जिल्ह्यातील नाशिकसह सहा कृषी उत्पन्न बाजार समित्यांसाठी रविवारी मतदान झाले. नाशिक वगळता चांदवड, नांदगाव, येवला, सिन्नर व कळवण या पाच बाजार समित्यांसाठी ९८ टक्के मतदान झाले. आज, सोमवारी दुपारपर्यंत सर्व बाजार समित्यांचे निकाल जाहीर होतील. येवल्यात माजीमंत्री छगन भुजबळ, सिन्नरमध्ये वाजे-कोकाटे, चांदवडमध्ये कोतवाल-डॉ. कुंभार्डे, नांदगावमध्ये भुजबळ-पवार, कांदे यांच्यात चुरस आहे.
राजकीयदृष्ट्या अत्यंत महत्त्वाच्या नांदगाव आणि चांदवड कृषी उत्पन्न बाजार समितीची निवडणूक रविवारी शांततेत पार पडली. दोन्ही बाजार समितीत सरासरी ९८ टक्के मतदान झाले. आता कोण बाजी मारते हा दोन्ही तालुक्यात औत्सुक्याचा विषय बनला आहे. निकालासाठी आज (दि.२७) दुपारी १२ वाजेपर्यंत प्रतीक्षा करावी लागणार आहे.
नांदगावात प्रतिष्ठा पणाला
नांदगाव बाजार समितीत काँग्रेस, राष्ट्रवादी पुरस्कृत पॅनल आणि शिवसेना पुरस्कृत पॅनल यांच्यात लढत झाल्याने ही निवडणूक चुरशीची झाली. माजी मंत्री छगन भुजबळ, आमदार पंकज भुजबळ यांच्यासाठी ही निवडणूक प्रतिष्ठेची आहे. माजी आमदार अनिल आहेर हे समर्थपणे भुजबळ यांच्या पाठीशी उभे राहिल्याने राष्ट्रवादी आणि काँग्रेस युती पहायला मिळाली. मात्र राष्ट्रवादीचे ज्येष्ठ नेते बापूसाहेब कवडे यांनी शिवसेनेच्या माजी आमदार संजय पवार, सुहास कांदे यांच्या पॅनलची कास धरल्याने ही निवडणूक अधिक चर्चेचा विषय ठरली.
नांदगाव बाजार समितीत १८ जागा असून, ३७ उमेदवारांचे भवितव्य मतपेटीत बंद झाले आहे. सभापती तेज कवडे यांच्यासह प्रफुल्ल पारख, भास्कर कासार, रामचंद्र चव्हाण यांनी पुन्हा एकदा कौल मागितला आहे. काँग्रेस-राष्ट्रवादीकडे पुन्हा सत्ता जाणार की शिवसेना पुरस्कृत पॅनल परिवर्तन घडवणार हाच महत्त्वाचा मुद्दा आहे.
चांदवडमध्ये गुरु-शिष्य लढत
चांदवड बाजार समितीत अनेक वर्षांपासून माजी आमदार शिरीष कोतवाल यांच्या गटाचे वर्चस्व आहे. तब्बल सात वर्षांनी बाजार समितीची निवडणूक होत असल्याने उत्सुकता शिगेला पोहचली आहे. एकूण १८ जागांसाठी रविवारी मतदान झाले.
माजी आमदार उत्तमबाबा भालेराव आता कोतवाल यांचे व्याही झाल्याने ते कोतवाल यांच्यासोबत आहेत. डॉ. सयाजीराव गायकवाड देखील या शेतकरी पॅनल गटात कोतवाल यांच्याबरोबर आहेत. तर, शिरीष कोतवाल यांचे एकेकाळचे शिष्य डॉ. आत्माराम कुंभार्डे यांनी कोतवाल यांना आव्हान उभे करीत आमदार राहुल आहेर, नितीन आहेर, संपत वक्ते यांच्यासोबत परिवर्तन पॅनलद्वारे निवडणूक लढवली आहे. कोतवाल बाजी मारतात की परिवर्तन घडते याकडे तालुक्याचे लक्ष लागले आहे.
