मातोरी येथील शेतकऱ्यांचा निर्धार; गुन्हे दाखल करण्याची मागणी
म. टा. प्रतिनिधी, नाशिक
बनावट दस्तऐवजाच्या आधारे शिवसेना आणि भाजपच्या काही पदाधिकाऱ्यांनी गायरान जमीन खरेदी व्यवहारात फसवणूक केल्याचा आरोप मातोरीतील शेतकऱ्यांनी केला आहे. जमिनी हडपणाऱ्यांवर फौजदारी गुन्हे दाखल करा, अशी शेतकऱ्यांची मागणी असून कार्यवाही न झाल्यास तीव्र आंदोलनाचा इशारा पंडित कातड पाटील यांनी दिला आहे. मात्र, काही शेतकऱ्यांनी व्यवहारात गैरप्रकार झाला नसल्याचा दावा केला असून, हा संपूर्ण व्यवहार कायदेशीर असल्याचा खरेदीदारांचा दावा आहे.आपल्या मागण्यांकडे लक्ष वेधण्यासाठी मातोरी ग्रामस्थांनी गत आठवड्यात जिल्हाधिकारी कार्यालयासमोर धरणे आंदोलन केले. गायरानाची २०४ एकर जमीन हडपण्याच्या प्रकरणात शिवसेनेचे स्थानिक नेते तसेच, भाजपच्या माजी खासदाराचा हात असल्याचा त्यांचा आरोप आहे. पोलिस दखल घेत नसल्याने जिल्हाधिकारी कार्यालयासमोर आंदोलन करण्यात आले. मात्र, अजूनही त्यावर ठोस कार्यवाही न झाल्याने आंदोलन तीव्र करण्याचा इशारा कातड यांनी दिला आहे.
शिवसेना महानगरप्रमुख अजय बोरस्ते, माजी खासदार प्रतापदादा सोनवणे, यासह अमित बोरस्ते, सोनवणे यांची कन्या सोनिया सोनवणे, वैशाली पिंगळे, निखील बस्ते, रमेश पिंगळे यांचा या प्रकरणात समावेश असल्याचा शेतकऱ्यांचा आरोप आहे. आरोपींमध्ये राजकीय पदाधिकारी असल्यानेच पोलिस कारवाई करीत नसल्याचे शेतकऱ्यांचे म्हणणे आहे. कार्यवाही न झाल्याने शेतकरी आक्रमक झाले आहेत. पंच व दलालांनी दिशाभूल केल्याचे शेतक-यांचे म्हणणे आहे. लोकप्रतिनिधींचा यात समावेश असल्याने चांगलीच चर्चा रंगली आहे.
जमीन व्यवहारात गैरप्रकार नाही
दरम्यान, जमिनीची विक्री करणाऱ्या ७२ शेतकऱ्यांनी या व्यवहारात कोणताही गैरप्रकार झाला नसल्याचा दावा जिल्हाधिकाऱ्यांना दिलेल्या निवेदनात केला आहे. एका बड्या विकसकाचा या जमिनीवर डोळा असून, कवडीमोल भावात ती लाटण्याचा प्रयत्न त्याने केला होता. मात्र, त्यांना ही जमीन न मिळाल्याने गावातील काही लोभी लोकांना हाताशी धरून खोट्या केसेस केल्या. संबंधित विकसकाची कंपनी न्यायालयात गेली. मात्र, मनाई हुकूम मिळाला नाही. आम्ही स्वखुशीने ही जागा विकली असून, काही दलाल या प्रकरणाला वेगळे वळण देण्याचा प्रयत्न करीत असल्याचा आरोप विष्णू बर्वे, प्रल्हाद पिंगळे, जगन पिंगळे यांसह ७२ शेतकऱ्यांनी या निवेदनाद्वारे केला आहे.
काय आहे हे प्रकरण?
मातोरीत शेतकऱ्यांच्या मालकीचे २०४ एकर गायरान आहे. ही जागा पडून असल्याने ती विकण्याचा निर्णय घेतला. २८८ शेतकऱ्यांनी सहा पंच नेमून जमीन विक्रीचे अधिकार त्यांना दिले. पंचांनी २०१० मध्ये दोन लाख रुपये प्रती एकरप्रमाणे एका खासगी कंपनीशी व्यवहार केला. टोकन म्हणून २५ लाख रुपये स्वीकारल्याचे तसेच दोन कोटी ९७ लाख रुपये बँकेत जमा झाल्याचे शेतकऱ्यांना सांगण्यात आले. दुय्यम निबंधक कार्यालयात बोलावून कंपनीच्या नावाखाली खरेदीखत न करता बोरस्ते, सोनवणे यांच्या नातलगांना ही जमीन विकल्याचा शेतकऱ्यांचा आरोप आहे. आमच्या नावे बँकेत पैसे जमा झाल्याचे सांगून पंच आणि दलालांनी दिशाभूल केल्याचाही त्यांचा दावा आहे.
गायरान जमीन व्यवहारात शेतकऱ्यांची फसवणूक करणारे दलाल, पंच यांच्यावर फसवणुकीसारखे फौजदारी गुन्हे दाखल करावेत, अशी आमची मागणी आहे. त्यासाठी आम्ही ७ एप्रिल रोजी मंत्रालयात मुख्यमंत्री, महसूलमंत्री आणि गृहराज्यमंत्र्यांना निवेदन देणार आहोत. शेतकऱ्यांच्या मागण्यांची दखल घेऊन त्यांनी योग्य कार्यवाही करावी, अशी आमची अपेक्षा आहे. तसे न झाल्यास आम्ही त्यांना घेराव घालणार आहोत.
- पंडित कातड
हा संपूर्ण व्यवहार पारदर्शी असून, साठपेक्षा जास्त लोकांचा त्यामध्ये समावेश आहे. सहायक निबंधकांकडे अधिकृतरित्या नोंदणी झाली असून, सातबाऱ्यावर आमची नावे लागली आहेत. काही विकसक गावातील लोभी लोकांना हाताशी धरून ब्लॅकमेल करण्याचा प्रयत्न करीत आहेत. या सर्वांविरोधात फौजदारी आणि अब्रू नुकसानीचा दावा दाखल करणार आहोत.
- अजय बोरस्ते, महानगरप्रमुख शिवसेना
मोबाइल अॅप डाउनलोड करा आणि राहा अपडेट
