शनी मंदिर असो वा मारुती मंदिर किंवा कार्तिकस्वामी... अशा काही मंदिरांमध्ये प्रवेश मिळणार नसल्याने करायचाच नाही, अशी मानसिकता दुर्दैवाने महिलावर्गाची तयार झाली आहे. हा पूर्वापार चालत आलेला पगडा महिलांच्याच मनात भेदाभेद निर्माण करीत आहे. अशा मंदिरांमध्ये वर्षानुवर्षे पायच न ठेवल्याने ती जागा आपल्यासाठी नाहीच, असंच त्यांचं पक्कं मत बनलंय.
समानतेच्या या युगात भेदाभेदाला स्थान नसल्याची भावना महिलांच्या मनात खोलवर रुजविण्याची आवश्यकता आहे. महिलांनीही पुढे येऊन भेदाभेदाला मूठमाती देत अशा मंदिरांचे गाभारा उघडण्यासाठी एकजुटीने प्रयत्न करायला हवेत. 'जे आपल्या धर्मानं सांगितलंय तेच केलं पाहिजे. शनी, मारुती, कार्तिकस्वामी या मंदिरांमध्ये बायकांनी जाऊच नये. उगीच कशाला विषाची परीक्षा पाहायची?', असा संवाद साधणाऱ्या मीना (नाव बदललेलं आहे) त्या कित्येक महिलांच्या प्रतिनिधीच; ज्यांना आजही महिलांच्या काही ठराविक मंदिरांमधील प्रवेशाबद्दल भीती आहे.
नाशिक शहराची मूळातच धार्मिक शहर अशी ओळख आहे. त्यामुळे दुर्मिळ अशा वेद मंदिरापासून विविध प्रकारची मंदिरे नाशिकमध्ये पाहायला मिळतात. सर्वच मंदिरांमध्ये प्रवेश देण्याबाबत महिला आणि पुरुष असा भेदभाव केला जात नसला तरी शनी, मारुती, कार्तिकस्वामी या मंदिरांमध्ये जाण्यास अनेक महिलाच उत्सुक नाहीत. पूर्वापार पाळत आलेल्या परंपरांमुळेच आजही अनेक महिला काही ठराविक मंदिरांमध्ये न जाण्याची पथ्ये पाळत आहेत. हे चित्र पूर्णपणे बदलण्याची आवश्यकता आहे.
आधी बदला मानसिकता
शनीची वक्र दृष्टी महिलांवर पडणे चांगले नसते, त्यामुळे शनीचे जवळून व थेट दर्शन घेऊ नये. हनुमान ब्रह्मचारी असल्याने महिलांनी हनुमानाच्या मूर्तीला हात लावू नये. कार्तिक स्वामींना महिलांचा चेहरा पाहणे निषिध्द असल्याने महिलांनी कार्तिक पौर्णिमा वगळता कार्तिक स्वामी मंदिरामध्ये जाऊ नये, असे अनेक गैरसमज प्रचलित आहेत. कित्येक महिला या पलिकडे जाऊन विचारच करीत नसल्याने
आजही या मंदिरांमध्ये जाणे त्या टाळतात. मंदिर प्रवेशाबद्दल महिलांचीच मानसिकता बदलण्याची गरज आहे. पुरुषांना या मंदिरांमध्ये प्रवेश चालतो; परंतु आपल्याला नाही, हा पूर्वापार चालत आलेला पगडा महिलांच्याच मनात भेदाभेद निर्माण करत आहे. यावर प्रबोधन हा योग्य पर्याय आहे.
मोबाइल अॅप डाउनलोड करा आणि राहा अपडेट
