राज्यातील दहा स्मार्ट शहरांच्या निवडीसाठी राज्य सरकारने राज्यस्तरीय उच्चाधिकार समितीची स्थापना केली आहे. या समितीची बैठक मंगळवारी मुख्य सचिवांच्या अध्यक्षतेखाली होत आहे. या समितीपुढे नाशिकच्या स्मार्टसिटीचा प्रस्ताव मंगळवारी सादर केला जाणार असून, त्याची तयारी प्रशासनाने पूर्ण केली आहे. या बैठकीच्या पार्श्वभूमीवर शहरात मंगळवारी लोकप्रतिनिधींची होणारी बैठक स्थगित झाली आहे.
स्मार्टसिटीसंदर्भात ३१ जुलैपर्यंत केंद्र सरकारला प्रस्ताव सादर केले जाणार आहेत. त्यापूर्वी राज्यस्तरीय उच्चाधिकार समितीपुढे २८ व २९ जुलैला महापालिकांच्या प्रस्तावाचे सादरीकरण केले जाणार आहे. त्या पार्श्वभूमीवर आयुक्त डॉ. प्रवीण गेडाम यांच्याकडून प्रस्तावाची तयारी केली जात आहे.
मंगळवारी या प्रस्तावाचे मुख्य सचिवांपुढे सादरीकरण केले जाणार आहे. यात महापालिकेच्या २० गुणांचे मानाकंन केले जाणार आहे. त्यानंतरच हा प्रस्ताव केंद्राकडे सादर केला जाणार आहे. स्मार्ट सिटीच्या जनजागृतीसाठी महापालिकेच्या वतीने मंगळवारी महाकवी कालिदास मंदिरात लोकप्रतिनिधीसाठी स्मार्ट सिटीचे सादरीकरण केले जाणार होते. महापौरांसह नगरसेकांना या बैठकीसाठी आमंत्रित करण्यात आले होते. आयुक्तांना मुंबईला बैठकीसाठी जायचे असल्याने ही बैठक स्थगित करण्यात आली आहे.
मोबाइल अॅप डाउनलोड करा आणि राहा अपडेट