प्लॅटफॉर्म एक सिंहस्थ गाड्यांसाठी राखीव; नियमित गाड्यांना फटका
म. टा. प्रतिनिधी, नाशिकरोड
कुंभमेळ्यातील पर्वणी काळात नाशिकरोडचा पहिल्या क्रमांकाचा प्लॅटफॉर्म विशेष गाड्यांसाठीच राखीव राहणार आहे. त्या नियोजनानुसार एकवरून नियमित धावणाऱ्या नऊ गाड्या गुरुवारपासून फ्लॅटफार्म क्रमांक दोनवरून ये-जा करण्यास प्रारंभ झाला आहे. मात्र, यामुळे नाशिककरांची दमछाक वाढल्याने त्यांनी नाशिकच्या गाड्या प्लॅटफॉर्म एकवरूनच सोडण्याची आग्रही मागणी केली आहे.
मध्य रेल्वेचे महाव्यवस्थापक सुनीलकुमार सूद, भुसावळ मंडलचे डीआरएम सुधीरकुमार गुप्ता यांनी दोन दिवसांपूर्वी नाशिकरोड रेल्वे स्टेशनची पाहणी केल्यानंतर विभागीय आयुक्तांशी रेल्वेच्या नियोजनाबाबत चर्चा केली होती. त्यावेळी कुंभमेळ्याच्या प्रवाशांसाठी बारा विशेष आणि आठ लांब पल्ल्याच्या गाड्या सोडण्याचा मान्य करण्यात आले होते. या गाड्या कुंभमेळा संपेपर्यंत प्लॅटफॉर्म एकवरून सोडण्यात येतील. मात्र, कुंभमेळ्याला तीन महिन्यांचा अवधी असताना नाशिककरांना आतापासूनच द्रविडी प्राणायम कशाला करायला लावता? असा संतप्त सवाल प्रवाशांनी विचारला आहे.
नियमित प्रवाशांना त्रास
मुंबई-भुसावळ पॅसेंजर, पुणे-भुसावळ, देवळाली-भुसावळ पॅसेंजर, दादर-औरंगाबाद, लोकमान्य टिळक टर्मिनन्स-मनमाड, इगतपुरी-मनमाड, मुंबई-नागपूर या गाड्या प्लॅटफॉर्म क्रमांक दोनवरून ये-जा करण्यास सुरवात झाली आहे. या गाड्यातून प्रवास करणारे बहुतांश प्रवासी हे नाशिकचे असतात. त्यांना आता पुलावरून जाऊन गाडी पकडण्याची कसरत करावी लागणार आहे. महिला, लहान मुले, वृध्द, अपंग, अंध, दम्याचे आणि गुडघ्याचे रुग्ण यांना याचा जास्त त्रास सहन करावा लागणार आहे. अनेक प्रवासी रुळ ओलांड़ून प्लॅटफार्म दोनवर जात असल्याने रेल्वेने रुळाच्या मधल्या जागेत संरक्षक जाळ्या बसविल्याने तो मार्गही आता बंद झाला आहे.
सरकते जिने नाहीत
संपूर्ण भुसावळ रेल्वे डिव्हीजनमध्ये नाशिकरोड हे ग्रेड वन असलेले स्टेशन आहे. येथे देवी चौकातील एक आणि मुख्य स्टेशनवर एक असे दोनच पूल आहेत. आता नवीन पुलाची भर पडली आहे. जुने पुल अरुंद असल्याने व प्रवाशांना अडचण सहन करावी लागते. येथे सरकते जिने बसविण्याची जुनीच मागणी असून कुंभमेळ्यात ती पूर्ण होईल, अशी अपेक्षा होती. ती पूर्ण झाली असती तर नाशिककरांची दमछाक झाली नसती.
निवेदन देणार
रेल्वे सल्लागार समितीचे राजेश फोकणे यांनी सांगितले, की गोदावरी, पंचवटी, राज्यराणी, सेवाग्राम, नाशिक-पुणे या गाड्यांतून नाशिकचेच प्रवासी ये-जा करतात. त्यांची प्रचंड दमछाक होत असल्याने या गाड्या फ्लॅटफार्म क्रमांक एकवरूनच सोडाव्यात आणि सरकते जिने त्वरित बसवावेत, अशी आग्रही मागणी डिव्हीजनल रेल्वे मॅनेजर सुधीरकुमार गुप्ता यांच्याकडे आम्ही करणार आहोत.
गोदावरी, नंदीग्राम, तपोवन, जनशताब्दी, सेवाग्राम, नंदीग्राम, या गाड्यात बहुतांश नाशिकचेच प्रवासी असतात. ज्येष्ठ नागरिक आणि रुग्णांना पुलाच्या उंच पायऱ्या चढताना मोठा त्रास होतो. - बिपीन गांधी, अध्यक्ष, रेल परिषद
स्थानिक प्रवाशांच्या रेग्युलर गाड्या प्लॅटफॉर्म एकवरूनच सोडाव्यात. इतक्या लवकर प्लॅटफार्म बदलण्याची अजिबात गरज नव्हती. अपंग, अंध, वृद्ध, रुग्ण यांचे मोठे हाल होणार आहेत. - बाळासाहेब केदारे, उपाध्यक्ष, पंचवटी रेल्वे प्रवाशी संघटना
मोबाइल अॅप डाउनलोड करा आणि राहा अपडेट
