म. टा. प्रतिनिधी, नाशिक
कुंभमेळ्यात शहरात दाखल होणाऱ्या विविध राज्यातील भाविकांना मदत करण्यासाठी नाशिकमधील परप्रांतीय संघटना पुढे सरसावल्या आहेत. या संघटनांच्या प्रतिनिधींची नुकतीच पोलिस आयुक्त एस. जगन्नाथन यांच्याशी चर्चा झाली.
सिंहस्थ कुंभमेळ्याचे निर्विघ्न आयोजन होणे गरजेचे आहे. त्या दृष्टीने सर्वच विभागाची कामे सुरू आहेत. परराज्यातील भाविकांना शहराची ओळख व्हावी, त्यांना विविध मार्ग, घाटांची माहिती मिळावी, यासाठी लवकरच वेबसाईट सुरू करण्यात येणार आहे. याशिवाय, मराठी, हिंदी आणि इंग्रजी भाषेतील सूचना फलक देखील लावले जातील. कुंभमेळा ही नाशिकची ओळख आहे. त्या दृष्टीने शहरात येणाऱ्या भाविकांना चांगली ट्रिटमेंट मिळावी यासाठी प्रशासनाचे प्रयत्न आहेत. परप्रांतीय व्यक्तींना शहराची ओळख नसते. त्यातच अनेकांना भाषेची अडचण येते. या पार्श्वभूमीवर पोलिस विभागाने परप्रांतीय नागरिकांच्या विविध संघटनांची बैठक शुक्रवारी संध्याकाळी आयोजित केली होती. या बैठकीस नाशिक मल्याळम कल्चरल असोसिएशन, नारायण गुरूदेव ट्रस्ट, तेलगू सेवा संघ, आयप्पा ट्रस्ट, हिंदी प्रसार संस्था, गणराज बहुउद्देशीय सेवाभावी संस्था, याशिवया, तामीळ, गुजराथी, बंगाली आणि उत्तर भारतीय हिंदी भाषिक संस्थांचे ५६ पदाधिकारी उपस्थित होते. सुरुवातीस पोलिस आयुक्त एस. जगन्नाथन यांनी पोलिस विभागामार्फत केलेल्या वाहतूक नियोजनाची सविस्तर माहिती दिली. बाह्य व अंतर्गत पार्किंगची ठिकाणे, भाविकांचे मार्ग याविषयी माहिती देऊन शंकाचे निरसन केले. याबरोबर, परप्रांतीय भाविकांना सहकार्य करण्यासाठी जास्तीत जास्त स्वयंसेवकांची नोंदणी करणे, दूभाषिक म्हणून पोलिसांना सहकार्य करणे, हरविलेल्या व्यक्तींच्या शोधकार्यात मदत करण्याचे आवाहन आयुक्त जगन्नाथन यांनी केले. परप्रांतीय संघटनांच्या सदस्यांशी भाविकांचा संपर्क आल्यास त्यांना आपलेपणाची भावना निर्माण होईल, असा उद्देश पोलिसांचा आहे. स्वंयसेवकांसाठी ओळखपत्र देण्याची व्यवस्था करण्यात येणार आहे. स्वयंसेवकांच्या नोंदणीसाठी दोन फोटो व ओळखपत्र घेवून पोलिस स्टेशनमध्ये नोंदणी करावी. उपनगर पोलिस स्टेशन हद्दीतील नागरिकांनी उपनगर पोलिस स्टेशनमध्ये, देवळाली कँम्प, नाशिकरोड व जेलरोड भागातील नागरिकांनी नाशिकरोड पोलिस स्टेशनमध्ये नोंदणी करावी. अंबड, इंदिरानगर, भद्रकाली पोलिस स्टेशन हद्दीतील स्वयंसेवकांसाठी भद्रकाली पोलिस स्टेशन, सातपूर व गंगापूर पोलिस स्टेशनहद्दीतील स्वयंसेवकांनी गंगापूर पोलिस स्टेशनमध्ये तर सरकारवाडा, पंचवटी व आडगाव पोलिस स्टेशन हद्दीतील स्वंयसेवकांनी त्याच पोलिस स्टेशनमध्ये नोंदणी प्रक्रिया करण्याचे आवाहन पोलिसांनी केले. बैठकीस पोलिस उपायुक्त एस. अंबिका, श्रीकांत धिवरे, पंकज डहाणे उपस्थित होते.
मोबाइल अॅप डाउनलोड करा आणि राहा अपडेट
