म. टा. प्रतिनिधी, नाशिक
जगण्याच्या उमेदीला निराशेचा अंधार कधी सर्वच बाजूंनी घेरून टाकतो. मात्र, हीच वेळ ओळखायला हवी. अन् सकारात्मक विचारांनी या निराशावादावर मात करायला हवी. असाच संदेश ज्येष्ठ समाजसेविका प्रा. निशा पाटील लिखित 'अंतर्नाद' हे पुस्तक देते, असे गौरवोद्गार माजी केंद्रीय मंत्री सुशीलकुमार शिंदे यांनी काढले.
कुसुमाग्रज स्मारक येथे आयोजित सोहळ्यात प्रा. पाटील यांच्या पुस्तकाचे प्रकाशन करण्यात आले. त्यावेळी शिंदे प्रमुख पाहुणे म्हणून बोलत होते. यावेळी ते म्हणाले, की दिवसेंदिवस समाज संकुचित होताना दिसतो आहे. जातीय सलोख्यामध्ये भिंती उभ्या राहत आहेत. समाजिक ऐक्याच्या दृष्टीने ही दरी निर्माण होणे चांगले नाही. या प्रतिकुलतेच्या प्रवाहातही सामाजिक क्षेत्रातील घटक निराश न होता कार्यरत असतात. त्यांचे कार्य प्रेरणादायी ठरते. जातीपातींना मूठमाती देऊन मानवतेला प्राधान्य देणाऱ्या विचारांचा प्रसार 'अंतर्नाद'सारख्या पुस्तकांमधून होतो, असेही ते म्हणाले. शब्द मल्हारच्या माध्यमातून हे पुस्तक प्रकाशित करण्यात आले.
चिंतनास चालना देणारे, समाजाच्या मनात आशावादाची बीजे पेरणारे अन् मानवतेची शिकवण देणारे पुस्तक,' अशा शब्दात माजी मंत्री वनाधिपती विनायकदादा पाटील यांनी या पुस्तकाचे वर्णन केले. यावेळी प्रकाशक स्वानंद बेदरकर, समीर बेदरकर यांच्यासह साहित्य रसिक उपस्थित होते.
मोबाइल अॅप डाउनलोड करा आणि राहा अपडेट
