ऋतुरंग परिवारातर्फे शनिवार, २१ मार्चला, पहाटे ५:३० वा. ऋतुरंग भवन, नाशिकरोड येथे गुढीपाडव्याच्या मंगलदिनी किराणा-आग्रा गायकीच्या घराण्याच्या प्रख्यात गायिका, शैला दातार यांचे सुश्राव्य गायनाने पाडवा पहाट सजणार आहे. यानि‌मित्त या एका सुखद प्रवासा विषयी...
नाशिकरोड स्थित ऋतुरंग परिवाराने २००१ पासून सातत्याने हिंदू कालगणनेनुसार येणाऱ्या नवीन वर्षाचे स्वागत 'पाडवा पहाट' या अनोख्या कार्यक्रमाद्वारे अभिजात शास्रीय संगीताच्या सुमधुर गायनाने करायचा रिवाज चालू ठेवला आहे. नवचैतन्याची रंगीबेरंगी गुढी, पहाटेच्या मंद शीतल वाऱ्याच्या झुळका अंगावर झेलत, आसमंतात दरवळणारा टवटवीत मोगऱ्याच्या सुगंधाचा परिमळ अशा उत्साहपूर्ण वातावरणात साजरा होणारा पहाट पाडवा कलाकार व संगीतदर्दींची दाद न घेऊन गेला. म्हणूनच आजपर्यंत साजऱ्या होणाऱ्या या कार्यक्रमाला ऋतुरंग परिवाराचे नेटके आयोजन व त्याला नामवंत शास्रीय गायकांची पेशकश यामुळे एक खास दर्जा प्राप्त झाला आहे व पर्यायाने त्याने रसिकांच्या मनात मानाचे स्थान पटकावले आहे. आजपावेतो मालिनी राजूरकर, श्रुती सडोलीकर, प्रभाकर कारेकर, आरती अंकलीकर-टिकेकर, पं. उल्हास बापट अशा दिग्गज कलाकारांनी हजेरी लावलेला पाडवा पहाट रसिकांच्या मनांत घर करून बसला आहे.
अशाच दिग्गजांच्या पंगतीत मानाचे स्थान असलेल्या किराणा-आग्रा घराण्याच्या गुणी गायिका, शैला दातार या वर्षाची पाडवा पहाट सजवणार आहेत. अभिजात संगीताचा वारसा लाभलेल्या सरदेसाई कुटुंबात १९५३ साली शैलाताईंचा जन्म झाला. लहानपणापासुनच त्यांना विख्यात गायक पं. वसंतराव देशपांडे यांचे शिष्यत्व लाभण्याबरोबरच तबलावादनाचे देखील धडे गिरवता आले. देवगंधर्व पं. भास्करबुवा बखले यांचे नातू, पं. सुधीर दातार यांच्याशी विवाह पश्चात त्यांचेदेखील त्यांना मोलाचे मार्गदर्शन लाभले. शासनाची शिष्यवृत्ती मिळाल्यानंतर त्यांनी किराणा-आग्रा गायकीचा सखोल अभ्यास प्रख्यात गायिका, पंडिता माणिक वर्मा व त्यानंतर पं. गजानन बुवा जोशी यांच्या मागदर्शनाखाली केला.
पं. भास्कर बुवा बखले यांच्या गायकीचा तसेच त्यांनी ख्याल, ठुमरी, नाट्यसंगीत प्रकारचा त्यांचा अभ्यास दांडगा आहे. त्याकरिता त्यांना पं. राम मराठे, मल्लिकार्जुन मन्सूर व स्वराज छोटा गंधर्व अशा दिग्गज गायकांचे मोलाचे मार्गदर्शन लाभले आहेत. त्यांच्या या अथक संशोधनातूनच साकारला गेलेला, पं. भास्कर बुआ बखले यांचा संगीत चरित्रपट -'देवगंधर्व' हा अनेक होतकरू संगीत व नाट्य संशोधन करणाऱ्या विद्यार्थ्यांना मोलाचा मार्गदर्शक म्हणून सिद्ध झाला आहे. याचबरोबर त्याने पं. भास्कर बुवा बखले यांच्या अनेक दुर्मिळ बंदिशा यांचे संपादन केलेल्या-'मधुसंचयन' हा ग्रंथदेखील आज मोलाचे स्थान पटकावून बसला आहे. देवगंधर्व बखलेबुवा ट्रस्टच्या विश्वस्त व भारत गायन समाज, पुणे यांच्या अध्यक्षा या नात्याने तरुण होतकरू विद्यार्थ्यांना संगीताचे शिक्षण देण्याबरोबरने त्याने आजवर अनेक नामांकित संगीत मैफिली, जसे की, पं. भास्करबुवा बखले संगीत समारोह, सवाई गंधर्व महोत्सव, अल्लादियाखासाहेब संगीत मैफल, पं. राम मराठे संगीत समारोह, पं. मल्लिकार्जुन मन्सूर स्मृती समारोह, डाॉ. वसंतराव देशपांडे संगीत समारोह गाजविलेल्या आहेत. यांच्याच जोडीला त्यांचे पं. छोटा गंधर्व, पं. जितेंद्र अभिषेकी अशा मातबर गायकांबरोबर नाट्यसंगीताचे अनेक कार्यक्रम रंगवण्याचे भाग्य त्यांना लाभले आहे.
