म. टा. वृत्तसेवा, देवळाली कॅम्प
पर्यावरणाचा दिवसेंदिवस होत चाललेला ऱ्हास आणि त्यामुळे होणारे विविध प्रदूषण मानवी जीवनावर हानिकारक ठरत आहेत. त्यामुळे आपल्या विविध सणही साजरे करताना पर्यावरण जपणे गरजेचे झाले आहे. हे लक्षात घेऊन येत्या १५ दिवसांवर येऊन ठेपलेल्या गणेशोत्सवानिमित्त विद्यार्थ्यांनी आपल्या घरातील गणेशमूर्ती स्वतःच्या हाताने बनविण्याचा संकल्पही केला. नाशिककरांनीही प्लास्टर ऑफ पेरिसने बनविलेली मूर्ती वापरू नये, असे आवाहन विद्ार्थ्यांनी केले आहे.
भगूर येथील भगूर शिक्षण मंडळ संचालित नूतन प्राथमिक विद्यामंदिराने नेमकी हीच बाब लक्षात घेत हा उपक्रम राबविला. विद्यालयातर्फे विद्यार्थ्यांच्या मनावर बिंबविण्यासाठी शाडूमातीपासून गणेश मूर्ती बनविण्याची कार्यशाळा घेतली. या कार्यशाळेत २३० विद्यार्थ्यांच्या सहभाग घेतला. गणेशमूर्ती कार्यशाळेत प्रसिध्द मूर्तीकला प्रशिक्षक संदीप गायकवाड, विशाल शिरसाठ यांनी विद्यार्थ्यांना मार्गदर्शन केले. या उपक्रमात विद्यार्थ्यांसमवेत पालकांनीही सहभाग नोंदवीत नूतन विद्यामंदिर यांनी राबविलेल्या उपक्रमाचे कौतुक केले. मुख्याध्यापक ल. चं. जोशी, श. रा. वैद्य, के. डी. वाघ, जीवन गायकवाड, माधुरी कनौजिया आदी मान्यवरांनी भेटी देऊन विद्यार्थ्यांच्या कलागुणांना चालना मिळावी याकरिता प्रोत्साहन दिले. यावेळी मूर्ती प्रशिक्षक संदीप गायकवाड म्हणाले, 'ग्रामीण भागातील विद्यार्थ्यांना या गणेशमूर्ती बनविण्याच्या अनोख्या संकल्पनेला चांगला प्रतिसाद मिळत आहे.' विद्यार्थी ज्या प्रमाणे चित्रकलेत आपले कौशल्य दाखवतात त्याच प्रमाणे मूर्तीकलेतील त्यांचे कौशल्य पाहून आश्चर्य वाटते. असेही शिक्षण जीवन गायकवाड यांनी सांगितले.
मोबाइल अॅप डाउनलोड करा आणि राहा अपडेट