डॉ. बाळकृष्ण शेलार, नाशिकरोड
रिक्षाचालक म्हणजे प्रवाशांशी आरेरावी करणारा, प्रवाशांची लुबाडणूक करणारा असा बहुतांश जणांचा समज असतो. मात्र, याला छेद देणारी व प्रामाणिकपणे सेवा देणारी कृती रिक्षाचालकांकडून होणार आहे. भारतरत्न मागासवर्गीय सहकारी ग्राहक संस्थेने नाशिकरोड रेल्वे स्टेशन येथून प्री-पेड रिक्षा सेवा सुरू केली आहे. देशभरातून येणाऱ्या भाविकांना २४ तास सुरक्षित सेवा मिळणार आहे. प्रादेशिक परिवहन प्राधिकरणाच्या संमतीने आक्टोबर २०१६ पर्यंत ही सेवा सुरू राहणार असल्याची माहिती संस्थेचे व्यवस्थापकीय संस्थापक डॉ. गिरीश मोहिते यांनी दिली.
कुंभमेळ्यासाठी लाखो भाविक नाशिकला येणार आहेत. त्यांची फसवणूक होऊ नये, प्रवास सुखकर व सुरक्षित व्हावा हा या सेवेचा मुख्य उद्देश आहे. प्रवाशांना ऑनलाइन आरक्षण करता यावे म्हणून हेल्पलाईन सुरू करण्यात आली आहे. रेल्वेतून उतरण्यापूर्वीच प्री-पेड केबिनवर दूरध्वनीद्वारे बुकींग करता येईल. त्यासाठी आरटीओने मान्यता दिलेले दर आकारले जातील. प्रवाशांना जिल्हाधिकारी कार्यालय, तपोवन, आरोग्य विज्ञान विद्यापीठ, मुक्त विद्यापीठ, पांडव लेणे, शिंदे-पळसे अशा शहरातील ७० ठिकाणी (पाईंट) रिक्षातून जाता येईल.
मे आय हेल्प यू
प्री-पेड रिक्षा सेवेकरीता ऑनलाइन बुकींगसाठी ०२५३-२४६४०९९ या तर हेल्पलाईन व तक्रारीसाठी ७०८३६१०९९ या क्रमांकावर संपर्क साधता येईल. www.prepaidrickshawnashik.com ही वेबसाइटही सुरू करण्यात आली आहे. रेल्वे स्टेशनात विशेष केबिन तयार करण्यात आली असून ऑपरेटर नेमण्यात आले आहेत. त्यांना संगणक व प्रिंटर देण्यात आला आहे.
चारित्र्याला महत्त्व
ज्यांचे चारित्र्य स्वच्छ आहे, कागदपत्रे वैध आहेत, रिक्षाचा विमा उतरवला आहे असे रेल्वे स्टेशन व शहरातील २०० रिक्षाचालक या योजनेत सहभागी झाले आहेत. रिक्षाचालकांची कागदपत्रे व मोबाइल नंबर घेण्यात आले आहेत. त्यांना कायमचे फ्री सीमकार्ड देण्याबाबत आयडीया व एअरटेल या कंपन्यांशी बोलणी सुरू आहे. नगरसेवक सुनील वाघ आणि नाशिकरोड रेल्वे स्टेशन रॅक रिक्षा युनियनचे अध्यक्ष किशोर खडताळे यांचे विशेष सहकार्य उपक्रमाला लाभले आहे.
विशेष सॉफ्टवेअर
प्री-पेड सेवेसाठी आरटीओ अधिकारी जीवन बनसोड यांच्या मार्गदर्शनाखाली सॉफ्टवेअर तयार करण्यात आले आहे. संस्थेचे प्रितम दातरंगे, मयूर बोडके हे नाशिकरोडला २४ तास सेवा देतील.
विभागीय आयुक्त एकनाथ डवले यांनी कुंभमेळा निधीतून सीसीटीव्ही आणि पारदर्शी फायबर केबिन देण्याचे मान्य केले आहे.
महिला प्रवाशांना रात्रीही इच्छित स्थळी सुरक्षितपणे जाता यावे यासाठी रेल्वे पोलिस, शहर वाहतूक शाखा, आरटीओ आणि संस्थेचे हेल्पलाईन नंबर देण्यात आले आहेत. ही सेवा सचोटीने चालवून प्रवाशांच्या विश्वासास पात्र ठरेल. - डॉ. गिरीश मोहिते
सिस्टीम
प्रवाशांनी किमान अर्धातास आधी फोनवर बुकिंग करावे. रेल्वे स्टेशनवर उतरल्यानंतर प्री-पेड केबीनमध्ये अॅडव्हान्स पैसे भरावे. प्रवाशांना दोन पावत्या दिल्या जातील. त्यात रिक्षाचा नंबर व चालकाचे नाव असेल. इच्छित स्थळी पोचल्यानंतर प्रवासी दुसऱ्या पावतीवर चालकाला सही देईल. ती पावती केबिनला दाखवल्यावरच रिक्षाचालकाला त्याचे पैसे मिळतील. मीटरनुसारच दर आकरले जातील. रात्री बारा ते पहाटे पाच दरम्यान २५ टक्के जास्त दर असेल.
मोबाइल अॅप डाउनलोड करा आणि राहा अपडेट