अनेक मानाचे पुरस्कार, जसे की, साहित्यसम्राट न. चि. केळकर पुरस्कार, महामहोपाध्याय दत्तो वामन पोतदार पुरस्कारांबरोबरच साहित्य, नाट्य क्षेत्रातल्या नामवंत संस्था, आखिल भारतीय नाट्य परिषद, महाराष्ट्र साहित्य परिषद, नाट्यदर्पण व शासनाचे सर्वोत्तम पुरस्कार मानचिन्हाने त्यांना गौरविण्यात आले आहे. अशा गुणी गायिकेचे सुश्राव्य स्वर आजच्या या वर्षाच्या पहिल्यावहिल्या मंगलदिनी आपल्या कानी पडण्याचा योग जुळून यावा हे आपले सर्वांचे भाग्यच !
सदर कार्यक्रमास विख्यात संतूर वादक पं. उल्हास बापट यांची विशेष उपस्थिती लाभणार आहे तसेच प्रख्यात संगीतकार व गायक, पं. हृदयनाथ मंगेशकर यांच्या शुभेच्छा सदर कार्यक्रमास लाभल्या आहेत. यंदादेखील ऋतुरंग परिवारातर्फे शनिवार, दिनांक २१ मार्च २०१५ रोजी, पहाटे ५:३० वा. ऋतुरंग भवन, नाशिकरोड येथे गुढीपाडव्याच्या मंगलदिनी किराणा-आग्रा गायकीच्या घराण्याच्या प्रख्यात गायिका, शैला दातार यांचे सुश्राव्य गायनाने पाडवा पहाट सजणार आहे.
देवगंधर्व पं. भास्करबुवा बखले यांच्या नातसून असलेल्या शैला दातार यांचा त्यांच्या गायकीचा व त्यांच्या ठुमरी, ख्याल नाट्यसंगीत या गानविष्काराचा दांडगा अभ्यास आहे. लहानपणापासून त्यांना पं. डॉ. वसंतराव देशपांडे, पंडिता माणिक वर्मा, पं. राम मराठे, स्वरराज छोटा गंधर्व व पं. मल्लिकार्जून मन्सूर यांचे मार्गदर्शन व आशिर्वाद लाभले आहेत. देवगंधर्व पं. भास्करबुवा बखले ट्रस्टच्या विश्वस्त व पुणेस्थित त्यांनी स्थापलेल्या भारत गायन समाजाच्या विद्यमान अध्यक्षा या नात्याने त्या आजही अनेक तरुण गायकांना विद्यार्जन करीत आहेत. विद्यार्थ्यांना मार्गदर्शनाबरोबरीने त्यांनी अनेक दिग्गज कलाकार जसे, पं. छोटा गंधर्व, पं. जितेंद्र अभिषेकी यांच्या साथीने अनेक संगीत मैफिली गाजविल्या आहेत. तसेच सवाई गंधर्व महोत्सव, पुणे, पं. भास्करबुवा बखले संगीत समारोह, डॉ. वसंतराव देशपांडे संगीत समारोहामधून देखील श्रोत्यांना मंत्र मुग्ध केले आहे. अशा गुणी गानतपस्वीच्या सुश्राव्य स्वरांनी नव वर्षाची सुरुवात होण्याचा योग ऋतुरंग परिवाराने जुळवून आणला आहे. तरी संगीत प्रेमींनी बहुसंख्येने येऊन कार्यक्रमाचा आस्वाद घ्यावा असे आवाहन ऋतुरंग परिवारातर्फे करण्यात आले आहे.
मोबाइल अॅप डाउनलोड करा आणि राहा अपडेट
