म. टा. खास प्रतिनिधी, नाशिक
लोकसभा निवडणुकीत नाशिक पूर्व विधानसभा मतदारसंघात युतीच्या हेमंत गोडसे यांना तब्बल पाऊणलाखाचे मताधिक्य मिळाल्याने भाजपचे विद्यमान आमदार बाळासाहेब सानप यांच्यासमोर शिवसेनेतील इच्छुकांसह त्यांच्याच शिष्यांनी आव्हान उभे केले आहे.
आमदार सानप आणि पालकमंत्री गिरीश महाजन यांचे संबंध बिघडल्याच्या कथित पार्श्वभूमीवर शिवसेनेसह भाजपमधील इच्छुकांना दिवसाही आमदारकीची स्वप्ने पडू लागली आहेत. खासदार गोडसे यांचे चुलत बंधू आणि कामगार नेते जगदीश गोडसे यांनीही शड्डू ठोकल्याने चुरस वाढली आहे. मनसे, काँग्रेस, राष्ट्रवादीच्या महाआघाडीकडून मनसेचे राहुल ढिकले गेल्या वर्षापासून तयारीत असल्याने पूर्वमधील लढत रंगतदार होणार असल्याचे चित्र आहे.
शहरातील तीन मतदारसंघांपैकी सर्वाधिक विस्तार असलेला आणि सिंहस्थ कुंभमेळ्यामुळे धार्मिकनगरीसह अर्धशहरी आणि ग्रामीण अशी ओळख असलेला हा मतदारसंघ आहे. शेतकरी आणि कामगारांची संख्याही मोठी आहे. पंचवटी, तपोवन, नाशिकरोड या तीन विभागांमध्ये या मतदारसंघाची रचना असून, या मतदारसंघाचा कौलही नेहमीच भाजप-शिवसेना आणि मनसेकडे म्हणजेच सर्वसाधारण हिंदुत्ववादी पक्षांकडे राहिला आहे. विशेष म्हणजे महापालिका निवडणुकीत तर या मतदारसंघात सर्वाधिक नगरसेवक भाजप आणि शिवसेनेचेच निवडून आले आहेत. त्यामुळे साहजिकच युतीचा बालेकिल्ला म्हणून या मतदारसंघाकडे पाहिले जाते. लोकसभा निवडणुकीत या मतदारसंघातून शिवसेनेच्या हेमंत गोडसे यांना तब्बल ७६ हजार २६८ मतांचे मताधिक्य मिळाले आहे. परिणामी या मतदारसंघातील भाजपसह शिवसेनेच्या इच्छुकांचीही उमेदवारी मिळविण्यासाठी लढाई सुरू झाली आहे. गेल्या वेळेस शिवसेना आणि भाजप स्वतंत्रपणे लढले तेव्हा आमदार सानप यांनी ४४ हजार मतांनी विजय मिळविला होता. लोकसभा निवडणुकीत गोडसेंचे मताधिक्य वाढल्याने सर्वाधिक इच्छुकांची संख्या ही भाजपमध्येच अधिक आहे. त्यातच आमदार सानप आणि पालकमंत्री महाजन यांच्यात फारसे सख्य राहिले नसल्याच्या बातम्यांमुळे अनेक नगरसेवकांनी थेट उमेदवारीवरच दावा ठोकायला सुरुवात केली आहे. त्यामुळे आमदार सानप यांना गणेश गिते, उद्धव निमसे, संभाजी मोरुस्कर, सुनील आडके, अरुण पवार या आपल्याच शिष्यांशी उमेदवारीसाठी स्पर्धा करावी लागणार आहे. मनसे, राष्ट्रवादी आणि काँग्रेसचा एकत्रित उमेदवार अशी सध्या तरी स्थिती आहे. वंचित बहुजन आघाडीचा फॅक्टरही विधानसभा निवडणुकीत जाणवण्याची शक्यता आहे. त्यामुळे या मतदारसंघातील निवडणूक लक्षवेधी आणि रंगतदार ठरणार असल्याचे चित्र आहे. गेल्या वेळेस काँग्रेसकडून निवडणूक लढवून चांगली मते घेतलेले उद्धव निमसे व राष्ट्रवादीचे बंडखोर दिनकर आढाव, मनसेचे रमेश धोंगडे हे भाजप आणि शिवसेनेत असल्याने या मतदारसंघात युतीचा टक्का वाढला आहे.
