म. टा. वृत्तसेवा, त्र्यंबकेश्वर
त्र्यंबकेश्वर मंदिराच्या पूर्वदरवाजा दर्शनबारी आराखड्यास राष्ट्रीय स्मारक प्राधिकरणाचा हिरवा कंदील मिळाला असून, येत्या काही दिवसात प्रत्यक्ष कामास प्रारंभ होण्याची शक्यता आहे.
विश्वस्त मंडळाने पुरातत्व विभागाच्या नियमावलीस अनुसरून आराखडा मंजूर करण्यासाठी वरिष्ठ कार्यालयात पाठपुरावा केला. दि. १८ मार्च २०१५ रोजी काही अटी शर्तीवर मंजुरी मिळवली आहे. दरम्यान, दर्शनबारी मार्ग पक्क्या बांधकामात करावयाचा नसून, गरज पडल्यास काढता येईल असा कारावयचा आहे. त्याकरिता वापरावयाचे बांधकाम साहित्य नमूना प्राधिकरणास सादर करावयाचे आहे. तसेच, हे दर्शनबारी आराखडा हा मंदिराच्या लगत असल्याने त्यापासून नियमित केलेल्या अंतरावर पाण्याची टाकी तसेच स्वच्छतागृह हे बांधकाम होणार आहे. अर्थात पूर्वदरवाजास असलेला भराव काढण्यास मंजुरी देण्यात आली आहे. त्र्यंबकेश्वर मंदिर हे राष्ट्रीय संरक्षित स्मारकांच्या यादीत असल्याने येथे बांधकाम तसेच खोदकाम करण्यास परवानगी नाही. या कारणांनी दर्शनबारी आराखडा अनेक वर्षांपासून रखडला आहे. त्यास कैलास घुले आणि सचिन पाचोरकर यांनी पुरातत्व खात्याच्या सूचनांप्रमाणे बदल करीत अनुमती मिळवली आहे. त्याकरिता वारंवार राजधानी दिल्लीस्थित कार्यालयापर्यंत पाठपुरावा केला आहे.
या कामांचा समावेश
पूर्वदरवाजा दर्शनबारी आराखड्यात दर्शनबारी मार्ग, स्वच्छतागृह, औषधे व अल्पोपहार सुविधा, चहापान, बगीचा विकसन, कंपाऊंड, भूमिगत पाण्याची टाकी व स्वच्छतागृहाची दुरुस्ती व आणखी स्वच्छतागृह आदी.
मोबाइल अॅप डाउनलोड करा आणि राहा अपडेट
