टीम मटा
अवकाळी पावसाची साडेसाती शेतकऱ्यांची पाठ सोडायला तयार दिसत नाही. दर महिन्याला अवकाळी पाऊस व गारपीट सुरूच आहे. यामुळे बळीराजा पुरता हैराण झाला आहे. सलग तीन दिवसांपासून जिल्ह्यातील विविध भागात वादळी वारा, मुसळधार पाऊस व गारपीट सुरू आहे. यामुळे कांदा, द्राक्ष व काही अंशी गव्हाचे नुकसान झाले आहे. वाऱ्यामुळे अनेक घरांची छप्परे उडाली असून, वीज कोसळून गाय, बैल, शेळ्या यांचा बळी गेला आहे. गेल्या वर्षी अवकाळी पाऊस व गारपिटीने हैदोस घातला होता. त्याचाच प्रत्यय यावर्षीही येत आहे. गेल्या तीन महिन्यात सातत्याने अवकाळी पाऊस कोसळत आहे. यामुळे द्राक्ष, डाळिंब व कांदा उत्पादनावर मोठा परिणाम झाला आहे. या महिन्यातही ऊन-पावसाचा खेळ सुरूच आहे. सलग तिसऱ्या दिवशी झालेल्या पावसाने मोठे नुकसान झाले आहे.
निफाडमध्ये रिपरिप
लासलगावसह निफाड तालुक्यातील बहुतांशी भागात सोमवारी अवकाळी पावसाने हजेरी लावली. दिवसभर पावसाची रिपरिप सुरूच राहिल्याने वातावरणात प्रचंड गारवा निर्माण झाला होता. लासलगाव, विंचूर, नैताळे, देवगाव, भरवस, कोटमगाव, उगाव, टाकळी, निमगाव, ब्राह्मणगाव, पाचोरे यांसह निफाडच्या गोदाकाठ परिसरातील अनेक गावात सोमवारी दुपारनंतर ढगाळ वातावरण तयार होऊन दुपारी दोन वाजेच्या सुमारास अवकाळी पावसाला सुरुवात झाली. दुपारी दोन वाजेच्या सुमारास अचानक सुरू झालेल्या पावसामुळे लासलगाव कृषी उत्पन्न बाजार समितीत शेतमाल विक्रीसाठी आलेल्या शेतकऱ्यांची एकच धावपळ उडाली. सध्या परिसरात कांदा काढणीला वेग आला असून, तयार झालेला कांदा शेतांमध्ये पोळ मारून उघड्यावर ठेवला असल्याने अवकाळी पावसामुळे कांद्याची प्रतवारी खराब होण्याची शक्यता वाढली आहे. दरम्यान, लासलगाव कृषी उत्पन्न बाजार समितीत सुमारे २२ हजार क्विंटल कांद्याची आवक झाली होती. लाल कांद्याला सरासरी ९०० रुपये प्रती क्विंटल भाव मिळाला. उन्हाळ कांद्याला किमान ५०० रुपये, कमाल १ हजार ३७५, तर सरासरी १ हजार १२५ रुपये प्रती क्विंटल भाव मिळाला.
कळवणमध्ये गारपीट
कळवण शहर व तालुक्यात सोसाट्याच्या वाऱ्यासह मुसळधार पाऊस व त्यासोबत गारपीट झाल्याने शेतमालाचे प्रचंड नुकसान झाले आहे. विजांच्या कडकडाटासह दुपारी बारा वाजेनंतर मुसळधार पावसास सुरुवात झाली. सुमारे पंधरा मिनिटे गारपीट सुरू होती. तसेच तीन वाजेपर्यंत ठराविक अंतराने मुसळधार व रिमझिम पाऊस सुरू होता.
तालुक्यात सध्या कांदा काढणी सुरू असून, शेतातून काढलेला कांदा हा खळ्यात उघड्यावर पडलेला असताना अचानक आलेला अवकाळी पावसाने का कांदा पूर्णता भिजला आहे. शेतात पावसाचे पाणी साचल्याने कांदा सडण्याची शक्यता वर्तविण्यात येत आहे. दरमहा होणारा अवकाळी पाऊस आणि गारपीट यामुळे शेतमालाचे उत्पन्न घटून शेतकरी कोलमडून पडला आहे.
