जागतिक ऑलिम्पिक दिनानिमित्त २३ जूनला 'मविप्र'तर्फे दौड
म. टा. प्रतिनिधी, नाशिक
जागतिक ऑलिम्पिक डेनिमित्त दरवर्षी ऑलिम्पिक गीत इंग्रजीतून सादर होते. मात्र, नाशिकमध्ये हे गीत प्रथमच मराठीतून सादर होणार आहे. मविप्र संस्थेतर्फे २३ जून रोजी होणाऱ्या ऑलिम्पिक दौडमध्ये हे गीत मराठीतून सादर केले जाणार असून, महाराष्ट्रातला हा पहिलाच प्रयोग असल्याची माहिती संस्थेच्या सरचिटणीस नीलिमा पवार यांनी दिली.
'सत्य शिवाचा सुंदरतेचा विशालतेचा निर्माता, प्राचीन तू रे तूच अमर रे कलंकहीन तू परमात्मा' अशा या ऑलिम्पिक गीताच्या मराठीतील ओळी आहेत. ऑलिम्पिक गीताचा मराठीत अनुवाद मिलिंद गांधी यांनी केला असून, त्याला प्रशांत महाबळ यांचे संगीत लाभले आहे. महाराष्ट्रात प्रथमच ऑलिम्पिक गीत मराठीत अनुवादित करून ते सादर केले जाण्याचा महाराष्ट्रातला हा पहिलाच प्रयोग असेल.
'मविप्र' ऑलिम्पिक डे करणार वेगवान
मराठा विद्याप्रसारक समाज संस्थेतर्फे (मविप्र) जागतिक ऑलिम्पिक दिनानिमित्त २३ जून रोजी सकाळी सात वाजता एक किलोमीटरची 'ऑलिम्पिक दौड' होणार आहे. संस्थेचे विद्यार्थी, खेळाडू, कर्मचारी, तसेच नाशिकमधील नागरिक यात सहभागी होणार आहेत. ऑलिम्पिक दौडचे हे दुसरे वर्ष असून, आरोग्याचा संदेश, क्रीडासंस्कृतीचा प्रसार हा उद्देश असल्याची माहिती संस्थेच्या सरचिटणीस नीलिमा पवार यांनी शनिवारी पत्रकार परिषदेत दिली.
मविप्र मॅरेथॉन चौकापासून ही दौड सुरू होणार असून, क्रांतिवीर व्ही. एन. नाईक सर्कलला वळसा घालून कॅनडा कॉर्नरमार्गे पुन्हा मॅरेथॉन चौकात समारोप होईल. ऑलिम्पिक खेळाडू कॅप्टन कासम खान, महापौर अशोक मुर्तडक, पोलिस आयुक्त एस. जगन्नाथन, जिल्हाधिकारी दीपेंद्रसिंह कुशवाह, आयुक्त डॉ. प्रवीण गेडाम, अर्जुन पुरस्कारप्राप्त कविता राऊत, क्रीडाधिकारी संजय सबनीस, क्रीडा उपसंचालक जे. पी. अधाने आदी प्रमुख पाहुणे असतील. स्पर्धेत संस्थेचे शिक्षणाधिकारी डॉ. डी. डी. काजळे, प्रा. एस. के. शिंदे, जनसंपर्क अधिकारी सी. डी. शिंदे सहभागी होणार आहेत. संस्थेचे क्रीडाप्रमुख हेमंत पाटील या वेळी उपस्थित होते.
खेळाडूंच्या हस्ते उद्घाटन
मविप्र संस्थेतर्फे होणाऱ्या ऑलिम्पिक दौडचे उद्घाटन राजकीय व्यक्तींऐवजी खेळाडूंच्याच हस्ते करण्याचा निर्णय घेतला असून, ऑलिम्पिक खेळाडू कॅप्टन खान यांच्यासह संस्थेचे जिल्ह्यातील सर्वोत्कृष्ट खेळाडू, तसेच प्रशिक्षक या अभियाना हिरवा झेंडा दाखवतील. या खेळाडू, प्रशिक्षकांमध्ये नौकानयनचे मार्गदर्शक जितेंद्र कर्डिले, क्रीडा कार्यकर्ता संजय होळकर, तलवारबाजी खेळाडू शरयू पाटील, तसेच संस्थेच्या सर्वोत्कृष्ट खेळाडूंमध्ये रोलबॉलचा हर्षवर्धन गावित, खो-खोपटू स्वप्निल चिकणे, श्वेता जाधव, अमोल बोराडे, वैशाली तांबे, उत्तरा खानापुरे यांचा समावेश आहे.
मॅरेथॉन चौकाचा शुभारंभ
मविप्र संस्थेतर्फे केटीएचएम कॉलेजजवळील चौकाला मॅरेथॉन चौक असे नामकरण करण्यात आले असून, या चौकाला महापालिकेकडून गुरुवारी अधिकृत मान्यता मिळाली. ऑलिम्पिक डेनिमित्त या चौकाचे उद्घाटन २३ जून रोजी होणार आहे.
मॅरेथॉन मार्ग कायम
मविप्र संस्थेतर्फे दरवर्षी मॅरेथॉन स्पर्धेचा मार्ग मॅरेथॉन चौक ते दोंडेगाव असा घेण्यात येतो. हाच मार्ग भविष्यातही कायम राहणार आहे.
धावपटूचे शिल्प वाढणार
मॅरेथॉन चौकात उभारण्यात आलेले धावपटूचे शिल्प आणखी वाढवण्याचा निर्णय मविप्र संस्थेने घेतला आहे. हे शिल्प ब्राँझ धातूचे असल्याचा समज आहे. मात्र, ते चुकीचे असून, या शिल्पाला ब्राँझ धातूचा मुलामा देण्यात आल्याचे सरचिटणीस पवार यांनी स्पष्ट केले. हे शिल्प पुढील मॅरेथॉन स्पर्धेपर्यंत नऊ फुटांपर्यंत वाढविण्यात येणार असल्याची माहितीही त्यांनी दिली.
मोबाइल अॅप डाउनलोड करा आणि राहा अपडेट
