मनसे कार्यकर्त्यांनी गुरुवारी रात्री इंदिरानगर अंडरपास येथील बॅरिकेटिंग हलवून हा रस्ता वाहतुकीसाठी खुला केला. मात्र, पोलिसांनी शुक्रवारी सकाळपासूनच तो पुन्हा बंद केला आहे. हा बदल नागरिकांच्या सोयीसाठीच असून, सहकार्य करावे असे आवाहन पोलिसांनी केले आहे.
मुंबई-आग्रा महामार्गावरील गोविंदनगर येथील अंडरपास वाहतुकीसाठी बंद करण्यात आला आहे. मात्र, यामुळे इंदिरानगरकडून येणाऱ्या वाहनधारकांना गोविंदनगर किंवा मुंबई नाक्याकडे थेट जाता येत नाही. त्यांना लेखानगरमार्गे जावे लागते. या पर्यायी मार्गामुळे नागरिकांना दीड ते दोन किलोमीटरचा फेरा पडत आहे. म्हणूनच त्यास भाजप, मनसे पाठोपाठ आम आदमी पार्टीनेही विरोध दर्शविला आहे. हा अंडरपास लवकरात लवकर सुरू करावा, अशी मागणी संघटना तसेच नागरिकांकडून होत आहे.
अधिकाऱ्यांवर गुन्हे दाखल करा
आम आदमी पक्षाच्या कार्यकर्त्यांनी शुक्रवारी दुपारी अंडरपासजवळ एकत्रित जमून निदर्शने केली. दूरदृष्टी नसलेले लोकप्रतिनिधी, अधिकारी यांच्या चुकांचे परिणाम जनतेने का भोगावे असा प्रश्न यावेळी उपस्थित करण्यात आला. या चौकात त्वरित सिग्नल यंत्रणा सुरू करावी, अशी मागणी करण्यात आली. याबाबतचे निवेदन महापालिका आयुक्त तसेच सार्वजनिक बांधकाम विभागाच्या अधिकाऱ्यांना देण्यात आले. इंदिरानगर अंडरपास येथील वाहतूक समस्येबाबत जनहीत याचिका दाखल करू, असा इशारा जिल्हा समन्वयक जितेंद्र भावे, जगबीर सिंग, राजू आचार्य आदींनी दिला आहे. या अंडरपासची संकल्पना ज्यांनी मांडली, ज्यांनी प्लॅन तयार केला तसेच हा प्लॅन ज्या अधिकाऱ्यांनी प्रत्यक्षात उतरविला त्या सर्वांवर फौजदारी गुन्हे दाखल करावेत, अशी मागणी 'आप'ने केली आहे.
अर्जाबाबत आक्षेप
अंडरपासबाबतचा आक्षेप नोंदविण्यासाठी पोलिसांनी या मार्गावरून ये-जा करणाऱ्या वाहनधारकांसाठी १५० ते २०० अर्ज उपलब्ध करून दिले. मात्र, या अर्जावर हो किंवा नाही या दोन पर्यायांव्यतिरिक्त अन्य पर्यायच उपलब्ध नसल्याने नागरिकांनी अर्जावरच आक्षेप घेतला आहे. सायंकाळी नगरसेविका दीपाली कुलकर्णी, यशवंत निकुळे यांसह परिसरातील नागरिक मोठ्या संख्येने या अंडरपासच्या परिसरात एकत्रित जमले होते. येथील वाहतूक पोलिसांकडून त्यांनी अर्ज घेतले. या पोलिसांकडे अर्ज आहे हे कुणाला माहितही नव्हते. विशेष म्हणजे हजारो वाहनधारकांसाठी केवळ दोनशे अर्ज देण्यात आले. अर्जावर नागरिकांचा अभिप्रायच घेतला नसल्याने या अर्जातून काय साध्य होणार असा प्रश्न नागरिकांनी उपस्थित केला आहे.
नागरिकांच्या हितासाठीच काही कालावधीसाठी अंडरपास बंद ठेवण्याचा निर्णय घेतला आहे. केवळ प्रायोगिक स्तरावर सध्या त्याची अंमलबजावणी सुरू आहे. या बदलामुळे वाहतूक सुरळीत होण्यास मदत झाली नाहीच तर अंडरपास पुन्हा सुरू करता येईल. परंतु, नागरिकांनी संयम बाळगून सहकार्य करावे. प्रकाश पेट्रोल पंपप्रमाणेच येत्या १५ दिवसांमध्ये लेखानगर मार्गावरही यूटर्नची व्यवस्था करण्यात येणार आहे.
- पंकज डहाणे, पोलिस उपायुक्त, वाहतूक विभाग
मोबाइल अॅप डाउनलोड करा आणि राहा अपडेट
