शहरातील १०५ पैकी २४ घटना गुरूवारच्या; सायंकाळची ४ ते ८ ची वेळ सर्वाधिक धोकादायक
अरविंद जाधव, नाशिक
शहरातील विविध भागात दुचाकीवरून येणारे चेन स्नॅचर्स धुमाकूळ घालत आहेत. गळ्यातील चेन तोडण्याच्या घटना दिवसेंदिवस वाढत असून, स्नॅचर्ससाठी गुरूवार सर्वांत 'लकी' ठरल्याचे दिसते. २०१४- मे २०१५ या कालावधीत स्नॅचिंगच्या १०५ घटना घडल्यात. त्यातील सर्वाधिक म्हणजे २४ घटना
गुरूवारच्या दिवशी घडल्या असून, यामागील कारणांचा पोलिस शोध घेत आहेत.
भरधाव वेगात येऊन महिलांच्या गळ्यातील मंगळसूत्र ओरबडून नेण्याच्या घटना नवीन राहिलेल्या नाहीत. चोर पोलिसांचा पाठलाग सातत्याने सुरू असला तरी चोरटे पोलिसांच्या एक पाऊल पुढे असल्याचे दिसून येते. कारण, आतापर्यंतच्या १०५ घटनांपैकी फक्त ३१ गुन्हे उघडकीस आले आहेत. अनेकदा चोरटे पोलिसांनी लावलेल्या बंदोबस्ताप्रमाणे आपली कार्यपध्दत बदलतात. स्नॅचिंगच्या घटना ठराविक वेळेत आणि ठराविक ठिकाणी होतीलच असे नाही. मात्र, तरीही आतापर्यंतच्या एकूण घटनांपैकी स्नॅचिंगच्या सर्वाधिक घटना गुरूवारीच झाल्याचे दिसून येते. १०५ गुन्ह्यांपैकी चोरट्यांनी गुरूवारच्या दिवशी २४ वेळा मंगळसूत्र तोडून पोबारा केला आहे. आता, चोरटे याच दिवशी सक्रिय का असतात? या विषयी पोलिसांनाही कोडेच आहे.
एक ते दीड वर्षांपूर्वी नाशिकरोड पोलिसांनी दोघा भामट्यांना स्नॅचिंगच्या गुन्ह्यात अटक केली होती. ठाणे जिल्ह्यातील कल्याणच्या आसपास राहणारे संशयित शिर्डीला देवदर्शनासाठी जात होते. त्यांना शहरात हात साफ करता आला नाही. त्यामुळे शिंदे गावाजवळ रस्ता क्रॉस करणाऱ्या महिलेच्या गळ्यातील मंगळसूत्र तोडून त्यांनी सिन्नरकडे धाव घेतली.
सुदैवाने या महिलेच्या पतीचे चिंचोली फाटा परिसरात दुकान होते. तिने ही माहिती पतीला दिली. त्यानुसार पतीने चोरट्यांचा सिन्नरपर्यंत पाठलाग केला. पेट्रोल भरण्यासाठी चोरटे थांबले असता तेथील वाहतूक पोलिसांच्या मदतीने त्यांना अटक करण्यात आली. या संशयितांनी अनेकदा असे प्रकार केल्याचे तपासात स्पष्ट झाले होते. आताही अशाच पध्दतीने काम चालते की, चोरट्यांनी वेगळी पध्दत अवलंबली याचा तपास पोलिस करीत आहेत.
गुरूवारपाठोपाठ शुक्रवारी देखील १८ चेन स्नॅचिंगच्या घटना घडल्या आहेत. यानंतर शनिवारी १७ व बुधवारी १५ ठिकाणी मंगळसूत्र तोडण्यात आले. रविवारी १३ आणि मंगळवार व सोमवारी अनुक्रमे १० आणि ८ चेन स्नॅचिंगच्या घटना घडल्याची नोंद आहे.
हायवेलगतचा भाग असुरक्षित
मुंबई-आग्रा हायवे आणि नाशिक पुणे हायवेलगत असलेल्या उपनगर, इंदिरानगर आणि नाशिकरोड पोलिस स्टेशनमध्ये स्नॅचिंगच्या सर्वाधिक घटना होत आहेत. या तिन्ही पोलिस स्टेशनच्या हद्दीत १०५ पैकी ५० टक्के म्हणजे ५२ गुन्ह्यांची नोंद गत १७ महिन्यात झाली आहे. उपनगर पोलिस स्टेशनच्या हद्दीत २३, इंदिरानगरमध्ये १५ आणि नाशिकरोड पोलिस स्टेशनमध्ये १४ गुन्हे या काळात घडले आहेत. विशेष म्हणजे यातील ८० टक्के गुन्हे हायवे लगतच्या भागात घडले आहेत. स्नॅचिंगच्या घटनेनंतर सहजतेने हायवेपर्यंत पोहचणे आणि त्यानंतर शहरातून बाहेर पडणे, असा उद्देश त्यामागे चोरट्यांचा असावा. सरकारवाडा पोलिस स्टेशनच्या दहा गुन्ह्यांचा अपवाद वगळता इतर पोलिस स्टेशनमध्ये स्नॅचिंगच्या गुन्ह्याचे प्रमाण तुलनेत कमीच आहे.