येवल्याकडे लक्ष
येवला : लक्षवेधी ठरलेल्या येवला कृषी उत्पन्न बाजार समितीच्या पंचवार्षिक निवडणुकीसाठी रविवारी १८ जागांसाठी ५० उमेदवारांचे भवितव्य मतदारांनी मतपेटीत बंद केले. सोसायटी, ग्रामपंचायत, व्यापारी, मापारी-मापाडी या गटातील एकूण २४५७ मतदारांपैकी २४२४ मतदारांनी (९८.६६ टक्के) मतदानाचा हक्क बजावला. आज, सोमवारी येवल्यातील सिद्धार्थ लॉन्सवर मतमोजणी होणार आहे.
येवला शहरातील विंचूर रोडलगतच्या जनता विद्यालयाच्या इमारतीबाहेर सकाळपासूनच दोन्ही पॅनलचे नेते व उमेदवार प्रवेशद्वारावर मतदारांना हात जोडून साद घालताना दिसत होते. दुपारी १२ ते २ या काळात केंद्रावर मतदारांच्या रांगा लागल्या होत्या. आमदार छगन भुजबळ यांनी 'प्रगती' पॅनल रिंगणात उतरवतांना त्यासमोर पवार-दराडे गटाने 'शेतकरी विकास' पॅनल उभा केला होता. जनता विद्यालयातील सहा मतदान केंद्रांवर अगदी चुरशीने मतदान झाले.
सिन्नरमध्ये रंगत
सिन्नर : सिन्नर बाजार समिती निवडणुकीत अभूतपूर्व मतदान होत आजी माजी आमदारांच्या प्रतिष्ठेच्या निवडणुकीत सोसायटी व व्यापारी गटात जवळपास ९८ टक्के मतदान झाल्याचा अंदाज आहे. मार्केट कमिटीच्या अद्यापपर्यंत च्या निवडणुकीपेक्षा या निवडणुकीत कमालीची चुरस दिसून आली. एक-एक मतदार खेचण्यासाठी दोन्ही गटांनी ताकद पणाला लावली होती. या संस्थेवर गेल्या २० वर्षांपासून वर्चस्व राखणाऱ्या माजी आमदार कोकाटेंपुढे आमदार राजाभाऊ वाजे यांनी आव्हान उभे करीत खऱ्या अर्थाने चुरस निर्माण केली. या संघर्षात कोकाटे यांनी पूर्ण ताकद पणाला लावत या निवडणुकीत उडी
घेतली. सिन्नर शहरासह तालुक्यात एकूण १३ मतदान केंद्रांवर मतदान झाले. वावी वेस येथील डॉ. बाबासाहेब आंबेडकर सभाग्रहात आज, सोमवारी सकाळी ८ वाजता मतमोजणी होणार आहे.
कळवणमध्ये चुरस
कळवण कृषी उत्पन्न बाजार समितीच्या १८ जागांसाठी ९८ टक्के मतदान झाले. एकूण १७१९ मतदारांपैकी १६९० मतदारांनी मतदानाचा हक्क बजाविला. शेतकरी विकास व किसान विकास आघाडी या दोन पॅनलमध्ये सरळसरळ लढत होत आहे. छत्रपती शिवाजी महाराज मंगल कार्यालय कळवण येथे आज, मतमोजणी होणार असल्याची माहिती निवडणूक निर्णय अधिकारी सविता शेळके यांनी दिली.
कळवण, कनाशी, अभोणा या तीन ठिकाणी बूथ उभारण्यात आले होते. या तीन बूथमध्ये १० मतदान केंद्र करण्यात आले होते. शेतकरी विकास पॅनलचे नेते जिल्हा परिषद सदस्य रवींद्र देवरे, जि. प सदस्य नितीन पवार, विद्यमान सभापती धनंजय पवार, पंचायत समिती उपसभापती अॅड. संजय पवार, कौतिक पगार आदी उपस्थित राहून मतदारांना आवाहन करत होते. तर किसान विकास आघाडीच्या वतीने भाजपा जिल्हाध्यक्ष विकास देशमुख, आमदार जे. पी. गावित, माकपा सरचिटणीस कॉ. हेमंत पाटील व शिवसेना जिल्हाप्रमुख कारभारी आहेर आदी उपस्थित होते.
मोबाइल अॅप डाउनलोड करा आणि राहा अपडेट
