कॉलेज प्रतिनिधी म्हणजेच जीएस निवडणूक पुन्हा मतदान तत्त्वावर घेणार असल्याचा राज्य सरकारचा प्रस्ताव प्रलंबित आहे. लवकरच ही प्रक्रिया पूर्ण होऊन गेल्या वीस वर्षांपूर्वी बंद केलेल्या जीएस निवडणुकांचे पडघम कॉलेज कॅम्पसमध्ये गुंजणार असल्याचे संकेत मिळत आहेत. सर्व राजकीय पक्षांच्या विद्यार्थी सेनांची याला अनुमती असली, तरी या धोरणावर तरुणाईच नेमकं काय मत हे जाणून घेण्यासाठी 'महाराष्ट्र टाइम्स'तर्फे एचपीटी आरवायके कॉलेजमध्ये 'मटा डिबेट'चे आयोजन करण्यात आले होते. यात कॉलेजियन्सच्या हक्काचा विद्यार्थी प्रतिनिधी जीएसची निवडणूक मतदान तत्त्वावर व्हावी का? त्याच्या अटीशर्ती काय असाव्यात? प्रचार, आचारसंहिता कशी असावी? एकूणच निवडणूक तरुणाईच्या दृष्टिकोनातून कशी असावी यावर कॉलेजियन्सचे मत जाणून घेण्यात आले.
निवडणूक व्हायलाच हवी
बऱ्याचदा जीएस कोण हेच माहीत नसतं. निवडणुकीनेच जीएसची निवड करावी. उमेदवार योग्य आहे की नाही यासाठी अगोदर एक कॅम्पेन घेण्यात यावे. त्यात त्याने कॉलेजियन्स समोर स्वत:चे व्यक्तिगत गुण सादर करावेत. स्थानिक स्वराज्य संस्थेपासून तर दिल्लीपर्यंत निवडणुका होत असतील तर भारताची शान अन् मान असणाऱ्या तरुणांच्या प्रतिनिधीसाठीही निवडणूक व्हायलाच हवी.
- भक्ती आठवले, एसवाय, राज्यशास्त्र
सीआरमधून निवडा जीएस
जीएस निवडणूक वीस वर्षांनंतर पुन्हा घ्यायची असा सरकारचा प्रस्ताव आहे. वीस वर्षांमध्ये अनेक घडामोडी घडल्या. सध्याची तरुणाई ही सोशल युगाकडे वाटाचाल करणारी असली तरी कोणत्याही घटनेचा वास्तव्याशी संबंध जोडण्यात येऊ शकतो. सिनेमांचा प्रभाव हा कट्ट्यावर नेहमीच अनुभवायला मिळतो. सिनेस्टाइल हाणामाऱ्या नेहमीच कॉलेजात होत असतात. याचा प्रभाव निवडणुकांमध्ये दिसू शकतोच. सीआर मतदान पद्धतीने निवडल्यास कमी उमेदवार असल्याने मतांतर व मतभेद कमीच असतील.
- विवेक चित्ते, जर्मन भाषा विभाग
नियमांची गरज
जीएस निवडणुकीतही काही नियम असावेत. उमेदवार व व्होटर्स यांनी विद्यार्थी दशा जपत ही निवडणूक घेतल्यास उत्कृष्ट विद्यार्थी
नेता निवडून देण्यास मदत होईल. जीएस निवडणुकीत सर्वांना संधी दिली जावी. तरुणाईला मतदानाचा अधिकार असल्याने कॉलेजस्तरावर व्होट करायला मिळाल्यास आनंद द्विगुणीत असेलच. आपल्यातील गुण व लीडरशीप जोपासता येईल.
- गौरी जाधव, एसवाय, कॉम्प्युटर सायन्स.
राजकीय हस्तक्षेप नको
जीएस निवडणुकीत राजकीय विद्यार्थी संघटनांचा समावेश नसावा. विद्यार्थ्यांच्या प्रतिनिधीची निवड त्यांनी करू द्यावी. अर्थातच यात छुपा पाठिंबा दिला जाईलच यात शंका नाही. परंतु, कॉलेज कॅम्पस यामुळे दूषित होऊ नये. यासाठी प्रत्येक इयरचा सीआर मतदान पध्दतीने विद्यार्थ्यांना निवडू द्यावा. यामुळे जास्त उमेदवारांचे मतभेद जाणवणार नाहीत व इलेक्शन सुरळीत पार पडेल.
