आर्थिक दुर्बल घटकांमधील गरोदर महिलांच्या वैद्यकीय तपासण्या आणि पुरेशा औषधोपचारांभावी त्यांची होणारी हेळसांड रोखण्यासाठी सामाजिक बांधिलकी म्हणून मविप्रच्या मेडिकल कॉलेजने पुढाकार घेतला आहे. गरजू गरोदर महिलांच्या औषधोपचार अन् चाचण्यांसह त्यांच्या दोन प्रसूती मोफत करण्यात येणार आहेत.
मविप्रच्या डॉ. वसंतराव पवार मेडिकल कॉलेजमधील स्त्रीरोग व प्रसूती विभागाच्या वतीने यासाठी सर्व यंत्रणा प्रयत्न करणार आहे. गरोदर महिलांच्या पहिल्या दोन प्रसूती, सर्व चाचण्या आणि औषधोपचारांची जबाबदारीही संस्थेने घेतली आहे. यात नॉर्मल किंवा सिझेरिअन पध्दतीने डिलिवरी करण्यात येईल. ऐनवेळी वैद्यकीय सेवेची गरज पडल्यास सामान्य अतिसामान्य कुटुंबातील गरोदर महिलांना दवाखान्यात पोहचण्यासाठी वाहनाचा प्रश्न निर्माण होतो. या महिलांचा विचार करीत मेडिकल कॉलेजने त्यांना अॅब्युलन्सही उपलब्ध करून दिली आहे. प्रसूतीवेदना सुरू झाल्यानंतर गरोदर महिला किंवा नातेवाईकांनी मविप्र रुग्णालयाशी ९८२२४०२५०१ या क्रमांकावर संपर्क साधावा. या माध्यमातून रुग्णालयापर्यंत विनामूल्य रुग्णवाहिका उपलब्ध करण्यात येईल. प्रसूतीनंतर संबंधित महिलेस घरापर्यंत परतीची वाहन व्यवस्थाही मोफत देण्यात येणार आहे.
घरी बाळंतपणाचे प्रमाण ३० टक्के
अद्यापही आर्थिक परिस्थिती व अज्ञानाच्या परिणामी ग्रामीण भागात घरीच बाळंतपण करण्याचे प्रमाणही तब्बल ३० टक्के आहे. परिणामी माता-बालकांचा मृत्यू, बालकांमध्ये जन्मजात निर्माण होणारे व्यंग अशा उदाहरणांचेही प्रमाण बरेच आहे. सुरक्षित मातृत्व आणि नवजात सुदृढ बालकांसाठी शहरी, ग्रामीण तसेच आदिवासी- दुर्गम भागातील मातांचे बाळंतपण रुग्णालयात व्हावे, यासाठी राष्ट्रीय ग्रामीण आरोग्य अभियानांतर्गत शासनाकडून मोफत रुग्णवाहिकासेवा सुरू केली आहे. या सेवेमुळे माता व बालकांचे मृत्यूचे प्रमाण कमी झाले आहे. याच धर्तीवर आता मविप्रच्या खाजगी मेडिकल कॉलेजनेही या विषयात पुढाकार घेतल्याने याचा लाभ गरजू गरोदर महिलांना होणार आहे.
दुहेरी लाभ मिळणार
राष्ट्रीय ग्रामीण आरोग्य अभियानांतर्गत शासनाकडून जिल्ह्यात ही सेवा १२ ऑक्टोबर २०११ पासून सुरू आहे. या सेवेच्या परिणामी गत काही वर्षांच्या तुलनेत जिल्ह्यातील गरोदर मातांचे व बालकांचे मृत्यूचे प्रमाण कमी होण्यासही मदत झाली आहे. या अभियानांतर्गत जिल्हा रुग्णालयात २४ तास सेवा देणाऱ्या 'संदर्भसेवा रुग्णवाहिका कॉल सेंटर'चीही स्थापना करण्यात आली आहे. यासाठी (०२५३) २२३२२२१ या क्रमांकावर रुग्णाच्या नातेवाइकांनी संपर्क साधावा. या योजनेत गरोदरपणा व प्रसूती पश्चात ४२ दिवसांपर्यंत सर्व सेवा, शस्त्रक्रिया, औषधे, उपचार व आहार मोफत दिला जातो. जिल्ह्यातील १०३ प्राथमिक आरोग्य केंद्रांत १०१ रुग्णवाहिकांची व्यवस्था करण्यात आली आहे.
मोबाइल अॅप डाउनलोड करा आणि राहा अपडेट
