मेरी हायस्कूलतर्फे वृक्षारोपण
वृक्षारोपण करणे व वृक्षांचे जतन करून पर्यावरणाचा समतोल राखण्यासाठी प्रयत्न करणे काळाची गरज असल्याचे प्रतिपादन मुख्याध्यापक प्रियंका निकम यांनी केले. पर्यावरणाच्या रक्षणासाठी व समतोल राखण्यासाठी मेरी हायस्कुल मधील स्काऊट व गाईड विभागाचे वतीने केलेला प्रयत्न कौतुकास्पद आहे असे उपप्रमुख नरेंद्र मोहिते यांनी सांगितले. शिक्षक प्रतिनिधी व शिक्षक मंडळ उपाध्यक्ष दिलीप अहिरे यांच्या संकल्पनेतून विभागाच्या सर्व शिक्षक व विद्यार्थी यांनी वृक्षारोपण करून संवर्धनासाठी प्रयत्न करण्याचा निर्धार केला. यावेळी मनोहर कुलकर्णी, यशश्री रत्नपारखी, कविता खोटरे, कांचन कोथळकर, यशश्री कुलकर्णी आदी उपस्थित होते.
- -
स्ट्रॉबेरी इंग्लिश शाळेत फॅन्सी ड्रेस स्पर्धा
स्ट्रॉबेरी इंग्लिश माध्यमिक शाळेने पीजी आणि मिनी केजी विद्यार्थ्यांसाठी पालकांसह एक फॅन्सी ड्रेस स्पर्धा आयोजित केली. स्पर्धा आयोजित करण्याचा हेतू फक्त मजेने शिकण्याबरोबरच विद्यार्थ्यांचा आत्मविश्वास वाढविणे आणि प्रेक्षकांच्या समोर बोलणे आणि त्यांच्या पालकांशी मजबूत नातेसंबंध जोडण्याची संधी देऊन त्यांचा आत्मविश्वास वाढविणे हाच होता. फॅन्सी ड्रेस युवा आणि पालकांसाठी देखील सर्वात रोमांचकारी गोष्टींपैकी एक आहे. स्पर्धेमध्ये पालकांनीदेखील त्यांच्या मुलांसह भाग घेतला होता. गणपती स्तोत्र आणि शाळेची शपथ घेऊन स्पर्धा सुरू झाली. परीक्षक सोनिया भट्ट आणि जेम्स इमॅन्युएल यांना संचालिका सायली काळे आणि प्राचार्य मणप्रीत कौर यांनी सन्मानित केले. फॅन्सी ड्रेस ड्रेसची थीम अतिशय अनोखी होती. फॅन्सी ड्रेस स्पर्धेच्या माध्यमातून त्यांनी समाजाला स्वच्छता, वृक्ष संवर्धन, राष्ट्रीयता, संस्कृती आदींबद्दल संदेश दिला. स्पर्धा विद्यार्थ्यांसाठी एक उत्तम शिक्षण अनुभव असल्याचे सिद्ध झाले आणि त्यांना त्यांच्यातील छोट्या छोट्या प्रतिभांचा शोध घेण्यासाठी मंच उपलब्ध झाला. मनप्रीत आणि पीजी आणि मिनी केजी शिक्षकांच्या समन्वयाने यशस्वीरित्या स्पर्धा आयोजित केली गेली.
- -
इस्पॅलिअर शाळेत कारगिल दिनानिमित्त सांस्कृतिक कार्यक्रम
देशासाठी युद्धभूमीवर शत्रूशी सामना करत लढाई जिंकलेल्या कारगिल युद्धातील जवानांना इस्पॅलियर स्कूलमधील विद्यार्थ्यांना अनोख्या पद्धतीने वंदन करत विजय दिनानिमित्त विजयोत्सव साजरा केला. यावेळी इयत्ता सहावीतील विद्यार्थ्यांनी जवानाची मुलगी आणि वडील यांचे नाते उलगडून दाखविण्याचा प्रयत्न केला. विशेष म्हणजे, स्केटिंगच्या सहाय्याने देशभक्तीपर गीतांवर नाट्य-नृत्य सादर करत सर्वांचेच लक्ष वेधून घेतले. युद्धीभूमीवर शहीद झालेल्या जवानाच्या कुटुंबियांची अभिमानास्पद वाटणारी भावना, पत्नीचे व मुलांची प्रेरणा असा प्रवास यावेळी नृत्याविष्कारातून उलगडून दाखविण्यात आला. शिक्षक राहुल जगताप यांनी विद्यार्थ्यांना मार्गदर्शन केले. यावेळी शाळेचे प्रमुख सचिन जोशी, डॉ. प्राजक्ता जोशी, मुख्याध्यापिका अंकिता कुरिया आदी उपस्थित होते.
- -
रासबिहारी शाळेत पालक-शिक्षक संघाची स्थापना
रासबिहारी इंटरनॅशनल स्कूलमध्ये पालक आणि शाळा यामधील दुवा असलेली शैक्षणिक वर्ष २०१९-२० साठी पालक-शिक्षक संघ स्थापना झाली. यावेळी शाळेमध्ये सरकारमान्य नियमावलीप्रमाणे नवीन पालक शिक्षक संघासाठी पालक प्रतिनिधी, संयुक्त सचिव, वाहतूक सचिव आणि उपाध्यक्ष यांची निवड करण्यात आली. सर्व शिक्षक व शिकक्षेतर कर्मचाऱ्यांच्या सहाय्याने प्रिया सोनवणे, निवेदिता कमोद आणि बिंदु विजयकुमार यांनी निवडणूक प्रक्रिया पार पाडली.
- -
रायफल शूटिंगमध्ये ग्रिष्माचे यश
कौन्सिल फॉर दि इंडियन स्कूल सर्टिफिकेट एक्झामिनेशनतर्फे आयोजित रिजनल स्पोर्ट्स् व गेम्स २०१९च्या आंतरशालेय रायफल शूटिंग स्पर्धेत फ्रवशी अॅकॅडमीची ग्रिष्मा लोखंडे या विद्यार्थिनींनी एअर पिस्तुल प्रकारात प्रथम क्रमांक पटकावून राष्ट्रीय स्पर्धेसाठी आपले स्थान निश्चित केले आहे. आर. एस. लथ एज्युकेशन ट्रस्टच्या व्यवस्थापकीय मंडळाने ग्रिष्माच्या या उत्कृष्ट कामगिरीचे कौतुक केले आहे.
- -
प्राथमिक विद्यालय उंटवाडी शाळेत कारगिल दिन
नाशिक एज्युकेशन सोसायटीच्या प्राथमिक विद्यालय उंटवाडी शाळेत कारगिल युद्धातील पराक्रमी वीर शहीद जवानांना श्रद्धांजली अर्पण करण्यात आली. शाळेतील कब-बुलबुलचे विद्यार्थी व मुख्याध्यापिका, शिक्षक यांनी मेणबत्ती पेटवून सामूहिक गीत 'आझादी की खुली हवा में' गायन करून युद्धातील जवानांना श्रद्धांजली वाहिली. शाळेच्या मुख्याध्यापिका राजश्री खोडके यांनी जवानांनी केलेल्या कार्याचा पराक्रम सर्वांना सांगितला. प्रज्ञा जोशी यांनी कारगिल युद्धाचा इतिहास सर्वांना सांगितला. यावेळी शाळेच्या ज्येष्ठ शिक्षिका कल्पना भामरे, सुनंदा साळुंखे, भावना जगताप, तृप्ती बडगुजर, भगवंत महाले, महेंद्र गवळी व सर्व शिक्षक, विद्यार्थी उपस्थित होते.
