मनसे-राष्ट्रवादी युतीमुळे मोठ्या फेरबदलांची शक्यता
म. टा. खास प्रतिनिधी, नाशिक
महापालिकेच्या स्थायी समितीची निवडणूक आटोपताच आता प्रभाग समित्यांच्या सभापतीचा बिगूल वाजला आहे. सहा प्रभागांच्या निवडणुकांचा कार्यक्रम जाहीर झाला असून येत्या ८ आणि ९ एप्रिलला सहाही समित्यांच्या सभापतींची निवडणूक होणार आहे. स्थायी समितीच्या वेळी मनसे, राष्ट्रवादी, काँग्रेस महाआघाडीमुळे प्रभाग समित्यांचे समिकरणे बदलणार आहेत. त्यामुळे प्रभाग समित्यांवरील शिवसेना भाजपचे वर्चस्व संपुष्टात येण्याची शक्यता आहे.
महापालिकेअंतर्गत असलेल्या सिडको, सातपूर, नाशिकरोड, पंचवटी, नाशिक पूर्व आणि नाशिक पश्चिम या सहा प्रभाग समित्यांच्या निवडणूकांचा कार्यक्रम जाहीर झाला आहे. त्यात ८ एप्रिलला सातपूर, सिडको आणि नाशिकरोडच्या तर ९ तारखेला नाशिक पश्चिम, नाशिक पूर्व आणि पंचवटीच्या निवडणूका होणार आहे. गेल्या वेळेस मनसे, शिवसेना आणि भाजपने संगणमत करून प्रभाग समित्यांची निवडणूक बिनविरोध करत आपले वर्चस्व निर्माण केले होते. गत वेळी भाजप, शिवसेना आणि मनसेला प्रत्येकी दोन प्रभाग समित्या मिळाल्या होत्या.
महाआघाडीचे पारडे जड
स्थायी समितीत आता महापालिकेत चित्र बदलल्याने प्रभाग समित्यांमध्येही त्याचा प्रभाव दिसणार आहे. मनसे, राष्ट्रवादी, काँग्रेस आणि अपक्षांनी एकत्रित मोट बांधल्याने प्रभाग समित्यांचे चित्र आता वेगळे दिसणार आहे. त्यात शिवसेना-भाजपपासून मनसे दूर गेल्याने युतीची ताकद कमी झाली आहे. नाशिक पूर्व विभागात मनसेची ताकद असतांनाही गेल्या वेळेस भाजपला सभापतीपद मिळाले होते. मात्र, आता मनसे - ९ आणि राष्ट्रवादी - ५, काँग्रेसचे - ४ आणि अपक्ष - ३ असे तब्बल २४ पैकी २१ सदस्यांचे बळ महाआघाडीकडे आहे. त्यामुळे भाजपला या प्रभागावर पाणी सोडावे लागणार आहे. तर नाशिक पश्चिममध्येही महाआघाडीचे १४ पैकी ९ सदस्य आहेत. तर सिडकोत महाआघाडीचे २२ पैकी १२ सदस्य आहेत. सातपूर, नाशिकरोड व पंचवटीतही महाआघाडीचेच वर्चस्व आहे. त्यामुळे प्रभाग समितीच्या सभापतीपदावरून शिवसेना-भाजप हद्दपार होण्याची शक्यता आहे.
गेल्या वेळी विधानसभा निवडणूका असल्याने मनसेने काँग्रेस-राष्ट्रवादीऐवजी युतीशी हातमिळवणी केली होती. आता कोणत्याही निवडणूका नसल्याने आणि स्थायीत महाआघाडीची मोट बांधली गेल्याने राष्ट्रवादी, मनसे आणि काँग्रेसमध्ये सभापतीच्या विभागणी केली जाण्याची शक्यता आहे. त्यामुळे प्रथमच शिवसेना-भाजपला कडवा संघर्ष करावा लागणार असल्याची चिन्हे आहेत.
काँग्रेसचा दावा सर्वाधिक
महाआघाडीत मनसे, राष्ट्रवादी आणि अपक्षांना महापालिकेत पदे मिळाली आहेत. मात्र, काँग्रेसला कोणतेही पद मिळालेले नाही. त्यामुळे काँग्रेसकडून अधिकाधिक समित्यांवर दावा सांगितला जाणार आहे. सहापैकी तीन समित्यावंर काँग्रेसकडून दावा सांगितला जाणार असून त्यासाठी राष्ट्रवादी आणि मनसेवर अधिक दबाव टाकला जाणार आहे.
मोबाइल अॅप डाउनलोड करा आणि राहा अपडेट
