शालेय जीवनात असलेले गणवेशाचे महत्त्व हे वर्षानुवर्ष कायम आहे. त्यातील ट्रेण्ड मात्र मोठ्या प्रमाणात बदललेले दिसत असून गणवेशांचा रुबाबही वाढला आहे. गणवेशांची रंगसंगती, कापड, किंमती या सगळ्याचीच ओळख बदलली असून संस्था आपली ओळख होईल, असे गणवेश विद्यार्थ्यांसाठी निश्चित करत आहेत. या गणवेश खरेदीसाठी बाजारात गर्दी दिसून येत आहे.
पूर्वी मराठी शाळांचा गणवेश म्हणला, की मुलांसाठी खाकी पॅन्ट व प्लेन पांढरा शर्ट आणि मुलींसाठी निळा फ्रॉक, पांढरा शर्ट आणि त्यावर पांढरा कंबरेचा पट्टा असे ठराविक रंगातील गणवेश असायचे. संस्था वेगवेगळ्या असल्या तरी बहुतांश संस्था याच प्रकारच्या गणवेशाला पसंती द्यायच्या. कालांतराने मात्र गणवेशाच्या रुपात बदल झाला. प्लेन शर्टऐवजी लाइनिंग, चेक्सचे शर्ट गणवेशासाठी शिक्षण संस्थांनी स्वीकारले. इंग्रजी शाळांप्रमाणे मराठी शाळांच्या विद्यार्थ्यांच्या गणवेशावर टाय चढविला गेला. त्यामुळे या गणवेशाचं रूप पालटलं. मुलींचेही निळ्या-पांढऱ्या रंगातील गणवेशांची जागा, फिकट हिरवा, फिकट नारंगी, तपकिरी या रंगांनी घेतली. पूर्वी शिवून घेतले जाणारे हे गणवेश आता दुकानात रेडिमेड मिळतात. त्यातच शाळा सांगतील त्याच दुकानात जाऊन गणवेश खरेदी करण्याची सक्तीही विद्यार्थ्यांवर आली आहे. यामुळे विद्यार्थ्यांना गणवेशासाठी बार्गेनिंग करत गणवेश खरेदी करण्याची संधी मिळत नाही. मात्र, या खरेदीसाठी अवाजवी पैसा मात्र खर्च करण्याची वेळही आली. शाळेच्या या रोजच्या गणवेशाबरोबरच पीटीचा वेगळा गणवेशही विद्यार्थ्यांना कम्पल्सरी असल्याने त्याची खरेदी करणेही सुरू झाले आहे.
एकाच अपत्यामुळे हरवली ती गंमत
गणवेशांबाबत घरातील ज्येष्ठांना विचारल्यास पूर्वी आम्ही भावंड एकमेकांचे गणवेश घालायचो, असे ते सांगतात. उंची वाढली की थोरल्या भावाचा गणवेश धाकट्या भावाला दिला जायचा. अशी गंमत आता घरात एकच मूल असल्याने हरवली असल्याची खंतही ज्येष्ठांकडून व्यक्त केली जाते.
मोबाइल अॅप डाउनलोड करा आणि राहा अपडेट