--
महाआघाडीचा पर्याय
या मतदारसंघात काँग्रेस, राष्ट्रवादी आणि मनसे या संभाव्य महाआघाडीच्या वतीने माजी खासदार अॅड. उत्तमराव ढिकले यांचे पुत्र अॅड. राहुल ढिकलेंनी आधीपासूनच प्रचाराला सुरुवात केली आहे. परंतु, लोकसभा निवडणुकीत वंचितने तब्बल २४ हजार मते मिळविल्याने महाआघाडीसमोरही मोठे आव्हान असणार आहे. वंचितने महाआघाडीसोबत राहण्याचा निर्णय घेतल्यास महाआघाडीचे बळ वाढून या मतदारसंघात युतीच्या उमेदवारासमोर कडवे आव्हान उभे राहण्याची शक्यता आहे.
--
आखणी एक 'गोडसे'
दरम्यान, इंडिया सिक्युरिटी प्रेस अँड करन्सी नोट प्रेस मजदूर संघाचे सरचिटणीस आणि खासदार हेमंत गोडसे यांचे चुलत बंधू जगदीश गोडसे यांनीही विधानसभा निवडणूक लढण्याची चाचपणी सुरू केली आहे. या मतदारसंघातील कामगारांची संख्या, नातीगोती आणि लोकसभा निवडणुकीत खासदार गोडसेंच्या प्रचारावेळी झालेल्या जनसंपर्काचा लाभ विधानसभा निवडणुकीत कामी येण्याचीही शक्यता त्यांना वाटत आहे. त्यामुळे गोडसे शिवसेनेसह भाजपच्या संपर्कात आहेत. शिवसेनेचे संपर्क नेते संजय राऊत आणि पालकमंत्री गिरीश महाजन यांच्याशी त्यांचे चांगले संबंध असल्याने गोडसे ऐनवेळी भाजपकडून निवडणूक लढू शकतात. भाजप आणि शिवसेनेतील इच्छुकांना शांत करण्यासाठी युतीकडून आणखी एकदा 'गोडसे' ब्रँडचा वापर केला जाऊ शकतो. कामगार क्षेत्रात काम करणाऱ्या नेतृत्वाला मुरलीधर मानेंनंतर संधी मिळालेली नाही. त्यामुळे गोडसे हा एक पल्ला गाठू शकतील, असा एक मतप्रवाह आहे.
--
...असे आहेत पक्षनिहाय इच्छुक
--
भाजप : आमदार बाळासाहेब सानप, उद्धव निमसे, गणेश गिते, सुनील बागूल, हेमंत धात्रक, सुनील आडके, अरुण पवार, संभाजी मोरुस्कर
शिवसेना : चंद्रकात लवटे, दत्ता गायकवाड
राष्ट्रवादी काँग्रेस : निवृत्ती अरिंगळे, गौरव गोवर्धने, विजय आव्हाड
काँग्रेस : राजाराम पानगव्हाणे, शरद आहेर, डॉ. शोभा बच्छाव, राहुल दिवे
मनसे : अॅड. राहुल ढिकले
वंचित आघाडी : पवन पवार
--
२०१४ मध्ये विधानसभेसाठी झालेले मतदान
--
बाळासाहेब सानप (भाजप)- ७८,५५४
चंद्रकांत लवटे (शिवसेना)- ३२,४४८
उद्धव निमसे (काँग्रेस)- १९,४४२
देवीदास पिंगळे (राष्ट्रवादी काँग्रेस)- १२,९००
रमेश धोंगडे (मनसे)- १२,४३७
--
२०१९ मध्ये लोकसभेसाठी झालेले मतदान
--
हेमंत गोडसे (शिवसेना)- १,१७,१२७
समीर भुजबळ (राष्ट्रवादी)- ४०,८५९
माणिकराव कोकाटे (अपक्ष)- ६,६६६
पवन पवार (वंचित आघाडी)- २४,७६४