- निखील पाटील, एसवाय, राज्यशास्त्र
स्कॉलर पध्दत बदलावी
कॉलेजमध्ये जीएसपदासाठी इलेक्शन व्हावे याची उत्कंठा अनेक वर्षांपासून आहे. दरवर्षी अनेक अफवांचे वारे कॉलेजमध्ये वाहत आहेत. स्कॉलर तत्त्वावर जीएस निवड केली जात असल्याने विद्यार्थ्यांनाच विद्यार्थी प्रतिनिधी कोण? समस्या मांडायच्या तरी कुठे असा संभ्रम असायचा. अनेकदा काहींना जीएस व्हायची इच्छा असून, ते होऊ शकत नव्हते. या इलेक्शनमुळे सर्वांना समान संधी मिळेल. जीएस निवडणुकीत होणारे वाद टाळण्यासाठी सीआरची निवड करून त्यातून जीएसची निवड करावी.
- निखील गुरव, बीए, इतिहास
हक्काचा नेता मिळेल
तरुणाई जर देशाचा पंतप्रधान निवडू शकते, तर कॉलेजचा प्रतिनिधी त्यांनीच निवडायला हवा. यासाठी जीएस इलेक्शन व्हायलाच हवे. फस्ट क्लास पास झालेल्या सर्व इच्छुकांनी उमेदवारी अर्ज भरू द्यावेत. इतर काही समस्यांचे पांघरूण घालत अटीशर्ती लावल्या तरी सरकारी इलेक्शमध्ये वोटर्स मॅनेज होणं, कुरघोडी करणं हे घडतचं ते इथेही घडेल एवढंच. इलेक्शनचे पडसाद कसेही उमटू देत पण, विद्यार्थ्यांना त्यांचा हक्काचा नेता मिळेल.
- आशिष कुलकर्णी, एसवाय, राज्यशास्त्र
सर्वांना संधी मिळावी
जीएस हा विद्यार्थी प्रतिनिधी असतो. फक्त पुस्तकी ज्ञान असणाऱ्यांना यात संधी नसावी. सामाजिक दृष्टिकोन, व्यक्तिमत्त्व, कम्युनिकेश स्किल्स याचाही विचार उमेदवार निवडतांना व्हावा. मतदान पध्दतीवर निवडणूक घेतल्यास सर्वांनाच आपला प्रतिनिधी निवडता येईल. जीएसची निवड ही विद्यार्थी संमतीनेच व्हायला हवी.
- पूर्वा गोडबोले, एसवाय, कॉम्प्युटर सायन्स
मतदानानेच निवड करावी
मेरिट पातळीवर जीएस इलेक्शन घेतले जाते. यामध्येही अनेकदा जीएस होण्यासाठी ही स्कॉलर मंडळी आमिष दाखवत सीआर्स मॅनेज करतात. मग, त्यांचा जीएसपदाचा फायदाच काय? ते तर राजकारण्यांहून बेहत्तर फक्त गुणगौरव आणि डेज् मध्येच कॉलेजियन्स समोर येतात. असे असेल तर आमचा नेता आम्हाला निवडू द्यावा. सध्याची तरुणाई प्रॅक्टीकल आहे. निवडणुकींना काही ठराविक बंधने घालत जीएस निवडणूक मतदान तत्त्वावरच घेणे योग्य असेल.
- चेतन लिंडाईत, टीवाय, बायोटेक
खबरदारी पाळावी
जीएस इलेक्शनमध्ये उमेदवार व कार्यकर्ते यांची मानसिकता जपणे महत्त्वाचे आहे. अर्थातच विद्यार्थी प्रतिनिधी विद्यार्थ्यांच्या हक्कानेच निवडायला हवा. उमेदवारानेही आपल्या प्रतिस्पर्ध्याला आपल्याकडून वा कार्यकर्त्यांकडून त्रास होणार नाही याची खबरदारी पाळावी. जीएस निवडणुकांचे पडघम वाजायलाच हवे. कॅम्पसमध्ये मानसिकतेच्या जोरावर आपला प्रतिनिधी निवडण्यासाठीची बौध्दिक क्षमता विद्यार्थी व्होटर्सची देखील वाढेल.
