म. टा. प्रतिनिधी, नाशिक
नॅशनल फार्मा एज्युकेशन अॅण्ड रिसर्च इन्स्टिट्यूट (नायपर) नाशिकलाच आणण्याचा निर्धार नायपर कृती समितीच्या बैठकीत रविवारी करण्यात आला. उंटवाडी येथील इन्स्टिट्यूशन ऑफ इंजिनीअर्समध्ये झालेल्या या बैठकीला महापौर अशोक मुर्तडक, उपमहापौर गुरुमीत बग्गा, आमदार देवयानी फरांदे, वनाधिपती विनायकदादा पाटील यांच्यासह नाशिकमधील विविध संस्था-संघटनांचे अध्यक्ष व पदाधिकारी उपस्थित होते.
मुख्यमंत्री देवेंद्र फडणवीस यांची याच आठवड्यात बैठक घेण्याचे आमदार फरांदे यांनी यावेळी सांगितले, तर नायपरसाठी महापालिकेच्या सर्वसाधारण सभेत ठराव करण्यात येईल, अशी घोषणा उपमहापौरांनी केली. तसेच, नायपरसाठी आवश्यक प्रोजेक्ट रिपोर्ट आणि नाशिक शहराचे प्रेजझेंटेशन तयार करण्याचे या बैठकीत निश्चित करण्यात आले. त्यामुळे नायपर नाशिकला येण्याच्या दृष्टीने ठोस कार्यवाही सुरू झाली आहे. 'मटा'चे निवासी संपादक शैलेन्द्र तनपुरे यांनी प्रास्ताविक केले.
नायपरसाठी नाशिक हे सर्वोत्कृष्ट ठिकाण आहे. तरी त्यासाठी आपल्या सर्वांनाच प्रयत्न करावे लागतील. नाशिकचा नावलौकिक वाढण्यासाठी नाही तर राज्याच्या विकासालाही चालना मिळावी यासाठी नायपर नाशिकला हवी आहे.
- डॉ. दौलतराव आहेर, माजी आरोग्यमंत्री
फार्मसी कॉलेजमध्ये प्राध्यापक म्हणून काम केलेले असल्याने नायपर ही संस्था नाशिकलाच यावी अशी मनोमन इच्छा आहे. त्यासाठी मी मुख्यमंत्र्यानाही पत्र दिले आहे. आपण सर्वांनी मिळून ही मागणी केली, तर नायपर नाशिकला निश्चित येईल.
- देवयानी फरांदे, आमदार
नाशिक सर्वच आघाड्यांवर पुढे येत आहे. नायपरसारखी संस्था नाशिकला येणार असेल तर विकासाला आणखी वेग येईल. नायपरसाठी आवश्यक ती सर्व मदत करायला महापालिका सज्ज आहे.
- अशोक मुर्तडक, महापौर
नायपरसाठी राष्ट्रीय संस्था नाशिकला येण्याने राज्याच्या विकासालाही गती येणार आहे. नायपर नाशिकला व्हावे, असा ठराव महापालिकेच्या सर्वसाधारण सभेत केला जाईल आणि वेळ आली तर राज्य आणि केंद्र सरकारकडे मागणीसाठी रस्त्यावरही उतरू.
- गुरुमीत बग्गा, उपमहापौर
सर्व जागतिक सर्वेक्षणांमध्ये नाशिकचा समावेश होत आहे. त्यामुळे नाशिकला नायपर येणे स्वाभाविकच आहे. त्यासाठी लोकशाही मार्गाने आपण सर्व ते प्रयत्न करू. महापालिका, जिल्हा परिषद, ग्रामपंचायत, सहकारी संस्था या सर्वांचे ठराव मिळवू. मुख्यमंत्र्यांकडे आग्रही मागणी करून नायपर नाशिकसाठी मागू.
- वनाधिपती विनायकदादा पाटील
नाशिकमधून किमान १० मुले दरवर्षी देशभरातील विविध नायपरमध्ये उच्च शिक्षणासाठी जातात. नाशकात नायपर झाली, तर नाशिकमधील विद्यार्थ्यांना उच्चशिक्षणासाठी नाशकातच संधी मिळेल. शिवाय उच्च शिक्षण घेणाऱ्यांचे प्रमाण लक्षणीयरित्या वाढेल. राजकीय पाठबळ लाभले, तर नायपर नाशिकला नक्कीच येवू शकते. प्रारंभीच्या काळात आमच्या कॉलेजच्या परिसरातही त्याचे काम सुरू होऊ शकते.
- डॉ. दिलीपराव डेर्ले, माजी संचालक, एआयसीटी
नायपरमुळे नाशिकमध्ये उच्चशिक्षणाच्या मोठ्या संधी उपलब्ध होण्याबरोबरच नाशिक परिसरातील फार्मसी उद्योगांनाही मोठा लाभ होईल. नायपरसाठी आवश्यक तो कृती आराखडा तयार केला आणि ठोस प्रयत्न झाले, तर निश्चितच नायपर नाशिकला येईल.
- अशोक देशपांडे, मॅनेजर, ग्लॅक्सो
नाशिकचे दोन्ही खासदार, सर्व आमदार आणि सर्व संघटनांचे प्रमुख यांच्या एकत्रित प्रयत्नांना आता सुरुवात होईल असे मला वाटते. मुख्यमंत्र्यांना भेटून आपण सादरीकरण करू आणि नायपर नाशिकला आणू.
