म. टा. प्रतिनिधी, नाशिक
काही दिवसांपूर्वी हजारोंच्या संख्येने आरोग्य विद्यापीठाच्या विरोधात उतरलेले विद्यार्थी मंगळवारी पुन्हा संवेदनशील झाले. आरोग्य विद्यापीठाचे कुलगुरू अल्पावधीतच निवृत्त होत असल्याने नर्सिंगच्या विद्यार्थ्यांच्या संवेदनशीलप्रश्नी त्यांनी हेतूपुरस्सर चालढकल चालविली असल्याचा आरोप अखिल भारतीय विद्यार्थी परिषदेने केला. राज्याच्या कानाकोपऱ्यातून आलेल्या सुमारे दोनशे विद्यार्थ्यांनी मंगळवारी विद्यापीठाच्या प्रवेशव्दारावर ठिय्या दिला.
नर्सिंगच्या अभ्यासक्रमात यंदा प्रवेश घेतलेल्या विद्यार्थ्यांच्या परीक्षा पध्दती आणि गुणदान पध्दतीचा मुद्दा गेल्या महिनाभरापासून आरोग्य विद्यापीठात गाजत आहे. आरोग्य विद्यापीठाने याप्रश्नी त्वरित निर्णय जाहीर करण्याची मागणी केली. याबाबत अद्याप विद्यापीठाकडून कुठलीही ठोस भूमिका जाहीर करण्यात आलेली नाही. अभ्यासक्रमात प्रवेश घेतेवेळी असणारी परीक्षा पध्दती वर्षअखेरीचा विद्यार्थ्यांना विश्वासात न घेता बदलण्यात आली व परिणामी विद्यार्थ्यांचे शैक्षणिक नुकसान झाल्याचा आरोप विद्यार्थ्यांनी केला.
मंगळवारी सकाळपासूनच विद्यार्थ्यांनी विद्यापीठाच्या प्रवेशव्दाराबाहेर गर्दी केली. विद्यार्थ्यांच्या या प्रश्नावर तोडगा काढण्यासाठी विद्यापीठाने समिती गठीत केल्याची माहिती यापूर्वी विद्यार्थ्यांना दिली होती. मात्र या माहितीत तथ्य नसून, अशी कुठलीही अधिकृत समिती विद्यापीठाने गठीत केलेली नसल्याचे आंदोलनकर्त्या विद्यार्थ्यांनी म्हटले आहे. सकाळपासून विद्यापीठाच्या प्रवेशव्दारावर उपाशीपोटी ठिय्या देणाऱ्या विद्यार्थ्यांची दिवसभर कुलगुरूंशी भेट होऊ शकली नाही. दुपारी चार वाजेच्या सुमाराला कुलगुरू विद्यापीठात आल्यानंतर विद्यार्थ्यांनी त्यांच्याशी संवाद साधण्याचा प्रयत्न केला. मात्र, विद्यार्थ्यांच्या आंदोलनाच्या पावित्र्यावर नाराजी व्यक्त करीत कुलगुरूंनी विद्यापीठाच्या प्रवेशव्दारापासूनच मागे वळणे पसंत केले. विद्यार्थ्यांच्या मागण्या विद्यापीठ विचारात घेत नसल्याच्या निषेधार्थ विद्यार्थ्यांनी विद्यापीठाचे गेट काही वेळ बंद करून ठेवत घोषणाबाजी केली.
निर्णय ६ सप्टेंबरला?
यापूर्वीही अभाविपच्या वतीने नर्सिंगच्या विद्यार्थ्यांच्या मुद्द्यासंदर्भात विद्यापीठाला वेळोवेळी निवेदन देण्यात आले होते. याची दखल घेतली न गेल्याने या विद्यार्थ्यांनी मोठ्या संख्येने जिल्हाधिकारी कार्यालयावर मोर्चा काढला होता. यानंतर विद्यापीठाने याप्रश्नी समिती गठीत केल्याची माहिती विद्यार्थ्यांना देण्यात आली होती. मात्र या माहितीत तथ्य नसल्याचे विद्यार्थ्यांचे म्हणणे आहे. यामुळे िवद्यार्थी वैतागले आहेत. आता दिनांक ६ सप्टेंबर रोजी विद्यापीठात अॅकेडमिक कौन्सिलची बैठकर पार पडणार असून, यात या प्रश्नावर काही तोडगा निघणार का? या प्रश्नाकडे विद्यार्थ्यांच्या नजरा लागल्या आहेत.
रितसर मार्गाने विद्यापीठ प्रशासनाच्या भेटीगाठी, निवेदनानंतरही विद्यापीठाने चुकीची धोरणे बदललेली नाहीत. विद्यार्थ्यांच्या रास्त मागणीचा विचार विद्यापीठ करीत नाही. पुढील टप्प्यात नाशिकपुरता मर्यादीत असलेले आंदोलन अधिक उग्र स्वरूपात राज्यभर करण्यात येईल. - अमोल गायकवाड, अखिल भारतीय विद्यार्थी परिषद, जिल्हा संघटक
मोबाइल अॅप डाउनलोड करा आणि राहा अपडेट
