मराठमोळ्या जेवणाचा घेतला होता आस्वाद
म. टा. खास प्रतिनिधी, नाशिक
भाजपच्या ज्येष्ठ नेत्या आणि माजी परराष्ट्र मंत्री सुषमा स्वराज यांचे नाशिकसोबत जिव्हाळ्याचे नाते होते. २००४ मध्ये विधानसभा निवडणुकीदरम्यान भाजपचे उमेदवार डॉ. डी. एस. आहेर यांच्या निवडणूक प्रचारासाठी त्या शहरात आल्या होत्या. त्यावेळी स्वराज यांनी आमदार सीमा हिरे यांच्या निवासस्थानी भेट देत मराठमोळ्या जेवणाचा आस्वाद घेतला होता.
स्वराज यांनी हिरेंच्या निवासस्थानी एक तास थांबत, त्यांनी मेथीची भाजी आणि बाजरीच्या भाकरी असे मराठमोळे जेवण घेतले. या जेवणाने स्वराज तृप्त झाल्या होत्या, अशी माहिती आ. हिरेंनी दिली आहे. 'सीमा बेटा यह भोजन तुमने परोसा है, भोजन बहोत अच्छा बना है' अशी स्तुती स्वराज यांनी त्यावेळी केली. तासभराच्या भेटीदरम्यान साक्षात देवीस्वरुप भासत होत्या, अशी प्रतिक्रिया आमदार हिरे यांनी व्यक्त केली आहे. भारतीय राजकारणातील 'मदरलेडी' म्हणजेच सुषमाजी यांच्या निधनाने आम्हा सर्वांना मातृछत्र हरपल्यासारखे झाले आहे. सुषमाजी म्हणजे साक्षात मॉ दुर्गा- मॉ सरस्वती व लक्ष्मी माता स्वरुप होत्या सुषमाजींच्या जाण्याने परिवारातील मातृतूल्य व्यक्तिमत्त्व हरपल्याची प्रतिक्रिया हिरे यांनी व्यक्त केली आहे.
भाजप कार्यालयात आज शोकसभा
नाशिक : सुषमा स्वराज यांना श्रद्धांजली वाहण्यासाठी नाशिक महानगर भाजपतर्फे गुरुवारी (दि. ८) सायंकाळी चार वाजता वसंतस्मृती कार्यालयात सर्वपक्षीय शोकसभेचे आयोजन करण्यात आले आहे. पक्षाचे सर्व खासदार, आमदार, पदाधिकारी, कार्यकर्ते यांनी मोठ्या संख्येने उपस्थित रहावे, असे आवाहन महानगराध्यक्ष आमदार बाळासाहेब सानप यांनी केले आहे.
नाशिकमध्ये भाजप महिला आघाडीचे राज्यस्तरीय अधिवेशन १९९६ मध्ये झाले होते. त्याच्या उद्घाटनास स्वराज या केंद्रीय मंत्री असतांनाही आल्या होत्या. महिलांना राजकारणात ३३ टक्के आरक्षण मिळावे, अशी आग्रही मागणी त्यावेळी केली. वेळात वेळ काढून त्या घरीही आल्या. त्यांच्या अंगी अतिशय नम्रपणा होता. त्यांचा हाच गुण सर्वांना भावत असे. आमची खूप चांगली मैत्री होती. आज मी मैत्रीण गमावली आहे.
- निशिगंधा मोगल, माजी आमदार
भाजपचे २००१ मध्ये आग्रा येथे राष्ट्रीय अधिवेशन होते. त्यावेळी नाशिकच्या युवतींना घेऊन जाण्याची जबाबदारी माझ्याकडे होती. त्या अधिवेशनात एकाच रंगाची साडी परिधान केलेल्या आमच्या ग्रुपकडे सगळ्यांचे लक्ष गेले. सुषमा स्वराजही आमच्याजवळ आल्या. त्यांनी आस्थेने चौकशी केली. आमचे कौतुक केले तसेच आमच्यासोबत फोटोही काढला. इतक्या मोठ्या नेत्या असतानाही तसा आविर्भाव त्यांच्याकडे नव्हता. यामुळे आम्ही भारावून गेलो होतो.
- भारती बागूल,
पदाधिकारी, भाजप महिला आघाडी
भाजपचे लोकसभेचे तत्कालीन उमेदवार डॉ. दौलतराव आहेर यांच्या प्रचारासाठी ८ ऑक्टोबर २००४ रोजी सुषमा स्वराज यांची कालिदास कलामंदिरात सभा झाली होती. त्यांचे स्वागत करण्यासाठी बडोपंत जोशी, सतीश कुलकर्णी, दशरथ पाटील, सत्यभामा गाडेकर, योगेश भगत आदी आम्ही गोल्फ क्लब मैदानाच्या ठिकाणी गेलो. साधी राहणी पण उच्च विचारसरणी त्यांची होती. त्यांचा मनमिळावू स्वभाव अजूनही स्मरणात आहे. अशा नेत्या होणे नाही.
- सुजाता करजगीकर,
पदाधिकारी, भाजप महिला आघाडी
जनसेवा व सर्वसामान्यांचे जीवन सुखकर व्हावे या उदात्त ध्येयाने सुषमा स्वराज यांनी आपले आयुष्य वेचले. सामान्यांशी संवाद आणि प्रश्न सोडवण्याचे विलक्षण कौशल्य त्यांच्याकडे होते. समूहाशी आपल्या ओघवत्या वक्तृत्त्वाने त्यांनी अनोखे नाते जोडले होते. सर्व राजकीय पक्षातील नेत्यांमध्ये त्यांचे आदरयुक्त स्थान होते. निष्कलंक आणि प्रशासनावर घट्ट पकड असलेले त्यांचे संस्कारी व्यक्तिमत्व होते. देश कणखर नेतृत्त्वाला मुकला आहे.
- विश्वास ठाकूर, कार्याध्यक्ष,
यशवंतराव चव्हाण प्रतिष्ठान, मुंबई विभागीय केंद्र, नाशिक