इगतपुरीत नुकसान
इगतपुरी व घोटी शहरासह परिसरात सोमवारी दुपारी वादळी वाऱ्यासह जोरदार पाऊस झाला. यामुळे घोटी मार्केट कमिटीत शेकडो वाहनातून आणलेल्या भाजीपाल्याचे मोठे नुकसान झाले. ग्रामीण भागात वादळी वाऱ्यामुळे टोमॅटो, काकडीच्या बागा उद्ध्वस्त झाल्या. तसेच फ्लॉवर, कोबीची पिकेही जमीनदोस्त झाल्याने शेतकऱ्याला अवकाळीचा मोठा फटका बसला आहे. इगतपुरी, घोटी, दौंडत, काळुस्ते, वैतरणा, मुंढेगाव या शिवारात मोठ्या प्रमाणात अवकाळी पावसाचा मारा झाला. अचानक झालेल्या अवकाळी पावसाला सुरुवात करताच सर्वांचीच तारांबळ उडाली. घोटी शहरात बाजारासाठी आलेल्या ग्राहक-विक्रेते-व्यापारी यांची धावपळ उडाली. घोटी बाजारसमिती आवारात भाजीपाला घेऊन आलेल्या शेतकऱ्यांना या पावसाचा फटका बसला. कवडीमोल भावाने भाजीपाला द्यावा लागला.
दिंडोरीत शेड कोसळले
दिंडोरी तालुक्यातील विविध भागात पुन्हा जोरदार वादळी बेमोसमी पाऊस झाला असून, शेतीचे मोठे नुकसान झाले आहे. वणी येथे एका कांदा व्यापाऱ्याचे शेड कोसळून कांदा, चारचाकी गाड्या तसेच शेडचे लाखोंचे नुकसान झाले आहे.तालुक्याच्या पश्चिम भागाकडून वादळवारा मेघगर्जनेसह पाऊस सुरू झाला. काही भागात तुरळक गाराही पडल्या. काही ठिकाणी झाडे उन्मळून पडल्याचे वृत्त आहे. कांदा भाजीपाला द्राक्ष, गहू आदी पिकांचे नुकसान झाले आहे. दिंडोरी बाजार समितीच्या आवारात कांदा विक्रीसाठी आलेल्या शेतकऱ्यांची धावपळ झाली.
सिन्नरमध्ये गारपीट
सिन्नर तालुक्यात अवकाळी पावसाचा कहर सुरूच असून, सोमवारी शहर परिसरात दुपारी पाऊण ते एक तास वादळी वाऱ्यासह जोरदार पाऊस झाला. नायगाव, जायगाव, देशवंडी या परिसरात गारपीट झाली. तसेच तालुक्याचा पूर्व भागात वादळी वाऱ्यासह सुमारे तासभर पावसाने झोडपले. या अवकाळी पावसामुळे शेतात साठवलेला कांदा भिजला. शहरातील रस्ते जलमय झाले होते. गेल्या दोन दिवसापासून तालुक्याच्या विविध भागात गारांचा पाऊस पडल्याने शेतीचे मोठे नुकसान झाले.
नांदगावमध्ये हजेरी
नांदगाव तसेच चांदवड तालुक्याच्या मागे लागलेला अवकाळी पावसाचा ससेमिरा थांबण्याची चिन्हे दिसत नसल्याने परिसरातील शेतकरी चिंतातूर झाला आहे. सोमवारी मनमाड शहरासह नांदगाव तालुक्यात अवकाळी पावसाने पुन्हा हजेरी लावली. मात्र वादळ आणि गारपीट नसल्याने बळीराजाने सुटकेचा निःश्वास सोडला. मनमाड नांदगावसह परिसरात अर्धा तास पाऊस झाला. त्याचा कांदा आणि डाळिंबाला फटका बसला.
चांदवडमध्ये रिमझिम
चांदवड परिसरातील वडनेर भैरव, वडाळी भोई भागात पावसाच्या हलक्या सरी कोसळल्या. रिमझिम पाऊस असल्याने शेतकऱ्यांना हायसे वाटले. दिवसभर ढगाळ वातावरणानंतर आलेल्या पावसामुळे हवेत गारवा निर्माण झाला होता.
मोबाइल अॅप डाउनलोड करा आणि राहा अपडेट
