मुथूट दरोडा प्रकरण म. टा. खास प्रतिनिधी, नाशिक मुथूट दरोड्यावेळी वापरण्यात आलेला टॅम्पो हा सुरतमधील असून, टेम्पो उपलब्ध करण्याची जबाबदारी फरार आरोपी आकाशसिंग राजपूत याने पार पाडल्याचे पोलिसांच्या तपासात निष्पन्न होते आहे. सुरत आणि नाशिक हे लोकल कनेक्शन सांभाळण्याचे काम आकाशसिंग राजपूत याने केले असून, त्याच्या अटकेनंतर या सर्व बाबी स्पष्ट होतील. मुथूट दरोड्या प्रकरणी शहर पोलिसांनी जितेंद्रसिंग राजपूत आणि परमेंदर सिंग या दोघा सराईत आरोपींना बेड्या ठोकल्या आहेत. हे दोघे सध्या पोलिस कोठडीत असून, पोलिस त्यांची चौकशी करीत आहेत. या गुन्ह्याचा कट बिहार व्हाया सुरत असा शिजला असून, गुन्ह्याचे सूत्रधार कुख्यात आरोपी आहेत. मुथूट दरोड्यात प्रत्यक्ष सहा तर अप्रत्यक्ष किमान सहा ते आठ जणांनी सहभाग घेतल्याचे दिसून येते. अप्रत्यक्ष काम करणाऱ्यापैकी एकाकडे घटनेच्या दिवशी टेम्पोची जबाबदारी देण्यात आली होती. लूट केलेले सोने याच टॅम्पोतून दरोडेखोर घेऊन जाणार होते. मात्र, तसे झाले नाही. कार्यालयात सॅज्यू सॅम्युअलच्या प्रतिकारामुळे दरोडेखोरांना खाली हात परतावे लागले. दुचाकीवर फरार झालेले सर्व आरोपी रामशेज किल्ल्याच्या पायथ्याशी जमा झाले. तेथून ते पाठीमागून आलेल्या टॅम्पोत बसले आणि फरार झाले. यामुळे पुढे असलेल्या पोलिसांच्या नाकाबंदी ते चकवा देऊ शकले. फरार आरोपींचा शोध सुरतमधून टॅम्पो आणण्याचे काम अटक संशयित जितेंद्रसिंग राजपूतचा भाऊ आकाशसिंग राजपूतने केले. सध्या आकाशसिंग फरार असून, त्याच्या अटकेनंतर पोलिसांच्या हाती लागलेल्या या घटनाक्रमाची उकल होणार आहे. शहर पोलिसांचे सात ते आठ पथकांचा परराज्यात मुक्काम असून, फरार आरोपींचा शोध घेण्यात येतो आहे.
मोबाइल अॅप डाउनलोड करा आणि राहा अपडेट