संध्याकाळची वेळ संभाळा
गत वर्षभरातील चेन स्नॅचिंगच्या सर्वाधिक घटना सांयकाळी ४ ते ८ या वेळेत घडल्याची नोंद पोलिसांकडे आहे. साधारणतः सायंकाळी ४ ते ८ या कालावधीत रस्त्याने पायी जाणाऱ्या महिलांना चोरट्यांनी टारगेट केले आहे. या महिला ऑफीससाठी, देवदर्शनासाठी, शॉपींगसाठी, लग्न किंवा इतर कार्यक्रमांसाठी घराबाहेर पडल्या होत्या. यानंतर चोरट्यांनी दुपारी १२ ते सायंकाळी ४ या काळात २५ महिलांच्या चेन स्नॅच केल्या आहेत. सकाळी ८ ते १२ या वेळेत १७ तर रात्री ८ ते १२ या कालावधीत २१ महिलांना चोरट्यांचा सामना करावा लागला. रात्रीच्या जेवणानंतर शतपावली करणाऱ्या महिलांच्या गळ्यातील मंगळसूत्र तोडल्याच्या
अनेक केसेस उपनगर तसेच नाशिकरोड पोलिस स्टेशनमध्ये दाखल आहेत.
सध्या, रात्री आठ वाजेनंतर स्नॅचर्स सक्रिय होत असल्याचे काही घटनांवरून स्पष्ट होत, असल्याची माहिती पोलिस आयुक्त एस. जगन्नाथन यांनी दिली. दुपारी ४ ते रात्री आठ वाजेपर्यंतच्या घटना रोखण्यासाठी आम्ही या काळात बंदोबस्त वाढवला. त्यानंतर चोरट्यांनी मोडस ऑपरेंडीमध्ये बदल केला. आता, रात्री आठ वाजेनंतरच्या वेळेत रस्त्यावर फिरणाऱ्या महिलांना चोरटे टारगेट करीत आहे.
हा बदल लक्षात घेत रात्री ८ ते १२ या कालावधीत बंदोबस्तात वाढ केले असल्याचे आयुक्त जगन्नाथन यांनी सांगितले. चेन स्नॅचिंग सारख्या गुन्ह्यात अनेक नवीन गुन्हेगार सहभागी होत असून त्यांना रोखण्यासाठी योग्य ते नियोजन केले जात असल्याचा दावा त्यांनी केला.
परजिल्ह्यातील स्नॅचर्सची ठिकाणे
चेन स्नॅचिंगच्या गुन्ह्यात स्थानिक सराईत गुन्हेगारासोबत ठाणे जिल्ह्यातील कल्याण, आंबिवली तसेच अहमदनगर जिल्ह्यातील श्रीरामपूर येथील गुन्हेगारांचा मोठ्या प्रमाणावर समावेश आहे. हे गुन्हेगार गुन्हा करून स्वतःच्या वाहनाने, रेल्वे किंवा बसने परत जातात. स्नॅचिंगच नव्हे तर घरफोडी, बॅग लिफ्टिंग अशा गुन्ह्यात देखील यांचा समावेश आहे.
हायवेलगतची स्नॅचिंगची ठिकाणे
भाभानगर, लेखानगर, राजीवनगर, पाथर्डी फाटा, जयभवानी रोड, उपनगर, शिक्रेवाडी, बोधलेनगर, शिवाजीनगर, डिजीपीनगर, काठेगल्ली, पौर्णिमा बस, गंगापूररोड, जुना हायवे लगतच परिसर, मुंबई आग्रा हायवेवर द्वारकापासून आडगावपर्यंतचा लगतच्या भागात स्नॅचिंगच्या घटना वाढल्या आहेत. या भागात गस्त वाढविण्याची गरज आहे.
चेन स्नॅचिंगसह इतर गंभीर गुन्हे रोखण्यासाठी प्रयत्न सुरू आहेत. अनेक गुन्ह्यांचा यशस्वी तपास झाला असून, नवनवीन गुन्हेगार यातून समोर आले आहेत. चेन स्नॅचिंगचे गुन्हे रोखण्यासाठी चोरट्यांच्या मोडस ऑपरेंडीप्रमाणे पोलिसांनी आपल्या कार्यपध्दतीत बदल केले असून त्याचा सकारत्मक प्रतिसाद लवकरच दिसून येतील. - एस. जगन्नाथन, पोलिस आयुक्त
मोबाइल अॅप डाउनलोड करा आणि राहा अपडेट