एकाच दिवशी, एकाच ठिकाणी दहा हजार लोकांच्या सहभागाने दहा हजार वृक्ष लावून वन तयार करण्याचा संकल्प शुक्रवारी नाशिककरांनी पूर्ण केला. वृक्षप्रेमी शेखर गायकवाड यांच्या मार्गदर्शनाखाली नाशिकमधील अबालवृध्दांनी या उपक्रमात सहभागी होऊन संपूर्ण नाशिक हिरवे करण्याचा संकल्प केला.
पर्यावरणदिनाच्या निमित्ताने शुक्रवारी सकाळी ८ वाजेपासून 'वन महोत्सवाला फाशीचा डोंगर येथे सुरुवात झाली. या उपक्रमासाठी महामंडळाकडून व खासगी व्यावसायिकांकडून वाहन व्यवस्था करण्यात आल्याने शहराच्या सर्व भागातून लोक येथे उपस्थित होते. या संकल्पाची पूर्तता करण्यासाठी वन विभागाच्या सहकार्याने सातपूर येथील फाशीचा डोंगर या ठिकाणी वनकक्ष क्र. २२२ ही जागा निवडण्यात आली होती. शहरातील बांधकाम व्यावसायिक, वैद्यकीय क्षेत्रातील व्यक्ती, वास्तुविशारद, उद्योजक सर्व क्षेत्रातील कामगार वर्ग, पत्रकार, सामजिक कार्यकर्ते, पर्यावरणप्रेमी, ज्येष्ठ नागरिक, रिक्षाचालक, शाळा-महाविद्यालयीन विद्यार्थी, युवा संघटना यांच्या सहकार्याने हा उपक्रम राबविण्यात आला.
हा उपक्रम यशस्वी करण्यासाठी मोठ्या प्रमाणात तरुणाईने पुढाकार घेतला. शिवाय प्रसिद्धी समितीने फेसबुक, टि्वटर, व्हॉट्सअप या सारख्या सोशल मीडियाचा देखील वापर करून नागरिकांना उपक्रमाची माहिती दिली होती. त्या त्या विषयात पारंगत असलेल्या युवकांच्या समित्या स्थापन करण्यात आल्या होत्या. त्यात अर्थ, जनसंपर्क, समन्वय, आपत्कालीन, साईट, प्रसिद्धी आदींचा समावेश होता. जनसंपर्क समितीने शाळा-महाविद्यालयांना सुटी असल्याने क्लासेस, वाचनालय, उद्याने, जॉगिंग ट्रक, अशा सार्वजनिक ठिकाणी भेटी देवून या उपक्रमाची माहिती नागरिकांपर्यंत पोहचवली होती. कार्यक्रमाच्या ठिकाणी सामाजिक संस्थांच्या वतीने दहा हजार खड्डे खोदण्यात आले होते.
कुंभमेळ्याच्या पार्श्वभूमीवर विकासकामांमध्ये अडथळा ठरणाऱ्या झाडांची एकीकडे कत्तल होत असताना दुसरीकडे मात्र विक्रमी वृक्षारोपणाचा अनोखा उपक्रम संपूर्ण राज्याला एक वेगळा विचार देणारा ठरणार असल्याचे जाणकारांचे म्हणणे होते. सकाळी ८ वाजता सुरू झालेल्या या उपक्रमाची सांगता सायंकाळी ५ वाजता झाली.
तरुणांचा प्रतिसाद
सर्व वयोगटातील नाशिककर यात सहभागी झाले होते. तरूण मंडळी या उपक्रमात सहभागी झालेली पहायला मिळाली. ही वाखाणण्याजोगी बाब म्हणायला हवी. तसेच, सेंट झेवियर्स व रेयान इंटरनॅशनल स्कूलसारख्या नाशिकमधील शाळांनी मुलांना येथे घेऊन येत मुलांकडून वृक्षारोपण करून घेतले.
वृक्षप्रेमी सेल्फीमय
वृक्षारोपणासाठी आलेल्या सर्वच स्तरातील लोकांमध्ये सेल्फीची क्रेझ दिसून आली. झाड लावल्यानंतर अनेकांनी मित्रांसोबतच नुकत्याच लावलेल्या झाडांबरोबरही सेल्फी काढले. या दरम्यान लोकांचा उत्साह ओसंडून वाहताना दिसत होता.
पोलिसही इको फ्रेंडली
एवढ्या मोठ्या उपक्रमादरम्यान कोणताही अनूचित प्रकार घडू नये म्हणून ठिकठिकाणी पोलिस सहज नजरेस पडत होते. यातील अनेकांनी कायदा सुव्यवस्था राखण्यासोबतच झाड लावून पर्यावरणाप्रती ही आपली ड्युटी निभावली.
६५ जातीची झाडे
पळस, मोह, वड, पिंपळ, आंबा, पुत्रंजिव, बेहडा, सीताफळ, काटेसावर, चेरी, भोकर यासारख्या ६५ हून अधिक प्रकारच्या वृक्षांचे रोपण करण्यात आले. यात मुख्यत्वे आयुर्वेदीक, वनौषधी झाडांचा प्रामुख्याने समावेश होता.
नगरसेवक उपस्थित
इतर वेळी महापालिकेच्या सभागृहातील हजेरीवरून टिकेला सामोरे जाणाऱ्या नगरसेवकांचे एक अनोखे रूप यादरम्यान पहायला मिळाले. महापालिकेतील बहुतांशी सर्वच नगरसेवकांनी या उपक्रमात सहभागी होत वृक्षारोपण केले. तसेच महपौरांनीसुध्दा या उपक्रमाला आवर्जून उपस्थिती लावली होती.
मी कुटुंबासमवेत वृक्षारोपणासाठी येथे आले आहे. यापूर्वी ही अनेकवेळा मी पर्यावरणपूरक कामे केली आहेत. मात्र एवढ्या मोठ्या प्लॅटफॉर्मवर मी पहिल्यांदाच काम करीत आहे आणि याचा एक वेगळाच आनंद आहे. - डॉ.नीलम परदेशी
आपलं पर्यावरण या संस्थेच्या वतीने आम्हाला खूप चांगली संधी उपलब्ध करून देण्यात आली. खूप प्रसन्न वाटतयं. यापुढे ही अशाच प्रकारे मी झाडं लावणार आहे. आज खऱ्या अर्थाने जागतिक पर्यावरण दिन साजरा केल्यासारखे वाटत आहे. - जान्हवी कविश्वर
मी पहिल्यांदाच झाड लावलं. अनुभव खूपच अविस्मरणीय होता. दर आठवड्याला मी झाडाची निगा राखायला फाशीच्या डोंगरावर जायचे ठरवले आहे. दरवर्षी किमान १० झाडं लावायचा संकल्प मी केला आहे. - प्रसाद पाठक
यांचे लाभले सहकार्य
वृक्षारोपणाचा उपक्रम यशस्वीपणे पार पडला. पण, हा उपक्रम यशस्वी होण्यासाठी क्रेडाई, बिल्डर असोसिएशन, रमेश अय्यर, जयकुमार रिअल इस्टेट, रेडियो मिरची, इंडियन सोसायटी ऑफ हीटिंग अॅन्ड रेफ्रीजेरेटिंग अॅन्ड एअर कंडीशनिंग इंजिनिअर्स, विष्णू पाटील यांचे मोलाचे सहकार्य लाभले. तसेच धनंजय शेंडबाळे यांनी ८ हजार झाडे उपलब्ध करून देत महत्वाची भूमिका बजावली.
मोबाइल अॅप डाउनलोड करा आणि राहा अपडेट