांनी पालन करावे, असे आदेशही देण्यात आले आहेत. प्रशासनाच्या या निर्णयाचे गणेश मंडळांकडून स्वागत होत आहे.
पावसामुळे लांबले मंडळांचे देखावे
सातपूर : गेले दोन दिवस सुरू असलेल्या संततधार पावसामुळे सिडको व सातपूरमधील अनेक मंडळांचे देखावे अद्याप अपूर्णवस्थेत आहेत. पावसाळा सुरू झाल्यापासून पावसाने पाठ फिरविल्याने बळीराजासह सर्वसामान्य हवालदिल झाले होते. परंतु, दोन दिवसांपासून सुरू असलेल्या पावसामुळे शहरातील रस्ते जलमय झाले आहेत. गणपती उत्सवात पाऊस सुरू असल्याने सिडको व सातपूरमधील गणपती मंडळांचे देखावे देखील पूर्ण झालेले नाहीत. बहुतांश मंडळांनी दुष्काळाचे सावट असल्याने साध्या पद्धतीने गणपती उत्सव साजरा करण्याचे ठरविले आहे. तर काही मंडळांनी गणपती उत्सावावर होणारा खर्च दुष्काळग्रस्त शेतकऱ्यांसाठी देण्याचा निर्णय घेतला आहे.
मोबाइल अॅप डाउनलोड करा आणि राहा अपडेट
