आधार नोंदणीसाठी मोहीम; शिक्षण विभागात पारदर्शकता आणण्यासाठी खास उपक्रम
म. टा. प्रतिनिधी, नाशिक
शिक्षण विभागात पारदर्शकता आणण्यासाठी शिक्षण घेत असलेल्या व शाळाबाह्य असलेल्या प्रत्येक मुलाचे आधार कार्ड काढून ते शाळा प्रवेश क्रमांकाला जोडण्यासाठीचे अभियान सुरू करण्यात आले आहे. त्यासाठी जिल्ह्यातील अंगणवाडी केंद्रांच्या ठिकाणी विशेष नोंदणी मोहीम राबविली जाणार आहे.
बालकांचा मोफत व सक्तीचा शिक्षण कायदा अधिनियम २००९ अन्वये राज्यातील ६ ते २४ वयोगटातील प्रत्येक मूल शाळेच्या प्रवाहात आणणे, टिकवणे आणि त्याला दज्रेदार शिक्षण देणे बंधनकारक असल्याने आता शासन पातळीवर शाळाबाह्य मुलांना मुख्य प्रवाहात आणण्यासाठी प्रयत्न सुरू करण्यात आले आहेत. याचाच एक भाग म्हणून शाळेत शिक्षण घेत असलेल्या व शाळाबाह्य असलेल्या प्रत्येक मुलाचे आधारकार्ड काढून ते शाळा प्रवेश क्रमांकाला जोडण्यासाठी अभियान राबविण्याचा शासन निर्णय जारी करण्यात आला आहे.
शालेय शिक्षण व क्रीडा विभागाच्या शासन निर्णयान्वये प्रत्येक गावात आधार कार्ड देण्याची मोहीम राबविण्याच्या सूचना देण्यात आल्या आहेत. यासाठी जिल्हाधिकारी व जिल्हा प्राथमिक शिक्षणाधिकारी यांच्या उपस्थितीत जिल्हानिहाय बैठकांचे आयोजन करून आधार कार्ड असलेल्या व नसलेल्या विद्यार्थ्यांची संख्या निश्‍चित करण्याचे काम सुरू करण्यात आले आहे. या मोहिमेत गावस्तर विविध प्रकारचे जनजागृतीचे कार्यक्रम घेऊन विद्यार्थ्यांना आधार कार्ड काढण्यासाठी प्रोत्साहित करण्यात येणार आहे. यासाठी शाळा व्यवस्थापन समिती, स्वयंसेवी संस्था, प्राथमिक शिक्षकांच्या संघटना, ग्रामपंचायत, सेवानवृत्त शिक्षक व कर्मचारी, शिक्षणतज्ज्ञ आदिंचा सहभाग घेण्यात येणार आहे. गावनिहाय आधार कार्ड नोंदणीसाठी नियोजन करण्यात येणार असून, गावस्तरावर दवंडी देऊन प्रचार व प्रसार करण्याचे शासन निर्णयात आदेशित करण्यात आले आहे. प्रत्येक गावात आधार कार्ड नोंदणीसाठी प्रभात फेरी काढणे, ग्रामस्थ व पालकांना विविध बैठका, मेळावे यांच्या माध्यमातून प्रोत्साहित करण्याचे नियोजित आहे.
सध्या शाळांना सुट्या लागल्या असल्या तरीही जून महिन्यात शाळा सुरू होण्यापूर्वी शंभर टक्के विद्यार्थ्यांना आधारकार्ड देण्यासाठी शासनस्तरावर प्रयत्न सुरू असल्याने गावनिहाय आधारकार्ड नोंदणी करण्यात येणार आहे. शाळाबाह्य विद्यार्थ्यांना शाळेच्या प्रवाहात आणण्याबरोबर विद्यार्थ्यांची माहिती एका क्लिकवर समजण्यासाठी मदत होणार आहे.
अशी येणार पारदर्शकता
शाळेत शिक्षण घेत असलेल्या ६ ते २४ वयोगटातील विद्यार्थ्यांना शासनाकडून विविध प्रकारच्या सवलती दिल्या जातात. या सवलती व शिष्यवृत्त्यांचा प्रत्यक्ष विद्यार्थ्याला लाभ मिळावा यासाठी विद्यार्थ्याचे आधारकार्ड त्याच्या प्रवेश क्रमांकाशी जोडण्यात येणार असून, यामुळे बोगस लाभ देणे, बोगस पटसंख्या वाढवून शासकीय अनुदान मिळवणे यासारख्या समस्यांवर कायमस्वरूपी पायबंद घालणे शक्य होणार आहे.
शिक्षण विभागाची आम्ही नुकतीच बैठक घेतली असून, जिल्ह्याच्या ग्रामीण भागात अंगणवाडी केंद्रावर विशेष मोहीम राबविली जाणार आहे. नाशिक जिल्ह्यासाठी आधार नोंदणीच्या एकूण ५५ मशिन्स आहेत. यातील १२ मशिन्स शहरात कार्यरत आहेत. - निलेश जाधव, उपजिल्हाधिकारी
मोबाइल अॅप डाउनलोड करा आणि राहा अपडेट