- क्लिंटन डी'सूझा, एसवाय, मानसशास्त्र
नेतृत्व विद्यार्थी हिताचे असावे
मेरिट पातळीवरच्या जीएसला प्रातिनिधीक स्तरावरचे ज्ञान नसतं. पुस्तकी चाकोरीबाहेरील ज्ञान हे अनेकांची जमेची बाजू असते. त्यामुळे अशा विद्यार्थ्यांना संधी मिळायलाच हवी. देश चालवणारी अनेक नेतेमंडळी खोट्या डिर्गींवर शिक्षण मंत्रीपद घेतात तर, एखादा अभ्यासात कमी पण नेतृत्व व विद्यार्थी हितात अग्रेसर असेल तर त्याला संधी द्यायलाच हवी. जीएस इलेक्शन पुन्हा मतदान पध्दतीवरच व्हायला हवे.
- सुनील भोसले, एसवाय,अर्थशास्त्र
चर्चेतील लक्षवेधी मुद्दे
जीएस निवडणूक ही सर्व विद्यार्थ्यांचे मतदान घेऊनच व्हायला हवी.जीएस निवडणुकीच्या उमेदवारांना अटीशर्ती असाव्यात, स्कॉलर तत्त्वावर निवडणूक नसली तरी उमेदवार शैक्षणिक मूल्यांसमवेत इतरही गोष्टींमध्ये अग्रेसर असावा.साठ टक्क्यांपेक्षा अधिक गुण मिळवणाऱ्या विद्यार्थ्यास उमेदवारी अर्ज देण्यात यावा.भारतीय संविधानात सर्वांनाच मतदानाचा हक्क बहाल केला गेला आहे. कॉलेज पातळीवर पुन्हा जीएस निवडणुका घेतल्यास मतदानाचा टक्काही वाढेल.जीएस निवडणुकीदरम्यान कॉलेज कॅम्पसमध्ये प्रचार करण्याऐवजी लेक्चर्स संपतांना फक्त उमेदवारानेच म्हणणे मांडावे.राजकीय पक्षांचा या जीएस निवडणुकीत सहभाग नसावा.उमेदवार व कार्यकर्ते यांनी आपली मानसिकता सांभाळत विद्यार्थी दशेत असल्याचे भान राखत वीस वर्षांपूर्वी घडलेल्या घटनांची पुनरावृत्ती टाळावी. याची जबाबदारी सर्वस्वी कॉलेजियन्सनेच घ्यावी. उगीच सरकार वा विद्यापीठास दोषी ठरवू नये.जीएस निवडणुकीतही आचारसंहिता असावी.जीएसची निवड करताना अनेक उमेदवार अर्ज करतील. यात मतभेद, राजकारण अनेक फाटे फुटून कदाचित भांडणे होऊ शकतात. त्याऐवजी त्या त्या वर्गातील विद्यार्थ्यांचे मत घेत सीआरची निवड करावी. त्या सीआरमधून मग जीएसची निवड करणे योग्य ठरेल.शाळेचा मॉनिटर जसा ऑन दि स्पॉट निवडला जातो तसाच जर सीआरही निवडला गेला तर, प्रचार, आचारसंहिता वगैरे कसलीच गरज भासणार नाही.जीएस हा निवडणूक पध्दतीने असो वा स्कॉलर तत्त्वावर... कॉलेज इव्हेंट, कल्चरल मिटिंग्ज्, गुणगौरव समारंभ याखेरीज तो कुठेही कॉलेजियन्यसच्या समोर येत नसतो. मग, ही निवडणूक वगैरे घेणे व्यर्थ वाटते.जीएस निवडणूक व्हावी असे असले तरी कुठे ना कुठे कॉलेज स्तरावर राजकारणाचा शिरकाव होणारच. कॉलेजचा वेळ, प्रशासन इतर विद्यार्थी यासाठी हा सगळा कालावधी परिणामकारक ठरेल.
मोबाइल अॅप डाउनलोड करा आणि राहा अपडेट
