सिंहस्थ कुंभमेळ्यात साध्वींना वेगळी जागा मिळावी, यासाठी प्रयत्नशिल असलेल्या सर्वेश्वरी महादेव वैकुंठधाम मुक्तिद्वार आखाडा (परी) च्या प‌‌ीठाधिश्वर त्रिकाल भवंता यांनी अखिल भारतीय आखाडा परिषदेचे अध्यक्ष महंत ग्यानदास यांच्याविरोधात थेट पोलिसात जाण्याचा निर्णय घेतला आहे. ग्यानदास यांच्याविरोधात विनयभंगाची तक्रार दाखल करण्याचा निर्णय साध्वी यांनी बोलून दाखविला आहे. या प्रकरणी प्रशासनाच्या भूमिकेवरही त्यांनी तोंडसुख घेतले आहे.
श्री गंगा गोदावरी पंचकोठी संघाच्या ध्वजारोहणप्रसंगी साध्वी त्रिकालभवंता व महंत ग्यानदास यांच्यात मुख्यमंत्र्यांसमोरच सभामंडपात खडाजंगी झाली. साध्वींच्या हातातील माईक बंद असल्याने संन्याशांमधील वाद भक्तापर्यंत पोहचला नाही. साध्वींनी आंघोळीसाठी तसेच राहण्यासाठी वेगळी जागा देण्याची मागणी महंत ग्यानदास यांच्याकडे केली होती. मात्र, त्यांना साधुग्राममध्ये वेगळी जागा देणे शक्य नसल्याचे ग्यानदास महाराजांनी सांगितले होते. साध्वींना साधुग्राममध्ये जागा दिल्यास अग्नी आखाड्यातील साधुमहंत सहन करणार नाही, अशी भूमिका महंत ग्यानदास यांनी घेतली. साध्वी त्रिकालभवंताही या जागेसाठी आग्रही असून, त्यांनी महंत ग्यानदास यांच्यावर शोषणाचा आरोप केला आहे. साध्वी पोलिसात तक्रार करणार असून, ग्यानदास यांना जेलमध्ये टाकण्यात यावे, अशी मागणीही करणार आहेत. असे त्यांनी 'मटा'शी बोलताना सांगितले.
आज करणार पोलिसात तक्रार
महंत ग्यानदास हे साध्वींचे शोषण करतात असा आरोप करून त्यांच्याविरोधात पोलिसात लेखी स्वरूपात तक्रार देणार असल्याचे 'मटा'शी बोलताना सांगितले. प्रशासनाने महंत ग्यानदास यांच्यावर कारवाई करावी, यासाठी मी वाट पहात होते. परंतु, प्रशासन मूग गिळून गप्प बसले आहे, त्यांच्यावर कोणतीही कारवाई होत नाही. त्यामुळे गुरुवारी पोलिसात लेखी तक्रार देणार असल्याचे त्यांनी स्पष्ट केले.
मोबाइल अॅप डाउनलोड करा आणि राहा अपडेट
