म. टा. प्रतिनिधी, नाशिक
अकरावी प्रवेशासाठी पहिल्या मेरीट लिस्टने विद्यार्थी अन् पालकांच्या नजरा विस्फारल्यानंतर शुक्रवारी प्रकाशित होणाऱ्या दुसऱ्या मेरीट लिस्टवर विद्यार्थ्यांची भिस्त आहे. पहिल्या यादीत थोड्याहून प्रवेश हुकलेल्या हजारो विद्यार्थ्यांना अपेक्षित कॉलेजांमध्ये प्रवेश मिळण्याची आशा आहे. सेकंड मेरीट लिस्ट दुपारी ४ वाजता जाहीर होणार आहे.
सोमवारी पहिली मेरीट प्रसिध्द झाल्यानंतर बहुतांश विद्यार्थ्यांचा अपेक्षाभंग झाला. यंदा सायन्स शाखा ओपन कॅटॅगिरीसाठी ही मेरीट लिस्ट ९३.८० टक्क्यांवर क्लोज झाली. इतर मध्यवर्ती कॉलेजेसमध्येही थोड्याफार फरकाने याच आलेखानुसार हे मेरीट लिस्टने उच्चांक गाठला होता.
समीकरणे बदलणार?
पहिल्या मेरीट लिस्टसाठी लावलेल्या अंदाजानुसार विद्यार्थ्यांनी प्रवेशाचे अंदाज बांधले होते. मात्र, यंदा या यादीतील वाढलेल्या उच्चांकामुळे अनेक विद्यार्थ्यांना त्यांचे प्रवेशाचे आडाखेही बदलणे भाग पडले आहे. पहिल्या यादीत नाव नसल्याने ८५ टक्क्यांवर मार्कस मिळविलेल्या विद्यार्थ्यांनाही आघाडीच्या कॉलेजेसमधून पहिल्या फेरीत बाहेर पडावे लागले.
कॉलेजांच्या नफेखोरीकडे डोळेझाक
अकरावीच्या प्रवेशांसाठी मोठ्या प्रमाणावर सुरू झालेल्या स्पर्धात्मक वातावरणाचा सर्वाधिक फायदा शहरातील काही कॉलेज घेत आहेत. छुप्या मार्गाने देणग्या घेऊन दिल्या जाणाऱ्या प्रवेशांचे रेटही पालकांमध्ये दबक्या आवाजात चर्चिले जात आहेत. कॅपिटेशन अॅक्टची अंमलबजावणी होत नसल्याची विद्यार्थी संघटनांची तक्रार आहे. याच मुद्यावरून छात्रभारती आणि इतर विद्यार्थी संघटनांनी काही दिवसांपासून शिक्षण उपसंचलकांकडे पाठपुरावा केला होता. मात्र, देणगी विरोधातल्या तक्रारीच येत नसल्याने कारवाई करण्यात उपसंचालक कार्यालय असमर्थतता दर्शवित आहे. हे कारण तकलादू असून प्रशासनाची इच्छाशक्ती कमी असल्याचा आरोप विद्यार्थी संघटनांनी केला आहे. विद्यार्थी आणि पालकांनीही कॉलेजेसच्या नफेखोरीच्या विरोधात पुढे यावे आणि दोषी कॉलेजेसवर फौजदारी गुन्हे दाखल करण्यासाठी पुढाकार घ्यावा, असे आवाहन छात्रभारतीने केला आहे.
प्रवेशासाठी सारे काही !
दुसरी गुणवत्ता यादी शुक्रवारी (दि.२६) जाहीर होणार आहे. या यादीनुसार रविवारपर्यंत (दि. २८) विद्यार्थ्यांना प्रवेश घेता येणार आहेत. पहिल्या यादीने चढविलेला आलेख अपेक्षेप्रमाणे उतरविण्यासाठी दुसरी यादी उतारा ठरण्याची अपेक्षा पालकांना आहे. असेही न झाल्यास पाल्याला हव्या त्या कॉलेजमध्ये प्रवेश मिळवून देण्यासाठी काही पालकांनी मॅनेजमेंट कोट्याद्वारे प्रवेश मिळविण्याची तयारी चालविली आहे. त्यासाठी लोकप्रतिनिधी आणि संस्था चालकांना साकडे घातले जात आहे.
मोबाइल अॅप डाउनलोड करा आणि राहा अपडेट