नाशिक महापालिकेत सत्तेत असलेल्या मनसे नगरसेवकांची आपल्याच पक्षाकडून न्याय मिळत नसल्याची भावना झाली आहे. त्यातूनच काही मंडळींवर कामे करून घेण्यासाठी विरोधकांची मदत घेण्याची वेळ आली आहे. नाशिकरोड येथील प्रभाग क्रमांक ५९ मधील नगरसेविका संगीता गायकवाड यांनी न्याय मिळावा यासाठी विरोधी पक्ष नेत्यालाच पत्र लिहून महापालिकेच्या विभागवार कामांवर कोणाचे नियंत्रण आहे, असा सवाल उपस्थित केला आहे. सोबतच विभागवार निधीबाबत योग्य तो निर्णय घेण्याची याचना केली आहे. गायकवाड यांच्या या पत्राने विरोधकांना आयतेच कोलीत मिळाले असून, निवडणूक काळात मनसेवर पुराव्यानिशी टीका करण्याची नामी संधी मिळाली आहे.
मनसे सत्तेत असली तरी महापालिकेचा कारभार सध्या नेमके कोण हाकतंय याचा थांगपत्ता लागत नसल्याचे चित्र आहे. महापालिका निवडणुकांना दीडच वर्षांचा अवधी शिल्लक राहिला असतांना विकासकांमासाठी निधी मिळत नसल्याची स्थिती आहे. सिंहस्थ कामे वगळता कोणतीच कामे होत नसल्याने सत्ताधारी नगरसेवकांमध्ये प्रचंड अस्वस्थता आहे. अनेक नगरसेवकांची पक्षाला जय महाराष्ट्र करण्याची मानसिकता झाली आहे. मनसेच्या काही नगरसेवकांवर वंसत गिते समर्थक असल्याचा शिक्का लागल्याने पक्षाकडून त्यांच्याकडे साफ दुर्लक्ष केले जात आहे. त्यामुळे हे नगरसेवक सैरभैर झाले आहेत. शिक्षण समितीच्या निवडणुकीतही त्याचा अनुभव आला आहे. सत्ताधाऱ्यांचा प्रशासनावर वचक नसल्याने अधिकारी कोणत्याच नगरसेवकाला जुमानत नसल्याची वस्तुस्थिती आहे.
मनसेच्या प्रभाग क्रं. ५९ मधील नगरसेविका आणि स्थायी समिती सदस्या संगीता गायकवाड यांनी रस्त्यांच्या कामांसाठी मंजूर निधीबाबत शंका उपस्थित करीत स्वपक्षाला घरचा अहेर दिला आहे. महापौरांसह विरोधी पक्षनेत्यांनाच पत्र लिहून त्यांनी पालिकेतील कारभाराबाबत शंका उपस्थित केल्या आहेत. रस्त्यांच्या दुरूस्तीसाठी २५ कोटींचा निधी मंजूर करण्यात आला असून, त्याचे विभागवार वाटप करण्यात येणार असल्याचे पत्रात म्हटले आहे. हा निधी नगरसेवकांच्या सुचनेनुसार खर्च होत नसून खर्च केलेल्या तपशील प्रशासन देत नसल्याचा आरोप केला जात आहे. या कामांवर कोणाचे नियंत्रण असते, अशी विचारणाही त्यांनी केली आहे. याबाबत आपण योग्य तो निर्णय घ्यावा, असे आर्जव त्यांनी विरोधी पक्ष नेत्या कविता कर्डक यांच्याकडे केले आहे. त्यामुळे मनसेच्या कारभारावरच आता प्रश्नचिन्ह उपस्थित होत असून, नगरसेवकांना न्यायासाठी विरोधकांकडे जाण्याची वेळ आल्याबद्दल आश्चर्य व्यक्त केले जात आहेत.
मोबाइल अॅप डाउनलोड करा आणि राहा अपडेट