यशवंतराव चव्हाण महाराष्ट्र मुक्त विद्यापीठाच्या लेखी परीक्षा पुढील महिन्यात सुरु होणार असल्या तरी हॉल तिक‌िटाच्या उपलब्धतेसाठीही विद्यार्थ्यांची मोठी दमछाक होत आहे. त्यामुळे विद्यार्थ्यांमध्ये नाराजीचे वातावरण आहे. सर्व हॉल तिकीटे ऑनलाइन उपलब्ध असून, ती डाऊनलोड करावीत, असे विद्यापीठाने स्पष्ट केले आहे.
मुक्त विद्यापीठाच्या विविध शिक्षणक्रमांच्या परीक्षांना येत्या ६ मे पासून प्रारंभ होत आहे. विद्यापीठाचा विस्तार राज्यभर असून, लाखो विद्यार्थी ही परीक्षा देणार आहेत. परीक्षेसाठी सर्व तयारी पूर्ण केल्याचे विद्यापीठाने सांगितले असले तरी प्रत्यक्षात विद्यार्थ्यांची परीक्षा हॉल तिकीट मिळविण्यापासूनच सुरु झाल्याचे दिसून येत आहे. हॉल तिकीट उपलब्ध न झाल्याची तक्रार त्यामुळेच विद्यार्थ्यांकडून होत आहे. विद्यापीठाच्या विभागीय केंद्रांसह मुख्यालयातही या तक्रारी प्राप्त होऊ लागल्या आहेत. तसेच, विद्यापीठाच्या फेसबूक पेजवरही अनेक विद्यार्थ्यांनी नाराजी व्यक्त केल्याचे दिसून येत आहे. यासंदर्भात विद्यापीठाशी संपर्क साधला असता, विद्यार्थ्यांना सर्व माहिती मोबाइल एसएमएसद्वारे कळविण्यात आली आहे. तसेच, सर्व विद्यार्थ्यांचे हॉल तिकीट विद्यापीठाच्या http://ycmou.digitaluniversity.ac या वेबसाइटवर उपलब्ध करुन देण्यात आल्याचे परीक्षा नियंत्रक डॉ. अर्जून घाटुळे यांनी सांगितले आहे. प्रत्येक विद्यार्थ्याला देण्यात आलेल्या पीएनआर क्रमांक टाकून वेबसाईटवर सर्च केल्यासही हॉल तिकीट उपलब्ध होईल. या हॉल तिकीटावर संबंधित अभ्यास केंद्राचा सही शिक्का विद्यार्थ्यांना घ्यावा लागणार आहे, असेही घाटुळए यांनी स्पष्ट केले आहे.
व्हिडिओ उपलब्ध
वेबसाइटवर उपलब्ध असलेले हॉल तिकीट डाऊनलोड करण्यासंबंध‌िचा व्हिडिओ विद्यापीठाने फेसबूकच्या पेजवर दिला आहे. या व्हिडिओचाही फायदा विद्यार्थ्यांनी घ्यावा, असे आवाहन विद्यापीठाने केले आहे.
केंद्र बदल नाहीच
विद्यार्थ्यांना त्यांचे परीक्षा केंद्र कुठल्याही परिस्थितीत बदलून मिळणार नाही, असे आदेश विद्यापीठाने जारी केले आहेत. परीक्षेच्या तोंडावर परीक्षा केंद्र बदलण्यातून विद्यार्थ्यांची अनुपस्थिती दर्शविली जाते तसेच त्यांच्या उत्तरपत्रिका आणि निकालाबाबतही गोंधळ होतो. त्यामुळे विहित मुदतीपूर्वी अर्ज न करणाऱ्या विद्यार्थ्यांचे परीक्षेच्या तोंडावर परीक्षा केंद्र बदलले जाणार नाही, असे विद्यापीठाने स्पष्ट केले आहे.
फेसबुकवर करा तक्रार
विद्यापीठाचे अधिकृत फेसबूक पेज असून, विद्यार्थ्यांनी त्यांच्या अडचणी तसेच तक्रारी त्या पेजवर कराव्यात, असे आवाहन विद्यापीठाने केले आहे. या तक्रारींची तत्काळ दखल घेण्यात येईल, अशी ग्वाहीही विद्यापीठाने दिली आहे.
मोबाइल अॅप डाउनलोड करा आणि राहा अपडेट
