डॉ. इटकरांचा सल्ला; अल्प शुल्कात जमीन उपलब्ध म. टा. खास प्रतिनिधी, नाशिक आफ्रिका देश हा शेतीसाठी सुपीक असून, तेथे द्राक्ष बागासाठी चांगली संधी आहे. तेथील सरकार शेतीसाठी अगदी कमी शुल्कात जमिनीचे करारनामे करून देते. त्यामुळे तेथे जाऊन शेती करायला हवी. पंधराशे लोकांचा ग्रुप एकत्र आला तर ग्रुप शेती करू शकतात, असा सल्ला जागतिक कीर्तीचे सल्लागार डॉ. सचिन इटकर यांनी द्राक्ष उत्पादकांना दिला. त्यासाठी मी सर्व मदत करेल, असेही त्यांनी या वेळी सांगितले. रावसाहेब थोरात सभागृहात 'आफ्रिका खंडातील द्राक्षशेतीच्या संधी' या विषयावर संवाद साधताना ते शेतकऱ्यांसमोर बोलत होते. वनाधिपती तथा माजी आमदार विनायकदादा पाटील यांनी या व्याख्यानाचे आयोजन केले होते. या वेळी सह्याद्री फार्मचे अध्यक्ष विलास शिंदे हे अध्यक्ष म्हणून उपस्थित होते. इटकर यांनी भारताने गेल्या २० ते २५ वर्षांत जी प्रगती केली आहे, ती २०० वर्षांत झालेली नाही. आफ्रिकेत १९९५ नंतर भारतात जे बदल झाले ते आता होत असून, या देशात शीख, गुजराथी, सिंधी, दाक्षिणात्य व्यापाऱ्यांनी वेगवेगळ्या क्षेत्रात आपले स्थान निर्माण केले आहे. पण, महाराष्ट्रीयन लोक फक्त अमेरिकेत आयटी कंपनीत दिसतात. आफ्रिकेतही ते आहेत पण, नोकरीनिमित्त त्यामुळे येथे मराठी माणसाला शेतीत मोठी संधी आहे, असे मत डॉ. इटकर यांनी व्यक्त केले. त्यामुळे येथे जाऊन शेती केली तर त्यातून करिअर घडवू शकतात, असेही त्यांनी सांगितले. नाशिक आणि द्राक्ष हे अतूट नातं ठरलेले आहे. आज द्राक्ष उत्पादक शेतकरी एक संक्रमाणातून जात असून, याच धर्तीवर नव्या संधीच्या माहितीसाठी या व्याख्यानाचे आयोजन करण्यात आल्याचे संयोजकांनी सांगितले. आफ्रिका देशामध्ये अनेकांकडे पाच हजार हेक्टर, दहा हजार हेक्टर शेती आहे. पण, करणारे कोणीच नसल्याने येथे तुम्हाला जावई होण्याची संधी असल्याचेही डॉ. इटकर यांनी सांगितले. महात्मा गांधी २० वर्षे आफ्रिकेत राहिले. त्यामुळे त्यांच्या कामाचा आजही येथे आदर केला जातो. भारतीयांना ते आपले मित्र मानतात. त्यांचे स्वागही ते मनापासून करतात, असेही ते म्हणाले.
मोबाइल अॅप डाउनलोड करा आणि राहा अपडेट
