मटा विशेष - राज्यातील १६७ धरणांची दुरुस्ती व पुनर्बांधणी होणार - तब्बल ९४० कोटींचा निधी मंजूर Gautam.Sancheti@timesgroup.com @sanchetigMT नाशिक : कोकणातील तिवरे धरण फुटल्याच्या पार्श्वभूमीवर राज्यातील धरणांच्या सुरक्षेचा प्रश्न उपस्थित केला जात आहे. मात्र, जलसंपदा विभागाच्या अखत्यारीत असलेल्या राज्यातील एकूण १६७ धरणांची दुरुस्ती व पुनर्बांधणी केली जाणार आहे. त्यासाठी विश्व बँकेचे सहकार्य लाभणार आहे. ९४० कोटींच्या निधीतून ही सुरक्षा साधली जाणार आहे. यात ७० टक्के वाटा विश्व बँकेचा, तर ३० टक्के वाटा राज्य सरकारचा आहे. यासाठी चार विभागांच्या धरणसुरक्षा पुनर्लोकन समिती स्थापन करण्यात आली असून, त्यात निवृत्त अधिकारी व धरणांची माहिती असलेल्या तज्ज्ञांचा समावेश आहे. चिपळूण येथील तिवरे धरण फुटल्यामुळे राज्यात धरण सुरक्षिततेचा मुद्दा रडारवर आलेला असतानाच नाशिक येथे बुधवारी मेरी येथे जलसंपदा विभाग व विश्व बँकेच्या अधिकाऱ्यांची कार्यशाळा सुरू होती. त्यात धरणांच्या सुरक्षिततेसाठी मंजूर झालेल्या ९४० कोटींतून कोणत्या धरणाचे काम अग्रक्रमाने करायचे व त्यासाठी समिती कशी असावी, यावर निर्णय घेण्यात आला. बैठकीतच धरणसुरक्षा पुनर्लोकन समिती तयार करण्यात आली. त्यात नाशिक, औरंगाबाद, नागपूर, कोकण व नाशिक अशा चार समित्यांची स्थापना करण्यात आली आहे. या समित्या आता जुलैअखेर स्थानिक अधिकाऱ्यांना बरोबर घेऊन धरणांची पाहणी करणार असून, त्यानंतर ते अहवाल देणार आहेत. त्यानंतर या धरणाच्या कामाला मंजुरी देऊन ते काम केले जाणार आहे. या समितीत धरणाची माहिती असणारे सर्व क्षेत्रातील तज्ज्ञ असणार आहे. देशात सर्वाधिक धरणे राज्यात आहेत. त्यामुळे धरण सुरक्षितता हा महत्त्वाचा विषय आहे. त्यात धरणफुटीच्या घटना भविष्यात होऊ नये, यासाठी हे सकारात्मक पाऊल असून, त्यामुळे धरण सुरक्षित बनणार आहे. दुरुस्ती व पुनर्बांधणी धरणाची पुनर्बांधणी व दुरुस्ती असे दोन्ही प्रकार या निधीतून केले जाणार आहे. पाहणी अहवालानंतर त्याबाबत निश्चित आकडे समोर येणार आहे. यात धरणांची संख्या व निधी कमी-जास्त होऊ शकतो, असेही एका अधिकाऱ्यांनी सांगितले. नाशिक विभागाची धरणे नाशिकच्या गंगापूर धरणाबरोबरच विभागातील दारणा, भंडारदरा व इतर धरणांचाही यात समावेश आहे. त्यामुळे येथील धरणांची पाहणी केल्यानंतर त्यावर निर्णय घेतला जाणार आहे. जेथे तात्पुरती दुरुस्ती आवश्यक आहे, ती तातडीने केली जाणार आहे.
मोबाइल अॅप डाउनलोड करा आणि राहा अपडेट
