जिल्हा बँकेवर गावित, गुळवे, सावंत, हलकंदर, दराडे यांची निवड निश्चित
म. टा. खास प्रतिनिधी, नाशिक
नाशिक जिल्हा मध्यवर्ती सहकारी बँकेच्या निवडणुकीसाठी शुक्रवारी शेवटच्या दिवशी तब्बल १५९ जणांनी अर्ज दाखल केले असून, आतापर्यंत २५० अर्ज दाखल झाले आहेत. सोसायटी गटातून संदीप गुळवे, आमदार जीवा पांडू गावित, सचिन सावंत, नामदेव हलकंदर आणि किशोर दराडे या पाच जणांची बिनविरोध निवड झाली आहे. या पाचही जागांसाठी एकच अर्ज आल्याने त्यांची निवडीची औपचारिकता घोषणा होणे बाकी आहे. त्यामुळे आता केवळ १६ संचालकांसाठीच निवड प्रक्रिया होणार आहे.
येत्या २७ तारखेला अर्जाची छाननी केली जाणार आहे. दरम्यान, शुक्रवारी अर्ज भरण्याचा शेवटचा दिवस असल्याने बँकेला यात्रेचे स्वरूप आले होते. अर्जदारांची संख्या जास्त असल्याने जिल्हा बँकेत गदारोळ होऊन कामकाज सायंकाळपर्यंत चालवावे लागले. जिल्हा बँकेच्या निवडणुकीचा अर्ज दाखल करण्याचा शुक्रवारी शेवटचा दिवस होता. त्यामुळे अर्ज दाखल करण्यासाठी उमेदरावांची झुंबड उडाली होती. शेवटच्या दिवशी तब्बल १५९ अर्ज दाखल झाले. यापूर्वी ९१ अर्ज दाखल झाले होते. त्यामुळे तब्बल अडीचशे अर्ज दाखल झाले आहेत. शेवटच्या दिवशी खासदार हरिश्चंद्र चव्हाण, माजी आमदार वसंत गिते, आमदार अनिल कदम, वैशाली कदम, मंदाकिनी कदम, डॉ. शोभा बच्छाव, आमदार अपूर्व हिरे अशा दिग्गज उमेदवारांनी अर्ज दाखल केले. आतापर्यंत देवीदास पिंगळे, अॅड. माणिकराव कोकाटे, शोभा बच्छाव, चंद्रकांत गोगड, नरेंद्र दराडे, किशोर दराडे, दीपक गोगड, संदीप गुळवे, अद्वय हिरे, शिवाजी चुंबळे माजी आमदार शिरीष कोतवाल यांच्यासह दत्ता गायकवाड, सुहास कांदे, कोंडाजी मामा आव्हाड, प्रकाश उबाडे, आमदार सीमा हिरे या प्रमुख उमेदवारांनी अर्ज दाखल केले आहेत. गुरुवारी अॅड. सुनील ढिकले, आमदार जे. पी. गावित, प्रिया वडजे, परवेझ कोकणी, शेखर ढिकले, कैलास शिंदे, धनंजय पवार, योगेश हिरे, रतन निकम, शैलेश सूर्यवंशी, मनीषा पगार अशा मातब्बर उमेदवारांनी अर्ज दाखल केले आहेत.
१६ जागांसाठी निवडणूक
जिल्हा बँकेच्या २१ संचालकांपैकी सोसायटी गटातील पाच संचालकांची बिनविरोध निवड झाली आहे. त्यात इगतपुरी गटातून संदीप गुळवे, सुरगाणा गटातून आमदार जे. पी. गावित, बागलाण गटातून सचिन सांवत, पेठ गटातून नामदेव हलकंदर, येवला गटातून किशोर दराडे यांचा समावेश आहे. या पाचही गटासाठी एकच अर्ज आले आहेत. त्यामुळे त्यांच्या विजयाची केवळ औपचारिकता बाकी आहे. निवडणूक प्रक्रिया आता केवळ १६ जागांसाठीच होणार आहे.
मोबाइल अॅप डाउनलोड करा आणि राहा अपडेट