म. टा. प्रतिनिधी, नाशिक
शहरात अवैधरित्या वाळू घेऊन येणाऱ्या वाहनांवर कारवाईचा बडगा उगारण्याचे काम जिल्हा प्रशासनाकडून सुरूच आहे. शनिवारी रामनवमीच्या दिवशीही द्वारका, पाथर्डी फाटा आणि विल्होळी परिसरात मंडळ अधिकाऱ्यांनी १३ गाड्या पकडून त्यांच्याकडून सुमारे सहा लाखांचा दंड वसूल केला.
'वाळू'चे वळू ही वृत्तमालिका महाराष्ट्र टाइम्सने प्रसिध्द केली. मालिका प्रसिध्द झाली तेव्हापासून जिल्हा प्रशासनही खडबडून जागे झाले आहे. गौण खनिजांसारख्या सरकारची मालमत्तेची चोरी रोखण्यासाठी जिल्हा प्रशासनाने बाह्या सरसावल्या आहेत. सरकारला कुठल्याही प्रकारची रॉयल्टी न भरता परस्पर गौण खनिजांची वाहतूक आणि व्यवहार करणाऱ्यांना जिल्हा प्रशासनाने लक्ष्य केले आहे. याखेरीज वाहतुकीचे नियम धाब्यावर बसवून गौण खनिजांची सर्रास वाहतूक करणाऱ्यांवरही दंडात्मक कारवाईचा बडगा उगारण्याचे आदेश मंडळ अधिकाऱ्यांना देण्यात आले आहेत. गेल्या चार ते पाच दिवसांपासून सातत्याने चोरटी वाहने पकडण्यात येत असून, त्यांच्याकडून मोठ्या प्रमाणावर दंडही वसूल केला जात आहे.
जिल्ह्यातील लोहोणेर, कळवण या सारख्या काही भागांमधून चोरीची वाळू नाशिक आणि नाशिक बाहेर जातेच. परंतु, त्याचबरोबर अहमदनगर जिल्ह्यातील कोपरगाव येथूनही मोठ्या प्रमाणावर चोरीची वाळू नाशिकमध्ये दाखल होत असल्याचे कारवायांवरून स्पष्ट होत आहे. शनिवारी शिंदे, देवळालीगाव आणि नाशिक मंडळाधिकाऱ्यांनी वेगवेगळ्या ठिकाणी १३ गाड्यांवर कारवाई केली. विल्होळी आणि पाथर्डी फाटा येथे कारवाईदरम्यान पथकाला मुरूम आणि दगडाची बेकायदा वाहतूक केली जात असल्याचे आढळून आले. काही वाहनांमध्ये पूर्णपणे अवैधरित्या वाहतूक होत असल्याचे तर काही वाहने नियम धाब्यावर बसवून वाहतूक करीत असल्याचे आढळून आले.
द्वारका परिसरातही वाळू वाहतूक करणाऱ्या आठ गाड्या अडविण्यात आल्या. त्यापैकी चार गाड्यांमधून बेकायदा वाहतूक होत असल्याचे तपासणीदरम्यान स्पष्ट झाले. काही वाहनांवर क्रमांकच नसल्याचे समजते. बेकायदा वाहतूक करणाऱ्या चार वाहनांकडून दंड आकारण्यात आला आहे. चार वाहनांनी रॉयल्टी भरून वाळू आणली होती. त्यामुळे त्यांना सोडण्यात आल्याची माहिती तहसीलदार गणेश राठोड यांनी दिली.
मोबाइल अॅप डाउनलोड करा आणि राहा अपडेट