- जितेंद्र ठक्कर, अध्यक्ष, नाशिक
सिटीझन फोरम
नायपर नाशिकला येणे ही काळाची गरज आहे. आपल्याकडचे इन्फ्रास्ट्रक्चर सर्वोत्तम आहे. राजकीय बाबी बाजूला ठेवून आमचा पक्ष नायपरसाठी सर्वांसोबत आहे. वेळेप्रसंगी आंदोलन करायलाही आम्ही तयार आहोत.
- अर्जुन टिळे, शहराध्यक्ष, राष्ट्रवादी काँग्रेस
इन्क्युबेशन सेंटर आणि आर अॅण्ड डी यासारख्या बाबतीत नायपरला लागेल असे पोषक वातावरण नाशकात आहे. ही राष्ट्रीय संस्था नाशिकला येण्यासाठी आपण सर्वांनी मिळून प्रयत्न करायला हवेत.
- अपूर्वा जाखडी, स्पेस एज्युकेटर
१९९४ मध्ये नायपर नागपूरला स्थापन होणार होती. मात्र, ती चंदीगडला गेली. आता नायपर नाशकात आणण्यासाठी आपल्याला कठोर प्रयत्न करावे लागतील. त्यास यश आले, तर फार्मसी क्षेत्रात अतिशय प्रभावी असे काम येत्या काळात नाशकात होईल. राहुरी कृषी विद्यापीठ, मुक्त विद्यापीठ, आरोग्य विज्ञान विद्यापीठ आणि नायपर यांच्या संयुक्त विद्यमाने बहुविध बाबी घडू शकतील.
- डॉ. राजेंद्र भांबर, प्राचार्य, फार्मसी कॉलेज
नायपरसाठी आपण आवश्यक ती लाइन ऑफ अॅक्शन साधायला हवी. आवश्यकता असेल तर नाशिकचे एक शिष्टमंडळ दिल्लीला जावून सादरीकरण करेल. आवश्यक तो रिपोर्ट तयार करून आग्रही पाठपुरावा करावा लागेल.
- विवेक जायखेडकर, आर्किटेक्ट
वेगाने विकसित होणाऱ्या नाशिकला नायपर आले, तर मोठे यश प्राप्त करता येईल. त्यासाठी आवश्यक ती मदत करायला मी व माझा पक्ष तयार आहे. आपण सर्वांनी एकजूट करून नायपरसाठी पाठपुरावा करू या.
- रमेश पवार, पदाधिकारी, काँग्रेस
नाशिकच्या विकास होणे आवश्यक आहे. त्यासाठीच कुठलीही मदत लागली तर आमची संस्था सदैव तत्पर आहे. यापुढेही कार्यक्रमांसाठी काही योगदान लागले तर आम्ही करू. नायपर नाशिकला येण्यासाठी आम्ही आग्रही मदत करू.
- नरेंद्र बिरारी, अध्यक्ष, दि. इन्स्टिट्यूशन ऑफ इंजिनीअर्स
नाशिकमध्ये मॅन्युफॅक्चरिंग उद्योग येण्याची प्रक्रिया बंद झाली आहे. त्यामुळे नायपरसारखी सर्व्हिस इंडस्ट्री नाशिकला येणे गरजेचे आहे. मोठ्या प्रमाणात मनुष्यबळ निर्मिती होतानाच उच्च शिक्षणाची दारे यातून खुली होतील.
- श्रीधर व्यवहारे, राष्ट्रीय अध्यक्ष, निपम युवा
रोजगाराच्या संधी मिळाव्या म्हणून नाही तर उच्चशिक्षण, संशोधन, तज्ज्ञांचे मार्गदर्शन अशा पातळ्यांवर नायपर मोलाची आहे. प्रत्येक महसुली केंद्राला विद्यापीठ आहे. मात्र, नाशिकला नाही. ही मोठी खंत आहे. पक्षभेद विसरून आपण एकत्र येवू या आणि नायपरला नाशिकमध्ये आणू या.
- प्रा. सुहास फरांदे, प्रदेश प्रवक्ते, भाजप
यांची उपस्थिती लाभली
विक्रीकर सहआयुक्त सुमेरकुमार काले, अपारंपरिक ऊर्जा तज्ज्ञ डॉ. ओमप्रकाश कुलकर्णी, कॅटाफार्मा केमिकल्सचे चेअरमन डॉ. श्रीकांत कारवा, आयुर्वेद कॉलेजचे प्राचार्य एस. एल. दासरी, ट्रीपल आयडीचे चेअरमन हेमंत दुगड, महाराष्ट्र आरोग्य विज्ञान विद्यापीठाचे कुलसचिव डॉ. काशिनाथ गर्कळ, डेल्टा फिनोकेम प्रा. लि.च्या संचालक शरयू देशमुख, सामाजिक कार्यकर्ते पद्माकर मोराडे, इंडियन फार्मास्युटिकल असोसिएशनच्या नाशिक विभागाचे अध्यक्ष राजगोपाल मुंदडा.
आज प्राचार्यांची बैठक
शहरातील विविध फार्मसी आणि मेडिकल कॉलेजेसच्या प्राचार्यांची बैठक सोमवारी दुपारी चार वाजता होणार आहे. मराठा विद्याप्रसारक समाजाच्या फार्मसी कॉलेजमध्ये होणाऱ्या या बैठकीत नायपरबाबत चर्चा केली जाणार आहे.
मोबाइल अॅप डाउनलोड करा आणि राहा अपडेट